Anzaakaa 13 - ICIGHAN BIBILO

¹ Wan u fan kwagh nan rumun ityesen i ter u nan, kpa orpuunakaa nan rumun myange ga.

² Or nana ya tar sha kwagh u injaa u a dugh sha zwa u nan, kpa isharen i mbaatsereghev yô, ka ipila á koso i a mi ye.

³ Or u nan kor zwa u nan yô, ka uma u nan nan kor ye; kpa u nan gbanger zwa u nan yô, nana zua a mtim.

⁴ Uma u oruhwe, kwagh ka a sar un, kpa a zua a kwagh ga, kpa uma u mbatavershima yô, una mgbough a akaa.

⁵ Orperapera ka nan venda aie; kpa iferor ne ihom i kôron kua kunya.

⁶ Perapera ka a kura or u nan ze sha gbenda jighilii yô, kpa ifer yô, ka i zôhô orisholibo.

⁷ Orgen ka nan ver iyol er nan ngu ornyar je, kpa nan lu a kwagh ga; orgen di ka nan ver iyol er nan ngu icanor, kpa nan ngee akaa kpishi.

⁸ Mpaa u uma u or ka inyaregh ki nan je; kpa icanor yô, á cier nan ga.

⁹ Iwanger i orperapera ka i ember, kpa imenger i iferor yô, á pir i.

¹⁰ Iyolgengese ngi ne num tsô; kpa mba ve ngohol mhen u mimi yô, kwaghfan ngu her a ve.

¹¹ Inyaregh ki i gbe zuan a mi gbilin tsô yô, kia hide ijime, kpa or u nan kohol ki sha tom u nan yô, nana seer a seer.

¹² Ishimaverenkeghen i i zough a mi ga yô, ka i na ishima i uren; kpa isharen i ia kure sha mi yô, ka kon u uma je.

¹³ Or u nan laha kwaghôron yô, nana ya ican, kpa u nan cie tindi yô, nana ngohol injar.

¹⁴ Ityesen i orfankwagh yô, ka imbor i uma je, sha u waren akaahônon a kuugh.

¹⁵ Mkav u mimi ve a mkpeyol, kpa gbenda u iferor yô, ka u ican je.

¹⁶ Hanma orfankwagh ka nan er tom u nan sha mfe, kpa ibumeor yô, ka nan samber ibumegh.

¹⁷ Ortyom u ifer ka nan gba ken bo, kpa ortyom u mimi yô, ka or u kpen inja iyol.

¹⁸ Ibanave man iheen ngi hen or u vendan mkôôm, kpa u nan we iko sha myange yô, á civir nan.

¹⁹ Isharen i i kure sha mi yô, ka kwagh u doon uma u or, kpa u paven a ifer yô, ka abumeaior kwagh u ndôhôrshima.

²⁰ Zende a mbafankwagh imôngo, nahan we kpaa ú hingir orfankwagh, kpa ijende i abumeaior yô, ia zua a ican.

²¹ Ifer ka i tôv aferaior ityô; kpa mbaperapera yô, á na ve injar sha kwagh u dedoo.

²² Ormimi ka nan undu dyako sha ci u ônov mba ônov mba nan, kpa inyaregh ki orsholibo yô, i ombo ki sha ci u orperapera.

²³ Kwaghyan ngu ken ishule i he i mbaatsanev, kpa orgen yô, kwagh ka a saa nan ishe sha ci u ieren i nan i mimi ga la.

²⁴ Or u nan ver akpa u nan gir yô, nan kôr wan u nan ihom; kpa u wan u nan a doo nan ishima yô, ka nan tsaha un sha gbashima.

²⁵ Orperapera ka nan ya kwagh i kuma nan, kpa iyav mbu iferor yô, mbua lu ijen.