Anzaakaa 17 - ICIGHAN BIBILO

¹ Guda ikevruam i yan kagh a bem, a ya u a mgbough a iniongo i yan kpa num u lu ker la.

² Kpan u nan eren tom sha kwaghfan, nana hemba wan u a eren kwagh u kunya la, nana ya kwar u dyako a anmgbianev imôngo.

³ Adum ngu sha ci u sôron azurfa je, man usu u iwaagh kpaa ngu sha ci u zenaria, kpa TER yô, karen asema.

⁴ Iferor nan we zwa u ifer iko, or u aiegh kpaa ka nan ver ato sha nombor u vihin kwagh.

⁵ Or u nan naha icanor tar yô, ka u A gbe un la nan laha ye; or u nan ember sha bocan u or yô, nana de zuan a mtsaha ga.

⁶ Tsar u sha ityou u mbabeenyol ka ônov mba ônov vev; ihagh i uôn ka uter vev je.

⁷ Kwaghôron u sha icivir kuma ibumeor ga, man hile ityumbuzwaagh i aiegh hen shagbaoro!

⁸ Iwua ngi er isha i tiaver ishe nahan ken ashe a or u nan lu a i la, hanpe ka nana gema cii, i kpe nan iyol.

⁹ Or u nan cir ibo yô, ka dooshima je nan keren ye, kpa or u nan saar akaa, nan ngu paven ahuraior a mimi.

¹⁰ Myange hembe nyôron orfankwagh ken ishima, a u gbidyen ibumeor akpa kwa deri.

¹¹ Ka num tseegh iferor nan keren ye, kpa á tindi nan a ipilaortyom.

¹² Guda or á kohol inyamikume i i kor i ônov kera, a u kohol ibumeor a lanegh nagh la.

¹³ Or u nan or iyev i kwagh u dedoo sha ifer yô, ifer ia undu ya u nan mayange ga.

¹⁴ Mhii u num yô, ngu er ka a na mngerem ian ma a ande yô, nahan yô, de anyimanaikaa, je er a lu a hingir num ga la.

¹⁵ Or u nan ne iferor ishô, man or u nan ne orperapera ibo yô, ve uhar cii mba kwagh u ndôhôr TER ishima.

¹⁶ Inja na nan man ibumeor nana lu a inyaregh sha u yamen kwaghfan, er nan lu a mkav ga yôô?

¹⁷ Huror yô, lu a dooshima gbem, man shi i mar anmgbian sha ci u ayange a ican.

¹⁸ Or u nan ban a mkav, ka nan ngohol uwegh, nan hingir ishuur sha ishigh ki or u wan ndor a nan.

¹⁹ Or u num u doo nan yô, ka tindi u peren je a doo nan ye; or u nan maa hunda u ya u nan u tav yô, ka mtim nan keren ye.

²⁰ Or u nan lu a ishima i dang yô, nan zough a kwagh u injaa ga, man u nan lu a nombor u icughugh yô, nan gbe ken ican.

²¹ Or u nan mar ibumeor, nan tser a ishima i vihin, ter u ibumeor kpaa, lu a iember ga.

²² Ishima i saan saan ka icigh ki dedoo, kpa ishima i yinan yô, i om akuhe.

²³ Iferor yô, ka nan ngohol inyaregh ki yamen ishô ken myer, sha u nana za vihi igbenda i ijirigh yô.

²⁴ Kwaghfan ngu sha ashe a or u lun a mkav, kpa ashe a ibumeor yô, nga ken ikighirtar je.

²⁵ Wan u lanen kwagh nan ne ter u nan ishima i vihin, shi nan ne ngô u a mar nan la ishimavihin tsung.

²⁶ Doo u á ya orperapera zwajirigh ga, u gbidyen ashagbaior kpaa, ka sha min ga.

²⁷ Or u nan lam yum ga yô, ka nan lu a mfe, man shi or u nan lu a ishima i dem dem kpaa ka or u kaven kwagh je.

²⁸ Ibumeor je kpaa, zum u ka nana huan ving yô, i wa nan ken mbafankwagh; zum u nana kusu zwa u nan kpaa i nenge nan er nan ngu orkavenkwagh yô.