Anzaakaa 20 - ICIGHAN BIBILO

¹ Wain ka orpuunakaa, msôrom ma yuwan kpaa ka orayôôso; hanma or u nan hundu ma yô, ka orfankwagh ga.

² Mcieryol u tor ngu er kume u gumbegha yô, or u nan bam iyugh na yô, nan ngu eren uma u nan kwaghbo.

³ Or u nan palegh num yô, ka kwagh u icivirigh je, kpa hanma ibumeor yô, nan ngu keren num.

⁴ Oruhwe venda u kahan sule sha wangernyom, nahan nana ker kwaghyan fam shio.

⁵ Mhen u ken ishima i or ngu er mngerem ma zan yô; kpa or u nan lu a mkav yô, nan kese ma.

⁶ Ior kpishi mba pasen erdoo ve ken igbar; kpa or u jighjigh yô, ka an nana zua a mini?

⁷ Orperapera u nan zenden ken mimi u nan yô, ônov mba nan mba ken ijime kpaa á saan ve iyol!

⁸ Tor u a tem sha kwavjirigh yô, ka a peer ifer kera cii sha ashe na je.

⁹ Ka anti nana fatyô u kaan er, m wanger ishima yam, m ngu wang, i wanger isholibo yam kera?

¹⁰ Uikaren mba myoho anza ahar man ikav mbi karen kwagh a mi anza ahar, ve uhar cii ka kwagh u ndôhôr TER ishima je.

¹¹ Wanye kpaa ka nan pase iyol i nan sha aeren a nan je, shin aeren a nan a lu wang man vough kpaa.

¹² Togh ku ungwan kua ishe i nengen, ve uhar cii ka TER A er ve ye.

¹³ Mnyam ma de doon we ishima ga, sha er ú gba ican ga yô, bugh ashe ou, ka nahan man ú lu a kwaghyan á kuma u gbing ye.

¹⁴ Ka kwagh u injaa ga, ka kwagh u injaa ga, kape oryamen nan kaa la, kpa zum u ka nana yem kera yô, nan gba za tan ihagh.

¹⁵ Zenaria ngu, asa a injaa kpaa ngee, kpa zwa u lun a mfe yô, ka isha i taver ishe je.

¹⁶ Ngohol ikondo i or u nan hingir ishuur sha ci u orvanava la, kôr un a̱ lu ityungu sha ci u mbavanava.

¹⁷ Ruam u icugh nyoho or tsô; kpa ken masetyô yô, zwa u nan ua iv a agboghol.

¹⁸ Hanma awashima ka a taver sha mhen, man ka sha mfe u mimi ú nôngo ityav ye.

¹⁹ Or u nan zenden anger yô, ka nan pasen akaamyer, nahan yô, de nyer nongo a or u lamen yum ga.

²⁰ Or u nana tuhwa ter u nan, shin ngô, u nan yô, á pir imenger i nan ken angôghime.

²¹ Dyako u i ye fefa sha hiihii la, mkur na yô, una lu a iveren ga.

²² De kaan wer, me or iyev sha ifer, ga! Kegh TER, tsô Una yima u.

²³ Uikaren mba myoho anza ahar, ka kwagh u ndôhôr TER ishima, iyôgh ki karen kwagh a mi sha icugh kpaa ki doo ga.

²⁴ A-avenangahar a or cii, ka hen TER a lu ye, nahan á er nan man or nana fatyô u kaven gbenda u nana?

²⁵ Ka kwagh u hônon or, aluer nana ôr kwagh gagh er: Ka icighankwagh, man nana mase henen, er nan tende zwa kera la.

²⁶ Tor u fan kwagh ka a peer mbaaferev, a gema a va a ikaver u ikyekye i gbiren iyiav i va ningir sha a ve.

²⁷ Jijingi u or ka imenger i TER je, tev ajiir a ken atô u or.

²⁸ Erdoo kua mimi mba kor tor, nan suwe ikônough ki torough ki nan sha erdoo.

²⁹ Icivir i ikaior ka agee a ve je, hwe u mbabeenyol yô, ka ivu.

³⁰ Agbir a akpa ka a wanger ifer, man gbidiv kpaa, ka mbu ar ken ajiir a ken atô u or.