Daniel 6 - ICIGHAN BIBILO

¹ Dariu nenge doo u una ver mbatarev deri man ikundu sha tartor la, mba vea tema ken tartor la cii;

² man mbahemenev utar mba ve nengen sha a ve yô, Daniel gema lu u môm ken a ve, sha u mbatarev mban ve̱ ôron ve akaa a ve eren, sha er kwagh una saa tor ga yô.

³ Nahan Daniel ne hemba mbahemenev man mbatarev la cii; gadia jijingi u hemban lu ker a na; nahan tor ver ishima u veren un sha tartor la cii.

⁴ Tsô mbahemenev man mbatarev lu keren u zuan a ityôkwagh i bo sha Daniel sha kwagh u tartor la, kpaa ve zua a ityôikaa i bo shin ifer kpaa ga; gadia a lu ormimi je, man i zua a ma mtsum shin ifer ken a na kpaa ga.

⁵ Tsô ior mban kaa er: Sea zua a ityôikaa i bo hen Daniel ne ga, saa di sé zua a mi sha tindi u Aôndo na la.

⁶ Nahan mbahemenev man mbatarev mban zua hen tor, ve kaa a tor er: Tor Dariu a̱ lu uma gbem sha won!

⁷ Mbahemenev mba ken tartor ne cii; uityombaiorov man mbatarev man mbawasenmhen man ugomna ve hen imôngo er, tor a̱ wa tindi, a̱ ta icin taveraa zan zan ayange ikundugber, er hanma or u nana sôn kwagh hen ma aôndo shin ma or, á kera lu her a we ga yô, tor a̱ gbihi nan shin ihungwa i ubegha.

⁸ Hegen yô, tor, yange kwagh ne taveraa, man wa uwegh sha u i̱ de gem un ga, a̱ lu sha inja i tindi u Mbamedia man Mbapershia u a gem mayange ga la nahan.

⁹ Nahan tor Dariu wa uwegh sha ingeren la kua icin la cii.

¹⁰ Zum u Daniel fa er i wa uwegh sha ingeren la yô, a nyôr ken iyou na, uwindou mba iyou na i sha, lu ivegher, vegher u shin Yerusalem la, a gure inya sha anu na kwa tar hanma iyange, a er msen, a na ishughun sha ishigh ki Aôndo na, er a vanden eren keke nahan.

¹¹ Tsô ior mbala zua imôngo, ve va kohol Daniel sônon man zamber sha ishigh ki Aôndo na.

¹² Nahan ve va, ve ôr kwagh a tor sha kwagh u icin i tan i tor la er: U wa uwegh sha icintan ne wer: Hanma or u nana sôn kwagh hen ma aôndo shin ma or ken ayange a ikundugber ne, á kera lu hen we ga yô, á gbihi nan shin ihungwa i ubegha gaa? Tor gema kaa er: Ka kwagh u bunden ga, sha inja i tindi u Mbamedia man Mbapershia, u a gem mayange ga yô.

¹³ Tsô ve gema ve kaa a tor er: Daniel or u ken mbakwarev mba Yuda la, a wa u iko ga, kpa gbe sônon a nagh kera tsô kwa tar iyange i môm.

¹⁴ Tsô tor ongo akaaôron ne nahan yô, ishima vihi un tsung, a wa ishima u yiman Daniel; a nôngo sha gbashima u yiman un zan zan iyange kar miren.

¹⁵ Nahan ior mbala va zua hen tor, ve kaa a tor er: Fa, tor, ka tindi u Mbamedia man Mbapershia er ma icin i tan shin tindi u tor a we yô, á kera gema un mayange ga.

¹⁶ Nahan tor na zwa, i va a Daniel, i gbihi un shin ihungwa i ubegha. Kpa tor ôr kwagh a Daniel kaa er: Aôndo wou u u civir Un gbem la, A̱ yima u.

¹⁷ Shi i va a iwen, i va cir sha zwa ihungwa; tor ver i ikav sha kunya na, man sha kunya u mbatarev nav; sha u i̱ de gem ma kwagh sha Daniel kposo ga yô.

¹⁸ Nahan tor hide ken iyou na i tor, a venda kwaghyan tugh mbula; i va a ityougholov sha ishigh nagh kpaa ga; mnyam kpaa bunde un.

¹⁹ Tsô tor mough pepe dindee, a za hen ihungwa i ubegha la ayem.

²⁰ Za ar hen ihungwa la yô, a yila Daniel sha imo i mlia; tor ôr kwagh, kaa a Daniel er: We, Daniel, wanakiriki u Aôndo u uma, Aôndo wou u u civir Un gbem la, A fatyô u yiman we sha ikev i ubegha kpa?

²¹ Tsô Daniel gema kaa a tor er: Tor a̱ lu uma gbem.

²² Aôndo wam tindi ortyom Na, va cir ubegha ijô, ve erem ma kwagh u vihin ga; gadia i zuam a ibo sha ishigh Nagh ga; sha ishigh you kpaa, tor, m er ma kwaghbo ga.

²³ Nahan tor ember tsung, a kaa er, i̱ dugh Daniel shin ihungwa kera. Nahan i dugh Daniel shin ihungwa, ve zua un a iyolvihin mape je ga, sha ci u a suur sha Aôndo na yô.

²⁴ Tor shi kaa er, i̱ va a ior mba ve sende Daniel mbala, i̱ gbihi ve shin ihungwa i ubegha, ve man ônov vev man kasev vev; er ve lu a mande shin mkur u ihungwa la ga je tsô ubegha ve va hemba ve, ve hembe akuhe a ve avur avur cii.

²⁵ Tsô tor Dariu nger hen ior man akuraior man ijô cii, mba ve tem sha won cii, er: Bem a̱ ngee ne.

²⁶ M ngu wan tindi mer: Sha ajiir a i lu tartor wam cii, ior ve̱ gbidye ikarikase iyol, ve̱ cia sha ishigh ki Aôndo u Daniel; gadia ka Un A lu Aôndo u uma, u lun gbem sha won ye, tartor Na kpaa ka u timin ga, man tahav Nav mbua lu zan zan mkur je.

²⁷ Ka A yima man shi a war, man A er akav man akaa a kpilighyol sha kwavaôndo kua shin tar kpaa, Wen u A yima Daniel ken agee a ubegha la.

²⁸ Kape Daniel ne zua a mkpeyol sha ayange a mtemtor u Dariu man sha ayange a mtemtor u Shirushi or u Pershia la.