Anzaakaa 21 - ICIGHAN BIBILO

¹ Ishima i tor ngi sha ikev i TER er uikuwanmbamngerev nahan, ka A gema i henpe i sar Un cii.

² Hanma gbenda u or ngu vough sha ashe a nan, kpa TER yô, karen asema.

³ U eren perapera kua mimi, hemba doon TER a nagh ku nan.

⁴ U kenger sha ilyahan kua ishima i imangeregh, iwanger i mbaaferev la, ka isholibo je.

⁵ Mbamhen mba ortseenshima, ka sha u kwagh ma a ngee yô, kpa hanma or u nan tolough kwagh yum yô, ka ken ibanave nan lu zan ye.

⁶ Inyaregh ki zuan a mi sha nombor u aiegh yô, ka tulugh u samben kera fefa, ka akaahônon a kuugh.

⁷ Ipila i mbaaferev la, ia kura ve kera, gayô ve venda u eren kwagh sha mimi.

⁸ Gbenda u or u nan lu a ibo iyol yô, u hule tsô, kpa or u wang yô, ieren i nan ngi jighilii je.

⁹ Guda u teman ken iniuugh ki iyoughough sha uha, a u teman a kwase u iyongo ken ya u ior ve ngee ker yô.

¹⁰ Ishima i iferor yô, ka i lu a isharen sha ifer, or u nan we ndor a na la, doo un a nan ga.

¹¹ Zum u ka a tsaha orpuunakaa yô, orlanenkwagh nan hen kwaghfan, zum u ka a tese orfankwagh yô, nan ngohol mfe.

¹² U a lu u perapera la, ka A kenger ya u mbaaferev, A gbihi mbaaferev ken kwaghbo.

¹³ Or u nan cir ato a nan sha u nana ungwan mliam ma icanor ga yô, nan kpaa nana vaa, kpa á ungwa nan her ga.

¹⁴ Iwua i ken iuv ka pever iyugh, man iwua i ken myer kpaa, i surun ishima i vihin i tsung la.

¹⁵ U eren mimi, ka orperapera kwagh u iember je, kpa mbaerenafer yô, kondo ve iyol.

¹⁶ Or u nan undu gbenda u mkav yô, nana za mem henpe ujijingi mba mbakpenev ve kohol yô.

¹⁷ Or u ugurgurmbaakaav ve maa nan iyol yô, nana hingir icanor je, or u wain kua mkurem ve doo nan yô, nana lu ornyar ga.

¹⁸ Orifer ka ipaa i orperapera, man, orcugh kpaa ngu sha ityough ki mbamimi.

¹⁹ Guda u teman ken taaikôngo, a u teman a kwase u iyongo kua u wan tswam.

²⁰ Inyaregh ki injaagh ki ken ya u orfankwagh kua mkurem kpaa, kpa ibumeor yô, ka a gema a vihi ki kera cii.

²¹ Or u nan dondon sha perapera kua erdoo yô, nana zua a uma nan, perapera kua icivir.

²² Orfankwagh ka nan unde gar u mbaageev, nan yôhôl garutya u ve suur sha mi la.

²³ Or u nan kor zwa u nan kua nombor u nan yô, nan ngu kuran uma u nan er a̱ war ican.

²⁴ Or u gengese iyol man or u iceenegh iti i nan yô, ka orpuunakaa je, ka sha imanger i iyolgengese i nan nan eren kwagh ye.

²⁵ Isharen i oruhwe ngi i wua nan, gadia ave a nan nga nyaghen tom.

²⁶ Or ngu u ka nan shi tômon kwagh didi, kpa orperapera yô, ka nan na, nan nyume ga.

²⁷ Nagh ku iferor ka kwagh u ndôhôrshima je, man hile aluer nana va a mi sha mhen u boo?

²⁸ Orshiada u aiegh nana saa ishe, kpa u nan ongo kwagh yô, nana ôr kwagh zan zan.

²⁹ Iferor ka nan lu sha ishi nendaa, kpa orperapera yô, ka nan kôôm igbenda i nan dedoo.

³⁰ Ma mfe shin mkav shin mhen u hendan a TER, ngu je ga.

³¹ Ka i sôr nyinya iyol sha ci u iyange i utya; kpa mhembe yô, ka hen TER a lu ye.