Anzaakaa 25 - ICIGHAN BIBILO

¹ Angan kpaa ka anzaakaa a Solomon, a ior mba Hesekia, tor u Yuda, ve kura a yô:

² Icivir i Aôndo yô, ka u cirin kwagh, kpa icivir i utor yô, ka u timen kwagh.

³ Mgbeca u Usha, man mze u tar, kua ishima i utor, gande u tôvon.

⁴ Kura hugh u azurfa kera, tsô ikagh kia due orvareniwa ker;

⁵ kar a mbaaferev sha ishigh ki tor kera, ikônough nagh ki torough kia taver sha perapera.

⁶ De tesen mkom wou sha ishigh ki tor ga, man de til sha ijiir i mbavesen kpaa ga.

⁷ Gadia guda u i̱ kaa a we er: Kôndo sha ijiir ne, a u i̱ hile a we ijime sha ishigh ki shagbaor, u ashe ou a nenge a na la.

⁸ De dugh fefa sha u za eren num ga; gayô, ken masetyô yô, ú va er nana, zum u or u nan we ndor a we nana va u ahenge yôô?

⁹ Kure kwagh wou vea or u nan we ndor a we la, kpa de pasen kwaghmyer u orgen ga,

¹⁰ sha er or u nan ongo yô, nana̱ de toho u ga, man gwa wou u bo kpaa u̱ de lu zan zan ga.

¹¹ Kwaghôron u sha shighe vough yô, ngu er atam a ikon a zenaria a i we a shin agbande a azurfa nahan.

¹² Er kunya u zenaria u ken to, man kwagh u hweegh u zenaria u wang a lu nahan, kape or u yangen kwagh sha kwaghfan nan lu hen togh ku ungwan ikaan la.

¹³ Er mndôhôr u senou sha shighe u sunda a lu nahan, kape ortyom u jighjigh nan lu hen mba ve tindi nan la; gadia ka nan na i yôhôl uma u ter u nan iyol.

¹⁴ Er abeen man ahumbe a lun a ura ga a lu nahan, kape or u nan manger er nana na iwua kpa nan ne ga nan lu la.

¹⁵ Ka sha ishima i wan ngegh i hembe ortaregh ye; nombor u legh legh kpaa ka u sombo kuhe.

¹⁶ U zua a iyougho? Ya i er ia kuma u yô, sha er a due u ishima, ú gema ú sua i kera, ga yô.

¹⁷ Nguhar wou u̱ de kumbur hen ya u or u nan we ndor a we yum ga; sha er ú due nan ishima nana venda u ga yô.

¹⁸ Or u eren shiada sha or u nan we ndor a nan sha aie yô, nan ngu er gbough ku lun ityough kpogholoo man sanker kua ivaan i horon nahan.

¹⁹ Msuur u sha or u jighjigh ga la, sha iyange i ican yô, ngu er inyigh ki ki tende, man nguhar u u ndivir nahan.

²⁰ Er or u eren riga kera shighe u wuhe u ker yô, man er vineger sha mtse a lu nahan, kape or u wan or u ishima i vihin nan atsam nan lu la.

²¹ Aluer ijen ia kôr orihom wou yô, na nan kwaghyan nana̱ ya, man aluer imura ia kôr nan kpaa na nan mngerem nana̱ ma;

²² gadia nahan yô, ú haa nan akausu a enger sha ityou je ve, TER kpaa Una na u injar.

²³ Ahumbe a ken imbusutarimese ka a va a ura, kape nombor u angeregh kpaa u ve a ishigh ki yuwen la.

²⁴ Guda u teman ken iniuugh ki iyoughough sha uha, a u teman a kwase u lun iyongo ken ya u ior ve ngee ker yô.

²⁵ Er mngerem ma ndôhôr ma lu hen or u nan ver nahan, kape loho u dedoo u ken tar u icaa u lu la.

²⁶ Er ijôr i hundun man imbormnger i i hôngor a i yô, i lu nahan, kape orperapera u mbaaferev ve hembe nan, nan lu la.

²⁷ Iyough i yan kpishi doo ga, kpa u timen sha akaavesen yô, ka kwagh u icivirigh.

²⁸ Er gar u i hembe un man a lu a gir ga nahan, kape or u nan ker iyol i nan tsaha ga nan lu la.