Anzaakaa 11 - ICIGHAN BIBILO

¹ Iyôgh ki karen kwagh a mi sha icugh ka kwagh u ndôhôr TER ishima je, kpa ikaren u myoho u mimi yô, ka Un kwagh u ember je.

² Zum u iyolgengese ia va yô, kunya di kpaa ua due je, kpa kwaghfan ngu hen mbahiden a iyol ijime la.

³ Mimi u mbaperapera una hemen ve, kpa dang u mbaatsereghev yô, una tim ve.

⁴ Inyaregh ki lu a inja sha iyange i ishima i vihin la ga, kpa perapera yô, ka a yima ken ku.

⁵ Perapera u ormimi una kôôm nan gbenda, kpa iferor nan gba sha ifer i nan je.

⁶ Perapera u mbaperapera una war ve, kpa á kôr mbaatsereghev sha isharen ve je.

⁷ Zum u iferor ka nan kpe yô, awashima u nan a saa ishe, ishimaverenkeghen i iferor kpaa ia saa ishe.

⁸ Ka i dugh orperapera ken ican kera, iferor a gema a tema sha ityough ki nan.

⁹ Or u cian aôndo ga, ka nan tim or u wan ndor a nan sha zwa u nan je, kpa orperapera nana war sha mfe.

¹⁰ Zum u mbaperapera ka vea zua a mkpeyol yô, gar á ember, man zum u mbaaferev ka vea saa ishe yô, i ger akenge.

¹¹ Sha iveren i mbaperapera, gar ka a zua a icivir, kpa sha zwa u mbaaferev yô, ka i yôhôl un kera.

¹² Or u nan laha or u wan ndor a nan yô, nan fa kwagh je ga, kpa or u fan kwagh yô, ka nan lu ving.

¹³ Or u nan zenden anger yô, nan ngu pasen akaamyer, kpa or u nan lu a jijingi u mimi yô, ka nan cir kwagh.

¹⁴ Henpe mhen u mimi ka una lu ga yô, ikurior i gba kera; aluer mbawasenmhen vea lu imôngo yô, mwar ngu.

¹⁵ Or u nan hingir ishuur u orgen yô, nana ya ican sha mi, kpa u nan vende uwegh ku ngohol yô, á kpe nan iyol.

¹⁶ Kwase u kuman ishima ka a zua a icivir; uipirambaiorov yô, ka ve zua a inyaregh.

¹⁷ Or u zungwen mhôônom ka iyol i nan je nan eren a i dedoo ye, kpa ipiraor yô, ka iyol i nan je, nan eren i ican ye.

¹⁸ Orifer ka nan ngohol injar i kpeegh, kpa u nan lee perapera yô, injar i nan ka i mimi je.

¹⁹ Or u nan taver ishima sha perapera, nana lu uma; or u nan zende ifer ityô yô ka ku u nan nan keren ye.

²⁰ Mba ve lu a asema dang yô, ve ndôhôr TER ishima, kpa mba ve lu a mimi ken akaa a ve yô, ka mba doon Un je.

²¹ Á shi didi kpaa, iferor nana war ibo i yan ga, kpa tsombor u mbaperapera yô, ua war.

²² Er kunya u zenaria sha ishôngozwa i igo nahan, kape kwase u doon ashe u nan fe kwagh ga nan lu la.

²³ Isharen i orperapera ka i kure sha kwagh u dedoo tseegh, kpa awashima u iferor yô, ka sha ishimavihin.

²⁴ Orgen ka or u nan akaa a nan kera nahan kpaa akaa a nan a seer a seer; man ugen di yô, ka nan kusu, i kar ikaa inya, nahan kpaa nan hingir oribanave.

²⁵ Or u nan nagh yô, nana mgbough a akaa, man shi or u nan ne mngerem ma man yô, nan iyol i nan kpaa á na nan mngerem.

²⁶ Or u nan nyum iyiav yô, ior vea wa nan ifan, kpa iveren ia lu sha ityough ki or u nan tee ki la.

²⁷ Or u nan keren kwaghdoon sha gbashima yô, nan ngu keren u i doo ior a nan, kpa u nan keren kwaghbo yô, kwagh la una hide sha a nan.

²⁸ Or u nan suur sha inyaregh ki nan yô, nan á gba, kpa orperapera yô, nan hôm er ahu yô.

²⁹ Or u nan nzughul a ya u nan, nana ya dyako u ahumbe, or u lanen kwagh kpaa, nana hingir kpan u or u lun a ishima i fan kwagh.

³⁰ Ityamegh ki orperapera ka kon u uma je, u nan lu orfankwagh yô, ka nan wa ior.

³¹ Nenge, orperapera je kpaa, a na nan sha ieren i nan shin tar, man hile iferor vea orisholiboo!