Anzaakaa 24 - ICIGHAN BIBILO

¹ De tem kwagh u iferor ga, i̱ de hangen we u teman a ve imôngo kpaa ga;

² gadia ishima ve henen ipila, zwa ve kpaa ngu er kwagh u vihin.

³ Ka sha kwaghfan i maa ya ye, shi ka sha mkav kpaa i taver un ye;

⁴ ka sha mfe kpaa i ivin ayou sha akaa a injaa kua a dedoo kpaa ye.

⁵ Orfankwagh ka nan taver tsô, or u lun a mfe kpaa ka nan seer agee.

⁶ Gadia ka sha mhen u sha mfe man ú nôngo ityav you ye, man sha mhen u mbawasen mhen imôngo yô, mwar ngu.

⁷ Kwaghfan tav mimi, a hemba ibumeor, nan bughun zwa hen hundagar ga.

⁸ Or u nan veren ishima sha u eren ifer yô, ior vea yila nan er, oratsereghegh.

⁹ Mhen u ibume ka kwaghbo je, man ornahantar ka kwagh u ndôhôr ishima je.

¹⁰ Aluer ú gba uwer sha iyange i ican yô, agee ou vese ga.

¹¹ Yima mba i lu yemen a ve ken ku la, man mba ve lu zan ze ze ze hen ijiir i sôngon la kpaa, kôr ve hide a mi!

¹² Aluer ú kaa wer: Nenge, lu se fa kwagh ne ga, Un u a karen asema, Una kav kwagh la gaa? Man Un u A kor uma wou kpaa, Una fa gaa? Man Una na hanma or sha ieren i nan kpaa gaa?

¹³ Wan wam, ya iyough gadia i dio, zaryoughough kpaa, u̱ nyoho u ken zwa;

¹⁴ nahan fa, kape kwaghfan kpaa a lu ken uma wou la, aluer wea zua a mi yô, injar ia lu ken hemen, man ishimaverenkeghen you kpaa á bunde i ga.

¹⁵ We orifer ne, de gbe mee sha ya u orperapera ga, man shi de vihin ijiir na i teman kpaa ga.

¹⁶ Gadia orperapera ka nan gba kwa taankaruhar kpa nan mough, kpa iferor yô, ka nan gba ken bocan.

¹⁷ Zum u orihom wou nan gbe yô, de ember ga, zum u nana nôngo gbev kpaa, ishima you i̱ de ember ga,

¹⁸ sha er TER A̱ de nengen, i̱ vihin Un, man A̱ gema A̱ kar a iyugh Na sha a nan kera ga.

¹⁹ Ishima i̱ de vihin we sha ci u mbaerenafer ga, de tem kwagh u mbaaferev kpaa ga;

²⁰ gadia iferor nan ngu a injar ken hemen ga, imenger i iferor kpaa ia pir.

²¹ Wan wam, cia TER kua tor kpaa; de nyer nongo a ior mba moughon ayongo ga,

²² gadia bocan una mough a ve fese, mkur u anyom a ve yô, ka an nan fe unu?

²³ Angan kpaa ka akaaôron a mbafankwagh je. U tan ken or sha dooshima sha ijir yô, doo ga.

²⁴ Or u nan kaa a iferor er: U ngu a ishô yô, ior vea tuhwa nan, akuraior kpaa aa wa nan ifan,

²⁵ Kpa mba ve tsaha nan yô, vea lu dedoo, iveren i dedoo kpaa ia sen sha a ve.

²⁶ Or u nan kaa imo vough yô, ka or u susen orgen zwa je.

²⁷ Sôr tom wou ken won, sôr akaa ken sule wou wanger wanger, ken masetyô yô, maa ya wou.

²⁸ De luun orshiada sha or u wan ndor a we a ityôikaa ga ze, shin ú er aie sha zwa wouee?

²⁹ De kaan wer: Me er a na er a er a mo nahan, me ov or shon iyev, ga.

³⁰ M kar hen sule u oruhwe, man hen sule u ikon i wain i orkavenkwagh ga;

³¹ nenge, usaa mende ken u, mgbough cii, ijiir la cii, usagher cir sha mi, igyar i awen i u kpaa yôhôl kera.

³² Tsô m kenger, m ver ishima, m nenge, m zua a ityesen:

³³ mnyam mase shin kpeghee, shi mnyam ma meer kpuaa, man shi ave a wan ikum kpeghee sha u memen,

³⁴ ka nahan ibanave you ia bur u er ka ornumungbenda nahan ye, man mban u akaa ou kpaa er orutya nahan.