Anzaakaa 4 - ICIGHAN BIBILO

¹ Ne ônov, ungwan nen ityesen i ter, ver nen ishima sha er ne lu a mkav yô;

² gadia ka mhen u dedoo m ne ne ye; ityesen yam kpaa de undun nen i ga.

³ Gadia mo m lu wan u terem u mimi je, u denge denge u doon tswen ken ashe a ngôm;

⁴ a tesem, a kaa a mo er: Ishima you i̱ kusu akaaôron am; waan atindi a am iko, tsô ú lu uma.

⁵ Zua a kwaghfan, zua a mkav, de hungul ga, de undun akaaôron am ga.

⁶ De te un kera ga, tsô una kura u, rumun un, tsô una koso u.

⁷ Mhii u kwaghfan yô: zua a kwaghfan, man sha akaa a u vande zuan a mi cii yô, shi zua a mkav kpaa.

⁸ Kende un sha, nahan una za a we hemen, una na u icivir, aluer wea kuve un yô.

⁹ Una kange u kwagh u hweegh sha icul, una na u idyer i tor i icivirigh je.

¹⁰ Ver ato wan wam, ngohol akaaôron am, nahan anyom a uma wou aa ngee je.

¹¹ Ka gbenda u kwaghfan, m tese u ye, m hemen we sha igbenda i perapera.

¹² Zum u u zenden yô, a-aven a angahar a ou aa kôvor ga, man wea yevese kpaa, ú nôngo gbev ga.

¹³ Kôr ityesen gbang gbang, de pasen i ga, waan i iko, gadia ka i i lu uma wou ye.

¹⁴ De nyer sha gbenda u ior mba bov ga, man shi de zenden sha gbenda u mbaaferev kpaa ga.

¹⁵ Nyagh u, de karen sha u ga; goom sha u, kar kera.

¹⁶ Gadia mba gbe yaven ga, saa ka ve vande eren kwaghbo; mnyam vem kpaa mba gbe yaven ga, saa ka ve vande nan or gbev kpee.

¹⁷ Gadia ka kwaghyan u ifer ve ye ye, mba me wain u aperagh.

¹⁸ Kpa gbenda u orperapera ngu er iwanger i sha use nahan, ngi seer aseer zan hemen zan zan mkende u iyange sha sha tembe la.

¹⁹ Gbenda u mbaaferev yô, ngu er ime nahan, mba fe kwagh u vea kema nguhar sha mi ga.

²⁰ Wan wam ver ishima sha akaaôron a am; ver ato sha mkaanem am;

²¹ ma de karen we sha ashe kera ga, koso ma ken atô u ishima you.

²² Gadia ma ka uma je hen mba ve zough a ma yô, ma ve iyol ve cii a mkpeyol je.

²³ Hemba kuran ishima you a akaa a u kor a cii, gadia ka ken i uma a dugh ye.

²⁴ Kar a kwaghôron u aiegh her a we kera, zwa u ôron akaadang u̱ lu ca a we.

²⁵ Ashe ou a̱ nenge sha hemen jighilii, akurashee ou kpaa a̱ za nôôn sha ishigh you.

²⁶ Sôr gbenda u angahar a ou u̱ lu vaanaa, man igbenda you cii kpaa i̱ lu taveraa.

²⁷ De kahan ken iyan shin ken imese ga, kar a nguhar wou hen kwaghbo kera.