Daniel 3 - ICIGHAN BIBILO

¹ Tor Nebukadinesar er eev mbu sha zenaria, ityaven i mbu lu aseva akunduatar man igbanger i mbu lu aseva ataratar; a ver mbu shin pev u Dura ken tiôntar u Babilon.

² Tsô tor Nebukadinesar tindi er, uityombaiorov man ugomna man mbaajiriv man mbanengen sha inyar man mbawasenmhen man mbafanatindi man mbakurantar mba atôônatar la cii, ve̱ va kohol hen mver u eev mbu tor Nebukadinesar er la.

³ Nahan utor man uityombaiorov man ugomna man mbaajiriv man mbanengen sha inyar man mbawasenmhen man mbafanatindi man mbakurantar mba atôônatar la cii, ve va kohol hen mver u eev mbu tor Nebukadinesar er la, ve va tile sha ishigh ki eev mbu Nebukadinesar er la.

⁴ Tsô oryôôn genger imo, kaa er: I wa ne tindi, ne ior man akuraior man ijô,

⁵ shighe u nea ungwa imo i kor ma imar man molo man gbange man adiguve man ikpaimar man hanma inja i ityougholough cii yô, gure nen inya, sugh nen eev mbu zenaria mbu tor Nebukadinesar a er la;

⁶ man aluer or nana gure inya, nana sugh mbu ga yô, á gbihi nan shin atô u atse a usu u yeghen ker la, hen shighe la je.

⁷ Nahan, hen shighe u ior cii ve ongo imo i kor man i mar man molo man gbange man adiguve man hanma inja i ityougholough cii yô, ior man akuraior man ijô cii, ve gure inya, ve sugh eev mbu zenaria mbu tor Nebukadinesar a er la.

⁸ Tsô, hen shighe la je, Mbakaldi mbagenev va, va yila Mbayuda ijir.

⁹ Ve ôr kwagh a tor Nebukadinesar, ve kaa er: Tor a̱ lu uma gbem.

¹⁰ Tor, we u wa tindi wer, hanma or u nan ongo imo i kor man imar man molo man gbange man adiguve man ikpaimar, man hanma inja i ityougholough cii yô, nana̱ gure inya nana̱ sugh eev mbu zenaria mbula,

¹¹ man hanma or u nana gure inya nana sugh mbu ga yô, á gbihi nan ken atô u atse a usu u yeghen ker la.

¹² Mbayuda mbagenev mba, mba u ver ve sha akaa a tiôntar u Babilon la, ka Saderaki man Meshaki man Abedi-nego; ior mban yô, ve wa u iko ga tor; mba civir mbaaôndo ou ga, man mba civir eev mbu zenaria mbu u ver la kpaa ga.

¹³ Tsô Nebukadinesar kaa sha ishima i vihin man iyugh na i tsung er, i̱ va a Saderaki man Meshaki man Abedi-nego. Tsô i va a ior mbala sha ishigh ki tor.

¹⁴ Nebukadinesar gema pine ve er: We, Saderaki man Meshaki man Abedi-nego, ka sha apera je ne civir aôndo wam ga, man eev mbu zenaria mbu m ver la kpaa, ne civir mbu ga yee?

¹⁵ Hegen yô, aluer né wa ago iyol sha shighe u né ungwa imo i kor man imar man molo man gbange man adiguve man ikpaimar man hanma inja i ityougholough cii yô, man né gure inya, né sugh eev mbu m er la yô, doo; kpaa aluer né sugh mbu ga yô, á gbihi ne ken atô u atse a usu u yeghen ker la, hen shighe la je: ka hanma aôndo je una yima ne sha ikev yama?

¹⁶ Saderaki man Meshaki man Abedi-nego, ve gema ve kaa a tor Nebukadinesar er: Kera gba u sé kaa u imo sha kwagh ne ga.

¹⁷ Aluer Aôndo wase u se civir Un la Una fatyô u yiman se yô, Una yima se ken atse a usu u yeghen ker la kua sha ave ou kpaa, tor.

¹⁸ A lu nahan ga kpaa, fa kwagh ne, tor, sé civir mbaaôndo ou ga, man shi eev mbu zenaria mbu u ver la kpaa, sé civir mbu ga.

¹⁹ Nahan ishima vihi Nebuka-dinesar kpishi, mlu u ishigh nagh gema kposo a Saderaki man Meshaki man Abedi-nego; nahan a ôr kwagh, a kaa er, i̱ kende usu u̱ hemba tseen a u i vande keer kwa taankaruhar.

²⁰ Shi a kaa a ior mbagenev mba taver iyol mba ve lu ken mbautyav nav er, ve̱ kange Saderaki man Meshaki man Abedi-nego, ve̱ gbihi ve ken atse a usu u yeghen ker la.

²¹ Nahan i kange ior mbala a uriga vev iyol man uwondo vev, man atsar a ve, kua akondo a ve agen, i gbihi ve ken atô u atse a usu u yeghen ker la.

²² Nahan er imo i tor taver yum, man atse kpaa tsee tsung yô, nomborusu gema wua ior mba ve tôô Saderaki man Meshaki man Abedi-nego la.

²³ Ior mba utar mban: Saderaki man Meshaki man Abedi-nego ve gba ken atô u atse a usu u yeghen ker la, a ikangenev mbila.

²⁴ Tsô kpiligh tor Nebukadinesar iyol, a mough sha gagh; a ôr kwagh a mbawasen un mhen, a kaa er: Kera ka ior itiar se gbihi ve uikangen ken atô u usu gaa? Ve gema ve kaa a tor er: Ka nahan tor.

²⁵ A gema a kaa er: Nenge, m ngu nengen a iorov unyiin mba a ikangenev iyol, ga, mba zenden ken atô u usu, kwagh er ve ga; mluashe u u sha unyiin la, ngu er wan u mbaaôndo nahan.

²⁶ Nahan Nebukadinesar kporom ikua hen hunda u atse a usu u yeghen ker la, a ôr kwagh a kaa er: We, Saderaki man Meshaki man Abedi-nego, ne mbayev mba Aôndo Uhembansha cii, due, va nen heen. Tsô Saderaki man Meshaki man Abedi-nego ve due ken atô u usu la.

²⁷ Nahan uityombaiorov man ugomna man mbawasen tor mhen, ve zua her cii, ve nenge ior mbala er usu lu a tahav sha ayol a ve ga, shin ice ve i sha ityou tsô kpaa, usu anger ga, uriga vev kpaa vihi ga, ihuma i usu tsô kpaa, bende ve ga.

²⁸ Nebukadinesar ôr kwagh, kaa er: I̱ wuese Aôndo u Saderaki man Meshaki man Abedi-nego, u A tindi ortyom Na, a va yem mbayev Nav, mba ve suur sha a Na, ve we tindi u tor iko ga, ve na ayol a ve sha u civir ma aôndo ugen sughun un ga, saa Aôndo ve tseegh yô.

²⁹ Nahan yô, m wa hanma ior man ikurior man zwa tindi mer, or u nana ôr kwagh dang sha Aôndo u Saderaki man Meshaki man Abedi-nego ne yô, á paa nan avur avur, á gema ya u nan á hingir tihi u ihôgh; gadia ma aôndo ugen ngu u una fatyô u yiman or sha imbakwagh ne nahan ga.

³⁰ Nahan tor seer nan Saderaki man Meshaki man Abedi-nego tahav ken tiôntar u Babilon.