Anzaakaa 3 - ICIGHAN BIBILO

¹ Wan wam, ityesen yam i̱ de hungul we ga, ishima you i̱ waan atindi am iko,

² gadia vea seer we ayange á ngee, man anyom a uma kua bem kpaa.

³ Erdoo man mimi ve̱ de undun we ga, har ve sha mon wou, nger ve sha kpande u ishima you,

⁴ ka nahan man ú zua a mrumun man mkav u dedoo, sha ishigh ki Aôndo kua ki iorov kpaa ye.

⁵ Suur sha TER a ishima you cii, de yier sha mkav wou ga.

⁶ Umbur Un sha ijende you cii, Un kpaa Una kôôm igbenda you.

⁷ De nengen iyol you wer, u ngu orfankwagh ga, cia TER, pav a ifer kpaa;

⁸ kwagh ne una na mkpeyol sha iyol you, man myôhôryol ken akuhe a ou.

⁹ Civir TER sha inyaregh you, man sha iyiav mbi tsutswav mbi u zough a mi cii,

¹⁰ ka nahan man iuna you ia iv kpishi ye, ihungwa you i shoghol atam a wain shimi, ia iv a wain u he je á haa inya.

¹¹ Wan wam de lahan mtsaha u TER ga, ishima i̱ de vihin we sha myange Na kpaa ga;

¹² gadia or u nan doo TER ishima yô, ka nan a tsahan nan ye, er ter, ka nan er a wan u doon nan nahan.

¹³ Saan or u nan zough a kwaghfan la iyol, kua or u nan zough a mkav kpaa,

¹⁴ gadia kasua na hemba doon a u azurfa, mtser na kpaa hemba zenaria u wang.

¹⁵ A hemba urubi ishe, akaa a a sar u la cii, ma kwagh u a kom sha mi ngu ga.

¹⁶ Ayange a ngeen sha won, nga ken uwegh nagh ku yanegh; ken uwegh nagh ku imesegh kpaa, inyaregh ki ker kua icivir kpaa.

¹⁷ Igbenda na ka igbenda i dedoo je, igbenda na cii kpaa ka i bem.

¹⁸ Ngu kon u uma sha ci u mba ve ker sha mi la; or u nan kusu un yô, saan nan iyol.

¹⁹ TER er tar sha kwaghfan; ka sha mkav kpaa A taver Usha ye.

²⁰ Ka sha mfe Na man aiv a mnger a ande sha man Usha kpaa ve hee avure ye.

²¹ Wan wam, de kera deen ve, ve̱ karen hen ashe ou kera ga, waan kwaghfan u mimi iko man m-er u sha inja kpaa,

²² ka nahan man vea hingir uma ken jijingi wou, man kwagh u hweegh sha mon wou kpaa ye.

²³ Nahan ú za sha gbenda wou doo doo, nguhar wou kpaa ua kema kera ga.

²⁴ Shighe u ú yav inya yô, ú cia kwagh ga, mimi je ú yav, ú gba mnyam doo doo.

²⁵ De cie kwagh u cieryol u á va bur a bur la ga, kua mtim u mbaaferev shighe u una va yô,

²⁶ gadia TER Una hingir we ishuur wou, Una kura u angahar i̱ de kombor a ga.

²⁷ De nyum u eren kwagh u dedoo a mba ve kom un la ga, zum u u lu a tahav mbu eren un yô.

²⁸ De kaan a or u wan ndor a we wer: Za, man ú hile, kper tsô me na u, ga—er kwagh la a lu sha ikev you yô.

²⁹ De we kwaghbo ishima a or u wan ndor a we, er nan lu a we doo doo la ga.

³⁰ De gbe eren num a or a ityôikaa ga, ga, aluer nana er u kwaghbo ga yô.

³¹ De tem mlu u ipiraor ga, man shi de tsough ma gbenda u nan kpaa ga.

³² Gadia iferor ka kwagh u ndôhôr TER ishima je, kpa mzough Na yô, ngu a mbaperapera.

³³ Ifan i TER ngi ken ya u mbaaferev, kpa ijiir i mbaperapera yô, ka A ver i dedoo.

³⁴ Mba ve puun akaa yô, ka A puu ve, kpa mba ve hir ayol a ve ijime yô, A zungwen ve mhôônom.

³⁵ Icivir ia lu dyako u mbafankwagh, kpa abumeaior yô, kunya ua kôr a.