Daniel 11 - ICIGHAN BIBILO

¹ Mo yô, sha inyom i hiihii i Dariu Ormedia la, m tile sha u wasen un man u taver un kpaa.

² Hegen yô, me pase u kwagh u mimi. Nenge, utor utar shi vea mough ken Pershia; u sha unyiin la una hemba ve inyaregh ci ca cii; zum u una taver sha ci u inyaregh nagh yô, una tor ior ityô cii, sha u hendan a tartor u Grika.

³ Tsô tor u ageegh una mough u una tema tor sha tahav mbu vesen, una eren kwagh sha ishima na.

⁴ Zum u una mough yô, tartor na ua gba, á pav u sha avegher a ahumbe a anyiin a Sha la, ua kera lu u tsombor na ga, tahav nav mbu a tem tor sha mi la kpaa mbua kera lu ga; gadia á wuhe tartor na kera, ua hingir u mbagenev, á kera lu mban ga.

⁵ Tor u sha imbusutariyan una taver, kpa u môm ken atiator a na una hemba taver a na, una tema tor; tartor na ua lu tartor u vesen.

⁶ Er anyom á kar yô, vea zua ayol a ve, wan u tor u ken imbusutariyan u kwase, una va hen tor u ken imbusutarimese sha u va himen iyongo, kpa una kera lu a agee a ikasewe na gbem ga; un tor la kpaa una tile ga, shin ikasewe na kpaa ga; un wan u tor la kpaa á due un kera kua mba ve ve a na la, man ter u a mar un la kua un u a er un sha ayange la kpaa.

⁷ Kpa ken gbaa u shin amise na, ugen una mough hen ijiir na, u una va ta num sha ikumutya, una nyôr ken ayouautya a taver a tor u sha imbusutarimese la, una er a ve sha ishima na, una hemba ve kpaa;

⁸ mbaaôndo vev man ieev vev mbi keren a ker, a ikav vev mbi dedoo, mbi sha azurfa man sha zenaria, una kura kera, una yem a mi ken Igipiti; una mem u nôngon ityav a tor u sha imbusutarimese anyom á kar.

⁹ Ngula kpaa una va ken tartor u tor u shin imbusutariyan, kpa una hide hen tar na.

¹⁰ Ônov nav vea nôngo ityav, vea kohol akumautya a vesen kpishi, una va, una nyôr una kuwa emememe, una kar man una shi á hide una va nôngo ityav zan zan una za ar hen ayouautya a na a taver.

¹¹ Tsô tor u shin imbusutariyan una mough a ishima i vihin, una due, una nôngo ityav a na, ka tor u sha imbusutarimese la; ngun una due a ikumutya i vesen, kpa á na ikumutya la sha ikev i ngula.

¹² Zum u una kura ikpelaior la kera yô, ishima na ia kende sha; una haa ior inya udubu, udubu pue, kpa una taver zan zan ga.

¹³ Tor u ken imbusutarimese una hide, una va a ikpelaior igen, ia hemba i hiihii la; anyom aa kar yô, una va a ikumutya i vesen man ikav kpishi kpaa.

¹⁴ Sha ayange la ior kpishi vea hendan a tor u imbusutariyan la; shi ior mba vihin kwagh mba ken ior ou kpaa vea mough sha, sha u kuren mpase u sha mnenge la; kpa vea gba.

¹⁵ Nahan tor u sha imbusutarimese una va, una ta tihinya, una ngohol garutya u taver; akumautya a ken imbusutariyan aa fatyô u tilen sha ga, shin uicuwanmbautyav nav kpaa ga, gadia ma agee a tilen sha aa lu ga.

¹⁶ Kpa wen u una va ta num sha a na la, una er sha ishima na, ma or môm kpaa nana fatyô u tilen un sha ishi ga; shi una tile ken Tar u Icivirigh la, mtim una lu sha uwegh nagh kpaa.

¹⁷ Una ver ishigh sha u van a tahav mbu tartor na cii, una hime iyongo a na; una na un wankwase sha u vihin tartor la kera; kpa mhen la una za sha mi ga, una lu un a iwasen kpaa ga.

¹⁸ Ken masetyô la, una gema á ver ishigh nagh ken ityar i shin kpezegemnger, una ngohol i kpishi; kpa kurutya ugen una yange un ilyahan na la kera; een, zan zan una na ilyahan na la, ia hide sha ityough nagh.

¹⁹ Hen shighe la una gema ishigh á ver ken ayouautya a taver a ken tar na; kpa una nôngo gbev, una gba, á kera zua a na ga.

²⁰ Tsô ugen una mough sha ityough nagh, una na or u ngohol kpandegh sha apera sha u a̱ nyôr ken ijiir i hemban doon i tartor la; kpa ayange á va kar kpeghee tsô una saa ishe, á lu sha iyugh ga, shin sha utya kpaa ga.

²¹ Orgen shi nana mough sha ityough nagh nana lu dangor u i ne nan icivir i tor ga; kpa nana va abur abur, nana va ngohol tartor sha zwanyohon.

²² Ikumutya i vesen i hendan a nan ia kar sha ishigh ki nan kera, ia saa; een, zan zan ortaregh u ikuryan je kpaa.

²³ Shighe u ka a ya ikur a na kpaa, a gema a eren sha ayom; gadia una mough sha, una taver sha ior kpuaa.

²⁴ Una va abur abur hen ajiir a doon sule a ken tar la; una er akaa a uter nav je kpaa lu vande eren ga yô, shin uter mba uter nav je kpaa lu er ga yô; una kar ve ishar man akaa a i kor ken utya yô, man ikav; een, una hen mbamhen mba vihin sha ayouautya a taver, zan zan shighe á kar côhin.

²⁵ Una kpoghol agee a na kua ishima na sha u za tan num sha tor u ken imbusutariyan a ikumutya i vesen; man tor u ken imbusutariyan la kpaa una nôngo ityav a na a ikumutya i vesen i taver agee; kpa una tile sha ga, gadia vea hen mbamhen mba vihin sha a na.

²⁶ Ka mba ve ye kwaghyan na la, vea vihi un agee ye, man ikumutya na kpaa ia sambe, á wua ior kpishi á haa inya.

²⁷ Utor mba uhar mban yô, vea ver asema a ve sha u eren kwaghbo, vea ôr kwagh sha aie hen tebul môm; kpa á za sha mi ga; gadia mkur una lu sha shighe u i ver la.

²⁸ Nahan una hide hen tar na a akaa kpishi; ishima na ia mough num a icighanikuryan, una er akaa sha ishima na, man una hide hen tar na ye.

²⁹ Sha shighe u i ver la una hide, una va ken imbusutariyan; kpa shighe u hegen ne, á kera lu er shighe u hiihii la nahan ga.

³⁰ Gadia utso mba Mbakitim vea va ta num sha a na; nahan una cia, una hide, una mough num a icighanikuryan, una er akaa sha ishima na; je yô, una hide una ver ishima sha mba ve undu icighanikuryan la.

³¹ Akumautya aa mough her a na, vea hôngor a icighanjiir, garutya u taver la, vea yange nagh ku nanden ku gbem la kera, man vea gema á ver kwaghndôhôrshima u nan mtim.

³² Mba ve eren ifer sha u hendan a ikuryan yô, una vihi ve sha zwanyohon; kpa ior mba ve fe Aôndo ve yô, vea lu dông, vea er kwagh.

³³ Ve mba ve lu a kwaghfan ken ior yô, vea na ior kpishi vea kav kwagh; nahan kpaa vea gba sha sanker man sha nomborusu man ken kwar man ken ishar, ayange á ngee.

³⁴ Zum u vea gba la, á wase ve sha aniwasen kpeghee; kpa ior kpishi vea zua a ve sha zwanyohon.

³⁵ Ken mbafankwagh mbala kpaa, mbagenev vea gba, sha u i̱ sôr ve man i̱ wanger ve man i̱ gema ve ve̱ kungu segh segh, zan zan sha shighe u mkur; gadia una kuma sha shighe u i ver la.

³⁶ Tor la una eren kwagh sha ishima na; una kende a iyol na sha, una moron iyol er un hemba hanma aôndo, una ôr akaavihin a cier iyol sha Aôndo u mbaaôndo cii; á kpe un iyol zan zan iyugh ia kar kuman; gadia kwagh u i ver yô, una kure sha mi vough.

³⁷ Una wa iko sha mbaaôndo mba uter nav ga, shin sha u a doo kasev ishima la kpaa ga, man una kera wa ma aôndo ugen iko ga, gadia una mor iyol á hemba cii.

³⁸ Sha ityouv vev yô, una civir aôndo u ayouautya a taver; aôndo u uter nav ve fe un ga la, una civir un sha zenaria man azurfa man awen a injaa man akaa a haan ishar iyol.

³⁹ Una ta num sha ayouautya a hemban taver la sha iwasen i aôndo ugen; mba ve rumun un yô, á civir ve kpishi; una ver ve vea ya tor sha ior kpishi, una kar ve tar sha inyar.

⁴⁰ Sha shighe u mkur yô, tor u ken imbusutariyan una va nôngo num a na; man tor u ken imbusutarimese kpaa una mough num a na er hiar nahan, a akekeautya man mbaanyinyav man utso kpishi; una nyôr ken ityar, una kar sha mi cii.

⁴¹ Una nyôr ken Tar u Icivirigh la kpaa, man ior kpishi vea gba, kpa mba vea war sha ikev na yô, ka: Edom man Moabi man veghertar u hemban doon u Mbaamon.

⁴² Shi una naregh uwegh nagh sha ityar; tar u Igipiti kpaa ua war ga.

⁴³ Una lu a tahav sha ayou a zenaria man a azurfa man sha akaa a injaa a ken Igipiti cii; Mbalibia man Mbaetiopia vea lu a na ityô.

⁴⁴ Kpa igwa i sha ityoughkitaregh man i ken imbusutarimese ia ta un mciem iyol, nahan una due a ishima i nyoon tsung sha u timin ior kpishi man shi u saren ve kera.

⁴⁵ Una mande utenti mba iyou i tor hen harga u zegemnger a icighanwo u Icivirigh; nahan kpaa una tim her, ma or nana wase un kpaa ga.