Anzaakaa 9 - ICIGHAN BIBILO

¹ Kwaghfan maa ya na, a gba mtôm nam mtaankarmhar,

² a sôngo ilev nav, a nungwa wain na; a sôr tebul na kpaa.

³ A tindi anuunaukase a na, ngu genger imo sha ajiir a hemban taven sha ken gar, kaan er:

⁴ Hanma orlanenkwagh nana̱ kaha heen, man shi or u nan ban a mkav yô, a kaa a nan er:

⁵ Va, va ya nen kwaghyan wam, ma wain u m nongo ne;

⁶ undu nen lanegh enegh, lu nen uma, zaan nen sha gbenda u mkav.

⁷ Or u nan kôôm orpuunakaa yô, nan ngu van a iheen sha iyol i nan; or u nan zehe a iferor yô, nan ngu van a acôghol sha iyol i nan.

⁸ De yangen orpuunakaa ga, sha er nana̱ de ker u ihom ga yô; yange orfankwagh, tsô ú doo nan ishima.

⁹ Tese orfankwagh kwagh, tsô nana seer kwaghfan; tese orperapera, tsô nana seer mhen.

¹⁰ Mcie u cian TER ka mhii u kwaghfan je la, mfe u fan u A lu Icighan la kpaa ka mkav je.

¹¹ Gadia ka sha ikev yam man ayange a ou aa seer ye; anyom a uma wou kpaa á seer a.

¹² Aluer wea lu a kwaghfan yô, ka sha ci wou iyol you je u lu a mi ye; aluer wea lu orpuunakaa yô, ka di kwagh wou je la.

¹³ Ibumekwase ngu inja baveraa, a lan kwagh, a fa ma kwagh ga.

¹⁴ Ka a tema hen hunda u ya na sha ika sha ajiir a taven sha ken gar,

¹⁵ sha u una yila mba ve kar yô, mba ve ze sha gbenda ve jighilii la, er:

¹⁶ Or u nan lu orlanenkwagh yô, nana̱ kaha, nana̱ va heen! Man shi u nan ban a mkav yô, a kaa a nan er:

¹⁷ Mngerem ma iin a ii ma nyoho, man kwaghyan u i ye ken myer kpaa a doo.

¹⁸ Kpa nan kera fa er ujijingi mba mbakpenev ve lu her ga, man er mba a lehe ve la, ve lu ken ajiir a zan a Sheol kpaa ga.