Anzaakaa 16 - ICIGHAN BIBILO

¹ Mbamhen mba ken ishima ka mba iorov tsô, kpa imo i kaan ken zwa yô, ka hen TER i dugh ye.

² Aeren a or cii nga wang ken ashe a nan, kpa TER yô, karen ujijingi.

³ Wa TER aeren a ou cii sha ikev, yô, mbaawashima ou kpaa vea kure sha mi vough.

⁴ TER gba hanma kwagh sha inja je, een, kua aferaior je kpaa, sha ci u boiyange.

⁵ Hanma or u lun a imanger ken ishima, nan ngu TER kwagh u ndôhôrshima je, mimi je, nana war mtsaha ga.

⁶ Ka sha mhôônom ma zungwen kua mimi i wanger afer kera ye, ka sha mcie u cian TER kpaa, ior ve undun kwaghbo ye.

⁷ Zum u aeren a or ka a doo TER yô, A na mbaihomov mba nan je kpaa, ve lu a nan doo doo.

⁸ Guda u lun a akaa kpeghee a perapera imôngo, a u zuan a akaa kpishi, man mimi geman banen la.

⁹ Ishima i or ka i hen gbenda u nan, kpa ka TER A tesen nan ape ndyaren ye.

¹⁰ Mkurjir u mimi ngu sha zwa u tor, zwa na ngu karen kpe sha ijir ga.

¹¹ Iyôgh ki karen kwagh a min ki mimi ka ki TER je kua ikagh ki karen kwagh a mi kpaa, uikaren mba myoho mba ken ikpa cii, ka tom Na je.

¹² U eren ifer yô, ka kwagh u ndôhôr utor ishima, gadia ka sha perapera ikônough ki torough ki lu taveraa ye.

¹³ Doo utor a zwa u ôron kwagh u perapera, or u nan er kwagh mimi la, ka nan doo ve ishima.

¹⁴ Ishimanyoon i tor ngi er mbatyomov mba kuuv nahan, kpa orfankwagh yô, nana pever i.

¹⁵ Ken iwanger i sha ishigh ki tor, uma ngu, iveren na ngi er ibeenegh ki ura u masetyô yô.

¹⁶ U zuan a kwaghfan hemba doon a zenaria ca je gaa! Een, u zuan a mkav hemba doon a u tsuwan azurfa.

¹⁷ Igbudu u mbaperapera yô, ka u paven a ifer; u nan kor zende u nan yô, ka uma u nan nan kor ye.

¹⁸ Ken ijime i iyolgengese yô, ka mtim, ken ijime i iceen ka mgbe.

¹⁹ Guda u lun icanor ken jijingi a mbaatsanev imôngo, a u karen ishar a mbagengeseyol la.

²⁰ U nan ver ishima sha kwaghôron yô, nan zua a kwaghdoon, man u nan suur sha TER yô, saan nan iyol.

²¹ Mba ve lu a kwaghfan ken ishima yô, á yila ve er, mbaeren kwagh sha mfe, kwaghôron u dedoo u sha zwa kpaa seer ityesen.

²² Mkav ka imbor i uma je, hen u nan lu a mi yô, kpa tsaha u abumeaior yô, ka ibumegh tsô.

²³ Ishima i orfankwagh ka i tesen zwa u nan, man shi i seer zwa u nan ityesen kpaa.

²⁴ Akaaôron a doon nga er ikpayough yô, a nyoho ken uma, ka mkpeyol ken akuhe.

²⁵ Gbenda ugen sha mnenge u or yô, ka u lu vough, kpa mkur u u yô, ka igbenda i kuugh je.

²⁶ Isharen i kwaghyan i ortom ka i wase nan tom, gadia zwa u nan ka u mgbegha nan ityô.

²⁷ Gbilinor henen aferakaa, zwa u nan ngu er usu u hian yô.

²⁸ Iferor nan samber a num, man or u angeregh paven ahuraior.

²⁹ Ipilaor ka nan mee or u wan ndor a nan, nan za a nan sha gbenda u u doo ga yô.

³⁰ Or u nan nyiar ashe yô, nan ngu henen akaa a dang, man u nan nyom tsombo yô, nan ngu eren ifer.

³¹ Ivu ka tsar u sha ityou u icivirigh, mba zuan a i sha gbenda u perapera.

³² Or u nan nyoon ishima fefa ga yô, nan hemba or u ageegh; u nan ker iyol i nan tsaha kpaa, nan hemba or u a ngohol gar sha utya yô.

³³ Ka i er ishol sha ikum, kpa mkur u i cii yô, ngu sha ikev i TER je.