Anzaakaa 28 - ICIGHAN BIBILO

¹ Mbaaferev ka ve gba yevese tsô, ma or kpaa nan zendan ve ityô ga, kpa mbaperapera yô, ka ve lu a ishima i tiaver er begha nahan.

² Ka sha ci u kwaghbo u a lu hen tar la, man utor ka ve ngee ken u kpishi nahan ye, kpa sha ior mba ve lu a mkav kua mfe yô, ua lu her taveraa zan zan je.

³ Icanor u nan kighir mbaatsanev yô, nan ngu er ura u kuwan akaa kera, undun kwaghyan her ga nahan.

⁴ Mba ve undu tindi yô, ka ve civir mbaaferev, kpa mba ve we tindi iko yô, ka ve ta num sha a ve.

⁵ Aferaior nga kaven ijir i mimi ga, kpa mba ve keren TER yô, mba kaven akaa cii.

⁶ Guda icanor u nan zenden ken mimi u nan la, a or u nzughul igbenda i nan, shin nana lu ornyar je kpaa.

⁷ Or u nan we tindi iko yô, ka wan u fan kwagh je, kpa or u nan lu ijende i mbavihin inyaregh dang dang, nan ngu nan ter u nan kunya.

⁸ Or nan seer kwagh u nan sha u ngohol mngerem kua mtsera kpaa yô, nan ngu kohol kwagh sha ci u or u zungwen mbaatsanev mhôônom.

⁹ Or u nan gem togh ku nan kera sha u nana ungwa tindi ga yô, msen u nan je kpaa, ka kwagh u ndôhôrshima.

¹⁰ Or u nan er mbaperapera sha u ve̱ kaha ve̱ za sha gbenda u bo yô, nan iyol i nan je nana gba shin ihungwa i nan, kpa mbamimi yô, vea ya dyako u dedoo.

¹¹ Ornyar ka nan lu a kwaghfan sha mnenge u nan, kpa icanor u nan lu a mkav yô, ka nan time nan fa kwagh u nan doo doo.

¹² Zum u mbaperapera ve hembe yô, icivir ka i lu kpishi, kpa zum u mbaaferev ve zough a tahav yô, ior ka ve yer kera.

¹³ Or u nan cir akaabo a nan yô, nana zua a iveren ga, kpa u nan pase a, shi nan undu a yô, nana zua a mhôônom ma zungwen.

¹⁴ Á saan or u nan cie TER gbem la iyol, kpa u nan cighir ishima i nan yô, nan gba ken kwaghbo.

¹⁵ Er begha u tan kume man er dwem u zenden ikôr nahan, kape iferor u teman tor sha ior mbaibanave nan lu la.

¹⁶ Ititor i i lu a mkav ga yô, ka zegeipiraor kpaa, kpa or u nan vende mtsera u bo yô, ayange a na aa seer sha won.

¹⁷ Or u ike i awambe a orgen i ker nan yô, nana̱ yevese nana̱ yem shin uwar je kpaa, ma or nana̱ de yangen nan ga.

¹⁸ Hanma or u nan zenden sha mimi yô, á yima nan, kpa or u nan nzughul igbenda i nan yô, nana gba fese je.

¹⁹ Or u nan kaha sule u nan yô, nana lu a kwaghyan kpishi, kpa or u nan zenden sha agbilinakaa yô, ibanave ia tser nan.

²⁰ Or u jighjigh nana mgbough a iveren, kpa or u i kumbur nan iyol u hingir ornyar yô, nana de zuan a mtsaha ga.

²¹ U tan ken or sha dooshima yô, doo ga; gadia sha u zuan a ankwaghyan je kpaa, or ka nan per tindi.

²² Or u nan we bo yô, nan kumbur sha u hingir ornyar, nan kera fa ase er ibanave ia va tser nan ga.

²³ Or u nan kôôm or yô, ken masetyô á hemba rumun nan, a or u nan er kwagh sha zwa u nyohon la.

²⁴ Or u nan ngohol ter shin ngô u nan kwagh sha apera man nan kaa er: Kwagh ne ka kwaghbo ga yô, or shon nan ngu kwagh môm a or u timin ior je.

²⁵ Or u nan lu a ishima i yan mtsera yum yô, ka nan naan num, kpa or u nan suur sha TER yô, á kpe nan iyol.

²⁶ Or u nan suur sha ishima i nan iyol i nan yô, ka ibumeor je, kpa or u nan zenden sha kwaghfan yô, á yima nan.

²⁷ Or u nan ne mbaatsanev kwagh yô, kwagh á ban nan ga, kpa or u nan gem ashe a nan kera yô, á wa nan ifan kpishi.

²⁸ Zum u mbaaferev ka vea za hemen yô, ior ve yer kera, kpa zum u ka vea saa ishe yô, mbaperapera ve seer a seer.