Anzaakaa 29 - ICIGHAN BIBILO

¹ Or u i kôôm nan gbem kpa nan nembe ikôr her yô, á sombo nan fese, mwar á kera lu ga.

² Zum u mbaperapera ka vea seer yô, ior ve ember kpa zum u iferor ka nana tema tor yô, ior ve shir asema.

³ Or u kwaghfan a doo nan yô, ka nan na ter u nan iember, kpa u nan tem imôngo a mbaagbaga yô, nan vihin inyaregh ki nan dang.

⁴ Tor yô, ka sha ieren i mimi ka a sôr tar ye, kpa u nan ngohol kwagh sha apera yô, ka nan vihi u.

⁵ Or u nan kpamegh or wan ndor a nan yô, nan ngu gbihin nan kwaghhônon shin angahar.

⁶ Sha tindi u peren u iferor yô, kwaghhônon ngu, kpa orperapera yô, ka nan wa icam nan ember.

⁷ Orperapera ka nan wa mbaatsanev iko sha ian i ve lu sha mi, iferor yô, nan ngu a mkav u nana fa nahan ga.

⁸ Ior mba nahan tar ka ve sende ior ityough ken gar, kpa mbafankwagh yô, ka ve gema ve hide a iyugh ijime.

⁹ Aluer orfankwagh nana hendan a ibumeor hen ijir yô, ibumeor nana yôôso dang dang man nana se je nana kera mem ga.

¹⁰ Mba i doo ve u haan awambe inya yô, mba ker ormimi ihom, mba keren uma u mbaperapera kpaa.

¹¹ Ibumeor ka nan pase ishimanyoon i nan cii, kpa orfankwagh yô, ka nan kighir i, i mem.

¹² Aluer ortaregh ver ato u ungwan aie yô, mbatomov nav cii vea hingir mbaaferev.

¹³ Icanor man ipiraor ka ve zua, TER na ashe ve iwanger ve uhar cii.

¹⁴ Tor u nan er ijir i mbaatsanev sha mimi yô, ikônough nagh ki torough kia lu taveraa gbem.

¹⁵ Kwagh man tsaha mba ne kwaghfan, kpa wanye u i gbe den nan tsô yô, nana na ngô u nan kunya.

¹⁶ Shighe u mbaaferev ka vea seer yô, atindi a peren kpaa a seer, kpa mbaperapera vea kenger mgbe ve.

¹⁷ Tsaha wan wou, tsô nana na u mmem ken ishima, een, nana na u iember ken ishima.

¹⁸ Henpe mpase a lu ga yô, ior ka ve ar ave, kpa or u nan we atindi iko yô, á saan nan iyol.

¹⁹ Kpan ongo mkôôm u sha kwaghôron ga, gadia shin nana kav je kpaa, nana wa iko ga.

²⁰ U nenge or u ôron kwagh gagh kpa? Yô, guda ibumeor a nan.

²¹ Or u nan yese kpan u nan legh legh er a lu iyev la je yô, una hingir wan u nan ken masetyô.

²² Or u nyoon ishima fefa, nan ne num; or u yuwen di kpaa nan peren atindi kpishi.

²³ Mgengeseyol u or una hile a nan ijime, kpa u nan hidi a iyol i nan ijime yô, nana zua a icivir.

²⁴ Hanma or u nan nyer nongo a ormbaiv yô, ka uma u nan je nan ker un ihom ye, ka nan ungwa mbum, kpa nan bugh zwa ga.

²⁵ Mcie u cian or ka a va a kwaghhônon, kpa or u nan suur sha TER yô, nana tema doo doo.

²⁶ Ior kpishi mba nenge u doon a ortaregh, kpa ijir i or yô, ka hen TER i dugh ye.

²⁷ Or u nan lu a mimi ga yô, nan ngu mbaperapera kwagh u ndôhôrshima, or u nan zenden jighilaa di kpaa nan ngu aferaior kwagh u ndôhôrshima.