Daniel 12 - ICIGHAN BIBILO

¹ Hen shighe la Mikael, ortaregh u a nengen sha ônov mba nongo wou la, una mough á tile sha; ican ia er sha shighe la, imba i i lu a er mayange ga yô, hii sha shighe u ikurior i lu sha won, zan zan ar hen shighe ne; hen shighe la, á yima ior ou, hanma or u i nger nan ken ruamabera yô.

² Ior kpishi ken mba ve lu yaven shin vuulevu u taregh vea nder, mbagenev sha u zan ken uma u tsôron, man mbagenev di sha u zan ken kunya man iheen i been mayange ga.

³ Mba ve lu a kwaghfan yô, vea engem er iengem i sha kwavaôndo nahan, mba ve gem ior kpishi vea hingir mbaperapera, vea engem er asan nahan zan zan gbem sha won.

⁴ Kpa we Daniel cir akaaôron man ver ikav sha ruamabera ne zan zan sha shighe u mkur; ior kpishi vea zende wue wue man mfe kpaa una seer.

⁵ Nahan mo Daniel m kenger, yô, nenge, mbagenev uhar tile, u môm hen kpeifi yande ne man ugen di ken kpeifi yande la.

⁶ Ugen kaa a or u haan ikondo i pupuu i kôngor u a lu sha sha mngerem ma ifim la, er: Shighe á kar nan je man mkur u akaakpilighyol ne una kuma?

⁷ Tsô m ungwa or u haan ikondo i pupuu i kôngor u a lu sha sha mngerem ma ifim la, zum u a kende uwegh nagh ku yanegh man uwegh nagh ku imesegh sha yô, a bum Un u A lu uma gbem la, er: á lu shighe man ashighe man veghershighe; zum u vea vihi agee a icighanikurior kera ci ca yô, akaa ne cii aa kure sha min.

⁸ Tsô m ungwa, kpa m kav ga; nahan m kaa mer: Terem, mkur u akaa ne una lu nana?

⁹ A kaa er: Yem tsô Daniel, gadia i cir akaaôron la; i ver a ikav zan zan ar sha shighe u mkur la.

¹⁰ Mbagenev kpishi vea wanger ayol a ve, vea tsegha ayol a ve, vea lu wang; kpa mbaaferev yô, vea er aferakaa; mô môm ken mbaaferev nana kav ga; kpa mba ve lu a kwaghfan yô, vea kav.

¹¹ Hii sha shighe u i kar a nagh ku nanden ku gbem la kera, man i ver kwaghndôhôrshima u nan mtim la yô, ayange aa kar dubu man deri uhar man akunduanyiingber.

¹² Á saan or u nan kegh nan ar sha ayange dubu man deri utar man ikundugber kar utaan la iyol.

¹³ Kpa we, yem tsô, zan zan mkur; gadia ú mem, man ú mough ú tile sha kwar wou, sha mkur u ayangegh.