Anzaakaa 30 - ICIGHAN BIBILO

¹ Akaaôron a Agur wan u Yake. Kwaghôron u injaa je. Or la kaa er: M er iyol yam m vôr, Aôndo; m er iyol yam m vôr, Aôndo; kwagh nenger mo.

² Mimi, mo m lan kwagh je kuma u me lu or ga, m ngu a mkav er or nahan kpaa ga,

³ m hen kwaghfan kpaa ga, man m ngu a mfe u, u A lu Icighan la kpaa ga.

⁴ Ka an nan undu Sha, shi nan hongo? Ka an nan kusu ahumbe ken ave a nana? Ka an nan kange mngerem ken ikondo i nana? Ka an nan ver akighir a tar ciilii? Iti i nan er nyi, man iti i wan u nan er nyi? aluer wea fa yô.

⁵ Hanma kwaghôron u Aôndo cii ka u wang, Un ka perutya u mba ve lian ken a Na yô.

⁶ De kera seer kwagh sha akaaôron a Na ga, sha er A̱ de yangen we man i̱ kaven er u lu or u aiegh ga.

⁷ M ker akaa her a We ahar tsô, de nyumum a er m lu a kpe ga ne ga:

⁸ Na, akaa a gbilinigh kua mbaaie, ve̱ gba ca a mo; de nem ibanave ga, shin inyaregh kpishi kpaa ga, kosom sha kwaghyan u una kuma sha gbayol wam yô,

⁹ sha er m̱ de idi m̱ nyiman We, m̱ kaan Mer; Ka an nan lu TERE? ga, man shi m̱ de lu oribanave je er me za ii, me gema me ter iti i Aôndo wam gbilin, ga.

¹⁰ De senden wanye ityough a orvesen u nan ga, sha er nana wa u ifan, man á na u ibo kpaa ga yô.

¹¹ Kov ugen ngu u u we ter ve ifan, man shi u kera veren ngô ve doo doo kpa ga yô,

¹² Kov ugen ngu u u lu perapera sha ashe a ve yô, nahan kpaa, i ôô ve hôngor ve kera ga.

¹³ Kov ngu, kpash, imanger i ashe a ve kehe tsô! Akurashee ve nga sha je.

¹⁴ Kov ngu u anyi a ve a lu usanker yô, man anyi a ve a ken azegher kpaa ka ahô je, sha u vea ya mbaatsanev shin tar kera, kua mbaibanave ken ior kpaa yô.

¹⁵ Hiin ngu a ônov mba kasev uhar, ka: Na man Na! Akaa nga atar a a idi mayange ga yô, anyiin je kpaa nga, a a fatyô u kaan er: Kuma ve! mayange ga yô.

¹⁶ Ka Sheol man iyav mbu kwaseikôm, inya i mngerem ma kom i ga, man usu u mayange u kaan er, kuma u je ga yô.

¹⁷ Ishe i i naha ter u i tar, man ii laha u wan ngô u i iko yô, ugugôô mba shin pev vea dugh i, ônov mba gafa kpaa vea ya i.

¹⁸ Akaa nga atar a kpiligh mo iyol je, a gandem, een, nga anyiin je kpaa, a m fe a ga yô:

¹⁹ Ka mpurugh u gafa sha kwavaôndo, mzende u iyô sha vande, mzende u tso ken atô u zegemnger, man shi kwagh u nomsoor a wanyekwase.

²⁰ Kwagh u idyakwase yô, ka ape a lu ne: ka nan ya, nan ese zwa u nan kera, nan kaa er: M er kwaghbo ga.

²¹ Ka sha akaa atar, tar ka u tenger ye, ka anyiin je, a a nenger u yô:

²² sha kpan zum u ka nan hingir tor yô, man ibumeor u ka nana ide kwaghyan yô,

²³ sha kwase u i ker nan ihom zum u nan er nom yô, man kpankwase u nan dugh ngô u nan kera, nan gem nan tem sha ityough ki nan yô.

²⁴ Akaa nga anyiin je, a a ndahar sha won yô, kpa gema nga a kwaghfan kpishi:

²⁵ iyôn ka nongo u taver ga, nahan kpaa ngi kohol kwaghyan u i inyom;

²⁶ akuwa ka nongo u taver je ga, kpa nga eren ya u a ken avande;

²⁷ ikomon ngi a tor ga, nahan kpaa ngi zenden akum akum cii;

²⁸ vendeve yô, u fatyô u kôron un sha ave, nahan kpaa lu ken uya mba utor.

²⁹ Akaa nga atar a a we iceen sha ijende i a yô, een, nga anyiin je kpaa, a a we iceen sha zende:

³⁰ ka begha u a hembe agee ken inyamtoho cii, te ma or gbenda ga;

³¹ nyinyautya man kpev kpaa, man shi tor u a lu a ikum i mbautyav yô.

³² Aluer wea bume sha u kenden iyol you sha, shin aluer wea hen ifer i eren yô, wa uwegh zwa.

³³ Gadia atumba a kunden ka a na ahôm, ihinga i zômon, ka i due awambe, kape ishima i nyoon yum kpaa, i ne num la.