Anzaakaa 15 - ICIGHAN BIBILO

¹ Imo i legh legh ngi bundu ishima i nyoon, kpa kwaghôron u sha ipila yô, kenden a iyugh sha.

² Nombor u mbafankwagh ka u pasen mfe u mimi, kpa zwa u abumeaior yô, ngu hee ibumegh.

³ Ashe a TER nga sha hanma ijiir, nga kor mbavihinkwagh kua mbamimi.

⁴ Nombor u bem ka kon u uma je, kpa u u lu dang la yô, ngu ne ishima i yinan.

⁵ Ibumeor ka nan lahan mkôôm u ter u nan, kpa u nan we iko sha myange yô, ka nan hingir u fan kwagh.

⁶ Ken ya u orperapera kwaghinjaa ngee keregh, kpa ken mtser u iferor yô, kwaghnzughul ngu.

⁷ Ityumbujôôgh i mbafankwagh ngi samber a mfe, kpa ishima i abumeaior yô, ngi vough ga.

⁸ Nagh ku aferaior ka TER kwagh u ndôhôrshima je, kpa msen u mbamimi yô, ka Un kwagh u ember je.

⁹ Gbenda u iferor ka TER kwagh u ndôhôrshima je, kpa or u zan a perapera ityô yô, nan doo Un ishima.

¹⁰ Mtsaha u nyoon ngu sha ci u or u nan undu gbenda yô, or u nan vende myange yô, ka ku nana kpe ye.

¹¹ Sheol kua Abadon mba sha ishigh ki TER atar, man hile asema a ônov mba iorovoo!

¹² Orpuunakaa, doo nan u i̱ yange nan ga, nan rumun u zan hen mbafankwagh kpaa ga.

¹³ Ishima i saan saan i ne ishigh ki saan sha, kpa ishima i vihin yô, i ne ishima i yinan.

¹⁴ Ishima i or u lun a mkav ka i keren mfe, kpa zwa u abumeaior yô, kwaghyan u u ka ibumegh.

¹⁵ Ayange a mbayanican cii, nga nyoon iyol, kpa ishima i saan saan yô, i ye iniongo gbem je.

¹⁶ Guda u lun a akaa kpeghee man cian TER, a inyaregh ki kpishi kua ishimanyian la.

¹⁷ Guda u yan ikyaiue henpe dooshima a lu yô, a u yan icôngonbua a ihom ken asema la.

¹⁸ Or u nyoon ishima yum, nan ne num, kpa or u nan yugh fefa ga yô, nan soughon num.

¹⁹ Gbenda u oruhwe ngu er igyar i saa nahan, kpa gbenda u orperapera yô, ka igbudu.

²⁰ Wan u fan kwagh ka nan na i saan ter u nan iyol; kpa ibumeor yô, ka nan laha ngô u nan.

²¹ Ibumegh ka or u lanenkwagh kwagh u iember je, kpa or u kaven kwagh yô, ka nan kôôm zende u nan jighilaa.

²² Mbaawashima ka ve bunde henpe idyu i teman i lu ga yô, kpa sha iwasen i mbawasenmhen imôngo la, ka ve lu taveraa.

²³ Or ngu a iember sha mrumun u vough u sha zwa u nan, kwaghôron u a gbe sha shighe vough yô, ka a doo tsung!

²⁴ Gbenda u uma kôndo sha, sha ci u orfankwagh, sha u nana̱ war Sheol u shin inya la.

²⁵ TER Una yôhôl ya u ormoronyol kera, kpa Una taver dyako u kwasecôghol.

²⁶ Mbamhen mba aferaior ka TER kwagh u ndôhôrshima je, kpa akaaôron a dedoo yô, nga wang.

²⁷ Or u nan ye mtsera u bo yô, ka nan nzughul a ya u nan, kpa or u nan vende inyaregh ki yamen ishô la yô, nana lu uma.

²⁸ Ishima i orperapera ka i henen imokwagh i ia ôr yô, kpa zwa u iferor ka u haan ubombaakaav.

²⁹ TER ngu ca a aferaior, kpa ongo msen u mbaperapera.

³⁰ Iwanger i ashee ngi ne ishima msaanyol, loho u dedoo kpaa, ngu ne akuhe a kehe.

³¹ Togh ku ku ongo mtsaha u nan uma la yô, kua lu hen atô u mbafankwagh je.

³² Or u nan vende mkôôm yô, nan ngu lahan uma u nan iyol i nan je. Kpa or u nan ver ato sha myange yô, nan zough a mkav.

³³ Mcie u cian TER ngu tesen a tese kwaghfan je, icivir dondo sha mhir u iyol ijime.