Anzaakaa 22 - ICIGHAN BIBILO

¹ Iti i doon yô, ka kwagh u tsuwan je, hemba inyaregh ki ngeen, erdoo kpaa hemba azurfa kua zenaria.

² Ornyar kua icanor ka ve zua, ka TER A gbe ve cii ye.

³ Orfankwagh ka nan nenge a kwaghbo, nan yer, kpa mbalanenkwagh yô, ka ve kar, ve za ya ican.

⁴ Injar i mhir u iyol ijime, cian TER yô, ka inyaregh man icivir kua uma je.

⁵ Usaa man akaahônon nga sha gbenda u udangmbaiorov, or u nan kor uma u nan yô, nana palegh ve.

⁶ Tese wanye gbenda u nana za yô, nahan shighe u nana bee iyol je kpaa, nana pav a u ga.

⁷ Mbanyarev ka ve tema tor sha mbaatsanev, man or u yan injô yô, ka kpan u or u nan injô, la.

⁸ Or u nan lee ifer yô, nana sunda bocan, man gbough ku iyugh i nan la, kua saa ishe.

⁹ Or u nan lu a ishe i zungwen mhôônom yô, nana zua a iveren, gadia nan pande kwaghyan u nan, nan na mbaatsanev.

¹⁰ Zenda orpuunakaa kera, tsô num kpaa ua yem, iyongo kua ilyahan kpaa vea bee.

¹¹ Or u ishima i wang i doo nan yô, u nan lu a kwaghôron u doon ken zwa u nan la, tor una hingir huror u nan.

¹² Ashe a TER nga kor mfe, kpa ka A bunde akaaôron a oratseregh la kera.

¹³ Oruhwe ka nan kaa er: Begha ngu ken won! á va wuam sha igbudu je!

¹⁴ Zwa u kasev mba u fe ve ga la, ka ihungwa i zan je, or u ishima i vihi TER a nan la, nana gba shimi.

¹⁵ Lanegh kange wanye ken ishima, kpa kwagir u tsahan a mi ua zenda ku, ua gbihi ica a nan.

¹⁶ Or u nan kighir icanor nan ngu nan sha u nana zua a kwagh, man u nan ne ornyar kwagh yô, nan ngu geman nan nan hingir oribanave.

¹⁷ Kegh ato, ungwa akaaôron a mbafankwagh, ver ishima sha mfe wam.

¹⁸ Gadia aluer ú kura a ken ishima you yô, ka kwagh u doon je, aluer aa lu sha zwa wou gbem yô.

¹⁹ Sha er msuur wou una lu sha TER yô, ka nahan man m tese u a nyian ye, een, ka we je,

²⁰ mnger u anzaakaa a sha inja, a sha mbamhen kua mfe,

²¹ sha er me na u, ú fa mimi u akaaôron a a kom u veren ishima sha mi yô, man ú hide a akaaôron a mimi hen mba ve tindi u la gaa?

²² De ngohol icanor kwagh ga, gadia ngu icanor je, man shi de kighir mbaatsanev hen hundagar ga,

²³ gadia TER Una ôr kwagh ve, man Una vihi uma u mba ve nzughul a ve la kera.

²⁴ De ye ikar a or u yuwen fefa ga, man shi de zenden a or u nyoon ishima ga,

²⁵ sha er ú hen igbenda i nan ga, man ú er uma wou kwaghhônon ga yô.

²⁶ De luun ken mba ve ngohol uwegh la ga, ka mba ve hingir ishuur u mbayananzô la.

²⁷ Aluer u ngu a kwagh u kimbin a mi ga yô, ka sha ci u nyi man á ngohol we gambe sha ikevee?

²⁸ De kper a ikav i ipaventar i tse i uter ou ve tim la ga.

²⁹ Aluer u nenge a or u fan tom u nan dedoo yô, nana tile sha ishigh ki utor je, nana tile sha ishigh ki upeepee-mbaiorov ga.