Daniel 5 - ICIGHAN BIBILO

¹ Tor Beleshasar er zegeiniongo sha ci u mbatarev nav dubu môm, a ma wain sha ishigh ki ior mba ve lu dubu la.

² Beleshasar, er wain nyoho un yô, a kaa er, i̱ va a ikav mbi zenaria man mbi azurfa mbi ter na Nebukadinesar kura ken tempel u ken Yerusalem la, sha u tor man mbatarev nav man kasev nav man kasev nav mba sha uika ve̱ ma kwagh a mi yô.

³ Nahan i va a ikav mbi zenaria mbi i kura ken tempel, iyou i Aôndo i i lu ken Yerusalem la; nahan tor man mbatarev nav man kasev nav kua kasev nav mba sha uika, ve ma kwagh a mi.

⁴ Ve ma wain, ve wuese mbaaôndo mba sha zenaria man mba sha azurfa man mba sha togula man mba sha iyô man mba sha ikon man mba sha awen.

⁵ Hen shighe la je ahôaveegh a uwegh ku orough due, gba ngeren kwagh sha ivue i pupuu i sha kpekpe u iyou i tor, sha ishigh ki daarimenger; tor gema nenge tiônwe u lu ngeren la.

⁶ Tsô mluashe u ishigh ki tor gema kposo, mbamhen nav kpaa ta un mciem iyol; uijuan mba iwenge na oghom, anu a na kpaa gba kunden ikarikase, zuan.

⁷ Tsô tor genger imo er, i̱ nyôr a mbaasorov man Mbakaldi man mbatsenganôron akaa. Tor ôr kwagh kaa a mbafankwagh mba Babilon er: Or u nana ôr ingeren nen man nana pasem inja i i kpaa yô, á haa nan akondo a nyian dindee iyol, á har nan ishiligh ku zenaria sha mon, nana lu tor u sha utar ken tartor la.

⁸ Nahan mbafankwagh mba tor cii ve nyôr; kpa ingeren la yô, ve fatyô u ôron i ga, shin u pasen tor inja i i kpaa ga.

⁹ Nahan mciem ta tor Beleshasar iyol tsung, mluashe u ishigh nagh gema kposo, mbatarev nav kpaa, kondo ve iyol.

¹⁰ Torkwase va nyôr ken iyou i iniongo sha ci u kwaghôron u tor man mbatarev nav la; nahan torkwase ôr kwagh kaa er: Tor a̱ lu uma gbem sha won; mbamhen ou ve̱ de te u mciem iyol ga, mluashe u ishigh you kpaa a̱ de gem kposo ga.

¹¹ Orgen ngu ken tartor wou u jijingi u uicighanmbaaôndo a lu ken a na yô; sha ayange a teru la, i zua a iwanger man mkav man mfe, inja er mfe u mbaaôndo nahan ken a na; nahan tor Nebukadinesar teru ver un orvesen u mbaahiriv man mbaasorov man u Mbakaldi man mbatsenganôron akaa; ka teru je, tor.

¹² Gadia i zua a jijingi u hemban, man mfe man mkav, man u fan u pasen mnyam, man u pasen ukyikya, man u been akpelan, ken Daniel u tor ii un iti er Belete-shasar la. Yô, i̱ yila Daniel, tsô una pase inja i i.

¹³ Nahan i va a Daniel sha ishigh ki tor. Tor ôr kwagh a Daniel kaa er: Ka we Daniel u u lu ken ônov mba mbakwarev mba Yuda, mba terem tor due a ve ken Yuda nee?

¹⁴ M vande ungwan kwagh wou, er, jijingi u mbaaôndo a lu ken a we yô, man er i zua a iwanger man mkav man mfe u hemban ken a we kpaa yô.

¹⁵ Hegen yô, i vande nyôron a mbafankwagh, ka mbaasorov je la, sha ishigh yagh, sha u ve̱ ôr ingeren ne, man ve̱ pasem inja i i kpaa; kpa ve fatyô u pasen inja i kwagh la ga.

¹⁶ Kpa m ungwa mer, we yô, u fatyô u pasen akaa, man u been akpelan; hegen yô, aluer ú fatyô u ôron ingeren la, man u pasen mo inja i i kpa yô, á haa u akondo a nyian dindee, á har u ishiligh ku zenaria sha mon kpaa, ú lu tor u sha utar ken tartor.

¹⁷ Tsô Daniel gema kaa a tor er: Lu a iwua you, gema injar you la na orgen; nahan kpaa me ôr tor ingeren la, me pase un inja i i.

¹⁸ We tor, Aôndo Uhembansha na Nebukadinesar teru tartor man ivesen man icivir man shagba.

¹⁹ Sha ci u ivesen i A na un la, ior man akuraior man ijô cii, ve gbidye akarkase iyol ve cia un; hanma or u a nenge i doo un u wuan yô, a wua nan; hanma or u a nenge i doo u nana̱ lu uma yô, a de nan uma; man hanma or u i lu un pe kenden nan sha yô, a kende a nan sha; man hanma or u i lu un pe hiden a nan ijime yô, a hide a nan.

²⁰ Kpa zum u a hii u moron iyol yô, man jijingi na kpaa cighir zan zan a hingir u eren kwagh sha ihagh yô, i dugh un sha ikônough nagh ki torough kera, man icivir na kpaa i ngohol i kera;

²¹ i zenda un hen ior kera; ishima na gema hingir er i inyamtoho nahan, ijiir na i tsan kpaa lu a ujaki mba tohov imôngo; a hingir u yan toho er ibua nahan, iyol na heen sha avure a Sha, zan zan a kar fan er Aôndo Uhembansha la, A tem tor sha tartor u ior; ka A gema u, A na hanma or u i doo Un u nan nan yô.

²² Man we wan na, Beleshasar, u hide a ishima you ijime ga, shin er u fe akaa ne nahan kpaa.

²³ Kpa u kende a iyol you sha, u hendan a Aôndo u Sha; shi i va a ikav mbi ken iyou Na sha ishigh you kpaa, we man mbatarev ou man kasev ou man kasev ou mba sha uika, ne ma wain a mi; man u civir mbaaôndo mba sha azurfa man mba sha zenaria man mba sha togula man sha iyô man mba ikon man mba sha awen, mba ve nengen ga, ve ongo ga, man ve lu a mfe kpaa ga; man Aôndo u iôôn you i lu sha ikev Na, kua igbenda you cii kpaa, u civir Un ga.

²⁴ Ka nahan man A tindi tiônwe a va nger ingeren ne ye.

²⁵ Ka ingeren i i nger i ne: MENE, MENE, TEKEL, UFARSHIN.

²⁶ Ka mpase u kwagh ne ne: MENE: Aôndo ôr ayange a tartor wou, A kure u kpaa.

²⁷ TEKEL: I kar u sha iyôgh ki karen kwagh; yô, u yina.

²⁸ PERESE: I pav tartor wou i na Mbamedia man Mbapershia.

²⁹ Tsô Beleshasar na zwa, nahan ve haa Daniel akondo a nyian dindee man ve har un ishiligh ku zenaria sha mon, man ve yôô kwagh na er una lu tor u sha utar ken tartor.

³⁰ Hen tugh mbula je, i wua Beleshasar tor u Mbakaldi. Dariu or u Media gema ngohol

³¹ tartor la, zum u anyom a na kuma akunduatar kar ahar la.