Anzaakaa 31 - ICIGHAN BIBILO

¹ Akaaôron a Lemuel tor u Masa, a ngô na tese un a la:

² Ka nyi, wan wama? Ka nyi, wan wam u iyav ava? Ka nyi, wan wam u uiceghzwa ava?

³ De vihin agee ou sha ukase ga, de zenden ze hen mba ve timin utor ga.

⁴ Doo u utor, Lemuel, doo u utor ve̱ de maan wain ga, shin u mbatarev kpaa msôrom ma yuwan ma doo ve ga,

⁵ sha er ve̱ de me, tindi a̱ hungul ve, man ve̱ vihi ijir i mba ican i tser ve la ga.

⁶ Na or u nan mgbôghom u saan ishe la msôrom ma taver, man or u ishima i vihi nan yum la yô, na nan wain,

⁷ nana̱ ma, ibanave i nan i̱ hungul nan, nana̱ de kera shi umbur zayol u nan la ga.

⁸ Bugh zwa wou sha u wasen mbakondonaker, man sha u wasen mba ve sôôn u saan ishe yô.

⁹ Bugh zwa wou ôr ijir sha mimi, ôr ijir i mbaatsanev kua mbaibanave sha mimi.

¹⁰ Ka an nana fatyô u zuan a kwase u injaa? Gadia nan hemba asa a mimi inja.

¹¹ Ishima i nom u nan, ka i suur sha a nan, una de zuan a mtser ga.

¹² Kwase la eren a na dedoo, eren un ifer ga, sha ayange a a lu uma la cii.

¹³ Kwase la ker ul kua mou, nan eren tom sha ave a nan sha gbashima.

¹⁴ Nan ngu er utso mba mbakasuav nahan, nan van a kwaghyan u nan ca je.

¹⁵ Nan nderen dindee je, nan nan mbayev mba nan kwaghyan, nan karen mbayevkasev mba ve eren nan tom ci ve.

¹⁶ Nan ver ishima i nan sha sule ugen maa nan yam u je; ka sha mtser u ave a nan je, nan môôr ikon i wain ye.

¹⁷ Nan wa agee iyol, nan taver akaseaveegh a nan.

¹⁸ Nan kav er ikav mbi kasuav mbi nan mbi ve a mtsera yô; imenger i nan i pirin tugh ga.

¹⁹ Ka nan kôr ave a nan sha ijingamou, akevaveegh a nan kpaa a kôr sha igyambe.

²⁰ Ka nan naregh uwegh ku nan hen mbaatsanev, nan naregh ave a nan hen mbaibanave.

²¹ Cie senou sha ci u ior mba hen ya u nan ga, gadia mba hen ya u nan cii, ve haa akondo a nyian dindee.

²² Ka nan er kwagh u nan u haan sha gambe, akondo a nan kpaa a lu a pupuu a kôngor man a nyian dindee.

²³ Nom u nan kpaa i fa un hen ihinda i gar, zum u ka una tema ken atô u mbatarev yô.

²⁴ Ka nan koron uriga sha ikondo i pupuu i kôngor, nan teen; ka nan naan mbakasuav ikange i shin iwenge.

²⁵ Tahav kua icivir ka ikondo i nan je; ka nan seen iyange i i lu van ken hemen la kpaa.

²⁶ Nan bugh zwa u nan sha kwaghfan, ityesen i erdoo kpaa i lu sha nombor u nan.

²⁷ Ka nan nengen sha tom u ken ya u nan dedoo, ye kwaghyan u oruhwe ga.

²⁸ Ônov mba nan ve mough, ve wuese nan ve ver nan doo doo, nom u nan kpaa, wuese nan, a kaa er:

²⁹ Ônkasev kpishi ve er akaa sha inja, kpa we u gema u hemba ve cii.

³⁰ Kumashe ka icugh, dooashe ka gbilinkwagh, kwase u cian TER yô, ka nan á wuese nan ye.

³¹ Na nan sha atam a ave a nan, man ityom i nan i wuese nan hen ihindagar.