Anzaakaa 26 - ICIGHAN BIBILO

¹ Er senou u sha wangernyom man er ura u sha shighe u sunda u lu nahan, kape icivir i kom ibumeor ga la.

² Er atsator a zenden daa daa man er gbargbar di a purugh sha nahan, kape ifan i lun a ityôikaa ga, i ker ga la.

³ Akpa sha ci u nyinya, lagema sha ci u jaki, kwagir di sha ci u ijime i abumeaior.

⁴ De geman nan ibumeor imo sha inja i lanegh ku nan ga, sha er we kpaa ú hingir er un nahan ga yô.

⁵ Na ibumeor imo sha inja i lanegh ku nan, sha er nana̱ de luun orfankwagh sha mnenge u nan ga yô.

⁶ Or u nan tindin a loho sha ikev i ibumeor yô, nan ngu tôndon angahar a nan iyol i nan kera, shi nan ngu man kwaghbo.

⁷ Angahar a orsombon ka a zungur gbiva gbiva, kape kwaghôron u sha inja a lu ken zwa u abumeaior la.

⁸ Er or nan kange iwen ken mzu nahan, kape or u nan civir ibumeor nan lu la.

⁹ Er saa ka a kuma or u hunden msôrom sha uwe nahan, kape kwaghôron u sha inja a lu ken zwa u abumeaior la.

¹⁰ Er orkerenivaan ka nan vihi ior iyol wue wue nahan, kape or u nan er tôndo a ibume or man u nan er tôndo a mba karen a kar hen gbenda nan lu la.

¹¹ Er iwa ka i hide hen isho i i nahan, kape ibumeor u nan hir sha lanegh ku nan kpaa, nan lu la.

¹² U nenge or u nan lu a kwaghfan sha mnenge u nan iyol i nana? Yô, guda ibumeor a nan.

¹³ Oruhwe ka nan kaa er: Begha ngu sha gbenda, begha ngu zenden sha akômaigbinda.

¹⁴ Er hunda ka u zômon sha ukokombo mba u nahan, kape oruhwe kpaa, ka nan zômon iyol sha gambe u nan la.

¹⁵ Oruhwe ka nan za uwegh shin ijôndo, hwev mbu haa nan iyol u dughun zan a mi sha zwa.

¹⁶ Oruhwe sha mnenge u nan yô, nan hemba fan kwagh a ior utaankaruhar mba ve fe u nan mrumun sha mpin jighilii yô.

¹⁷ Or u ishima i vihi nan sha num u u lu u nan ga yô, nan ngu er or u nan ker iwa i i lu karen sha ato a i nahan.

¹⁸ Er orihundu u ka nan ker ityôndousu kua avaan a kuugh nahan,

¹⁹ kape or u nan tsugh or u wan ndor a nan, nan lu la, man nan gem nan kaan er: Ka asenge tsô m eren ye gaa?

²⁰ Ikon ia lu ga yô, usu ua pir, henpe orangeregh nan lu ga yô, num kpaa ka u mem.

²¹ Er akausu ka a enger man er kon u yeghen usu nahan, kape orayongo nan lu sha u hiin iyongo la.

²² Akaaôron a orangeregh nga er kwaghyan u nyohon nahan, ka a sen a nyôr shin ajiir a shin atô je.

²³ Zwa u fan kwaghôron man ishima i bo, bee er ka ikagh ki i maa sha inya i cir ki azurfa iyol nahan.

²⁴ Or u kôron ior ihom, ka nan tsugh ior sha zwa u nan, kpa ker atô u nan yô, nan koso icugh ker;

²⁵ aluer nana ôron kwagh sha zwa u dedoo kpaa, de ne nan jighjigh ga, gadia akaa a ndôhôrshima nga nan ken ishima ataankarahar;

²⁶ shin er nan cir ihom i nan sha icugh nahan kpaa ifer i nan ia due ken igbar sha ishigh ki mkohol u ior.

²⁷ Hanma or u nan tim ihungwa yô, nana gba shimi, man u nan menger iwen kpaa, ia hile sha a nan.

²⁸ Nombor u ôron aie ngu ker mba u nzughul a ve la ihom; man zwa u nyohon kpaa ngu ne mtim.