Anzaakaa 10 - ICIGHAN BIBILO

¹ Anzaakaa a Solomon. Wan u fan kwagh ka nan na i saan ter u nan iyol, kpa ibumewan yô, ka nan na ngô u nan ishima i zunguluu.

² Inyaregh ki iferegh ki a ma inja ga, kpa perapera yô, ka a yima ken ku.

³ TER Una de uma u mbaperapera er a̱ lu ijen ga, kpa isharen i mbaaferev yô, A mgbegha i kera.

⁴ Or u nan eren tom sha uhwe yô, nana gba ican, kpa uwegh ku mbataverasema yô, ka ku kohol inyaregh.

⁵ U nan kohol iyiav fam yô, ka wan u fan kwagh, kpa u nan yav sha shighe u sundan la, ka wan u van a kunya je la.

⁶ Iveren ngi sha ityough ki mbaperapera, kpa zwa u mbaaferev yô, ka u yer ipila.

⁷ M-umbur u ka i umbur mbaperapera la, ne iveren je; kpa iti i mbaaferev yô, ia saa ishe.

⁸ Or u fan kwagh ken ishima, nana rumun atindi, kpa u nan lamen sha ibume dang dang yô, nana gba.

⁹ Or u nan zenden ken perapera yô, nan ngu zenden bem bem; kpa or u nan goom a igbenda i nan yô, a fa nan.

¹⁰ Or u kamen ashe nan ne ishimavihin, man u nan lamen sha ibume dang yô, nana gba.

¹¹ Zwa u mbaperapera ka imbor i uma je, kpa zwa u mbaaferev yô, ka u yer ipila.

¹² Ihom nderen ayongo, kpaa dooshima yô, cirin akaabo cii.

¹³ Sha zwa u or u kaven kwagh, mba zough a kwaghfan, kpa or u nan ban a mkav yô, akpa ngu sha ci u nan.

¹⁴ Mbafankwagh ka ve kohol mfe, kpa zwa u abumeaior yô, ka mtim u a lu ikua ikua je.

¹⁵ Inyaregh ki shagbaor ka gar u nan u taveraa je; kwagh u van mbaatsanev a mtim yô, ka ibanave ve la.

¹⁶ Tom u mbaperapera ngu ne uma, kpa mtser u mbaaferev yô, ne kwaghbo.

¹⁷ U nan we iko sha mkôôm yô, nan ngu sha gbenda u uma je; kpa u nan vende kwaghwan yô, nan tsume.

¹⁸ Or u nan yer ihom yô, nan ngu a ityumbuzwaagh i aiegh je; man shi u nan er anger yô, ka ibumeor.

¹⁹ Akaaôron kpishi yum la, kwaghbo ban sha mi ga, kpa u nan kusu zwa u nan yô, nan er sha kwaghfan.

²⁰ Nombor u mbaperapera ngu er azurfa u hemban cii nahan, kpa ishima i mbaaferev yô, gbe ishe ga.

²¹ Ityumbuzwaagh i mbaperapera ngi koson ior kpishi, kpa abumeaior yô, nga kpe sha ci u mban u mkav.

²² Iveren i TER ngi ve a inyaregh, tom u nyoonyol seer ma kwagh sha i ga.

²³ Ibumeor yô, ifer i eren ka i maa nan iyol, kape kwaghfan a lu di hen or u kaven kwagh la.

²⁴ Kwagh u iferor nan cie la, ka un je una tser nan ye, kpa isharen i mbaperapera yô, á na ve i.

²⁵ Zum u hiar ka una kar kera yô, iferor nan kera lu ga, kpa orperapera nan ngu er ka imagh ki tsôron nahan.

²⁶ Er kwagh u angen a lu sha anyi man er mnyim ma lu ken ashe nahan, kape oruhwe nan lu hen mba ve tindi nan la.

²⁷ Mcie u cian TER seer ayange, kpa anyom a aferaior yô, a pande a kera.

²⁸ Ishimaverenkeghen i mbaperapera ia hingir iember, kpa awashima u aferaior yô, una saa ishe.

²⁹ Gbenda u TER ka garutya u mbaperapera, kpa mbaerenafer yô, gema ka ve mtim.

³⁰ Mbaperapera yô, á tenger a ve mayange ga, kpa aferaior yô, aa tsa ken tar gbem ga.

³¹ Zwa u mbaperapera ngu dugh a kwaghfan, kpa nombor u aiegh yô, á tim u kera.

³² Zwa u mbaperapera u fa kwagh u a doo u ungwan yô, kpa zwa u aferaior yô, ngu er kwagh u dang.