Anzaakaa 19 - ICIGHAN BIBILO

¹ Guda icanor u nan zenden ken mimi u nan la, a or u nan er akaadang sha zwa man nan lu ibumeor la.

² U lun a gbashima man mfe lun ga yô, doo ga, or u nan zenden fefa sha angahar a nan yô, ka nan kar kpe.

³ Ibumegh ki orough ka ki vihi nan gbenda, ishima i nan kpaa i hingir iyongo a TER.

⁴ Inyaregh ki seer a seer akar kpishi, kpa icanor yô, ka i pav nan a ikar u nan je.

⁵ Orshiada u aiegh nan wer mtsaha ga, or u eren aie kpaa nana war ga.

⁶ Ior kpishi mba keren u i doo shagbaor a ve yô; hanma or nan ngu ikar a or u nan ne iwua yô.

⁷ Anmgbianev mba icanor cii, mba ker nan ihom, man hile akar a nan, á undu nan, á gba ca a nan ga yee? ka nan dondo a ijime a kwaghôron, kpa a yem kera.

⁸ Or u nan zough a mfe yô, uma u nan doo nan ishima; or u nan we mkav iko yô, nana zua a kwaghdoon.

⁹ Orshiada u aiegh nan war mtsaha ga, or u ôron kwagh sha aie kpaa nana tim.

¹⁰ U ngeen a inyaregh kpishi kuma ibumeor ga, man hile kpan ngun una lu a tahav sha mbatarev yee?

¹¹ Kwaghfan u or ka a na nan yuwen fefa ga, u den or kwaghbo, ka nan kwagh u icivirigh je.

¹² Iyugh i tor ngi er kume u gumbegha yô, kpa iveren na gema ngi er avure sha toho u ndor nahan.

¹³ Wan u lanen kwagh ka mtim u ter u nan; ayongo a kwase kpaa ka mnende u lugh lugh je.

¹⁴ Ya kua inyaregh ka dyako u a dugh hen uter yô, kpa kwase u fan kwagh yô, ka hen TER je nan dugh ye.

¹⁵ Hwev ka mbu na or nan yav kputu, oruhwe kpaa, ijen ia kôr nan.

¹⁶ Or u nan we tindi iko yô, ka uma u nan je nan kor ye, kpa or u nan we aeren a nan iko ga yô, nana kpe.

¹⁷ Or u nan zungu mbaatsanev mhôônom yô, nan pwar TER kwagh je, nahan Un kpaa Una na nan sha ieren i nan i dedoo la.

¹⁸ Tsaha wan wou er ishimaverenkeghen i lu her yô, de veren ishima u wuan un ga.

¹⁹ Or u nyoon ishima yum, nana tôô ibo, gadia aluer u yima un kpaa, ú shi ú va yima un keng.

²⁰ Ver ato sha kwaghwan, rumun ityesen, sha u u̱ hingir orfankwagh sha ayange a ou a ken hemen yô.

²¹ Mbamhen mba kpishi ken ishima i or, kpa awashima u TER yô, ka un una lu taveraa ye.

²² Erdoo u or yô, ka un a doo ior ye; guda icanor a or u eren aie.

²³ Mcie u cian TER ve a uma, or u nan lu a mi yô, nana tema a ishima i yôhôl, kwaghbo una tser nan ga.

²⁴ Oruhwe ka nan za uwegh ku nan shin ijôndo, kpa nan hide a ku sha zwa u nan ga.

²⁵ Gbidye orpuunakaa, tsô orlanenkwagh nana hen u eren kwagh sha inja, yange or u nan lu a mkav, tsô nana seer mfe.

²⁶ Or u nan er a ter u nan dang, man shi nan zende ngô u nan kpaa yô, ka wan u nan kunya man u van a iheen kpaa.

²⁷ Wan wam, mem u ungwan ityesen, aluer wea gbihin akaaôron a mfe la yô.

²⁸ Gbilinor u eren shiada ka nan naha tar sha ijirôron i mimi, zwa u iferor ka u mena icugh.

²⁹ I ver mbapuunior ajir a mtsaha, man shi akpa sha ci u ijime i abumeaior.