Anzaakaa 1 - ICIGHAN BIBILO

¹ Anzaakaa a Solomon wan u Davidi tor u Iserael:

² Sha u i̱ fa kwaghfan kua ityesen, man i̱ kav akaaôron a sha mkav kpaa yô;

³ Sha u i̱ ngohol ityesen sha ieren i sha kwaghfan, perapera man ijirôron i sha mimi, kua m-er u vough;

⁴ Sha u nan orlanenkwagh m-er u sha uee, man wanyekwaor mfe kua m-er u sha inja;

⁵ Sha u orfankwagh nana̱ ungwa nana̱ seer mhen, orkavenkwagh kpaa nana̱ ar sha mbamhen mba mimi;

⁶ Sha u kaven injakwagh man kwagh u tesen ikav, ka akaaôron a mbafankwagh kua mkaanem vem ma cimin je la.

⁷ Mcie u cian TER, ka mhii u kwaghfan je la, kpa mbalanenkwagh yô, ve laha kwaghfan kua ityesen.

⁸ Wan wam, ungwan ityesen i teru, tindi u ngôu kpaa, de te un kera ga;

⁹ Gadia vea hingir we kwagh u hweegh sha icul, kua mshirim sha mon wou kpaa.

¹⁰ Wan wam aluer aferaior aa mee u yô, de rumun ga.

¹¹ Aluer vea kaa er: Va sé za kegh sha u haan awambe inya, se dugh ashe ken myer sha or ishôôgh, ikerave kpaa ngi ga;

¹² Sé mena ve uma er Sheol nahan, a agee a ve iyol her, er ka mba ve senen shin ihungwa nahan;

¹³ Sé va zua a akaa a taver ishe atô kposo kposo, sé iv ishar ken uya asev.

¹⁴ Yô, nyôr nongo a vese, se cii ikpanyar yase ia lu i môm.

¹⁵ Wan wam, de zough gbenda a ve ga, dugh nguhar wou sha gbenda ve kera

¹⁶ Gadia angahar a ve nga ze ayem sha u za eren ifer, mba eren fefa sha u za haan awambe inya.

¹⁷ Gadia u hônon to ka gbilinkwagh sha ashe a hanma inyon;

¹⁸ kpa mban yô, ka awambe ve ayol a ve je ve keghen ye, mba dughun ashe ken myer sha uma ve ayol a ve.

¹⁹ Kape igbenda i hanma or u yan mtsera u bo i lu la; ka a ngohol uma u mba ve lu a mi la kera.

²⁰ Kwaghfan yô, ngu yôôn kwagh sha gbenda u ken gar, ka sha ityembegar a genger imo na ye,

²¹ ngu yilan sha akahar a igbenda, hen ape nyôron sha ihinda ken gar la, a pasen akaaôron a na her:

²² Ne mbalanenkwagh, ka hanma shighe je lanegh kua de saren ne; man mbapuunakaa kpaa kwaghpuun una de doon ve; abumeaior kpaa aa de u vendan mfe?

²³ Wa nen myange wam iko, tsô me haa ne jijingi wam, me pase ne akaaôron am.

²⁴ Er m yer man ne venda u ungwan yô, m dugh uwegh, kpa or môm wa iko her ga,

²⁵ kpa ne ta mhen wam kera, ne rumun myange wam mayange ga,

²⁶ mo kpaa, sha iyange i ican yen yô, me se a se, me naha tar zum u mciem maa ta ne iyol la;

²⁷ zum u mciem maa ta sha a ven er uraahumbe nahan, man mtim wen una ta sha a ven er hiar yô, zum u ishimanyian kua zayol vea tser ne yô,

²⁸ zum la vea yilam, kpa me bugh zwa ga, vea kerem sha gbashima je, kpa vea zua a mo ga.

²⁹ Gadia ve venda mfe, mcie u cian TER kpaa, ve tsuwa ga,

³⁰ ve rumun mhen wam mayange ga, ve laha myange wam cii kera,

³¹ nahan vea ya ibo sha gbenda ve la, shi vea ide sha mbamhen vev.

³² Gadia ishimahunden i mbalanenkwagh ia wua ve, mkpeyol u abumeaior kpaa una tim a kera.

³³ Kpa hanma or u nan ver ato her a mo yô, nana tema doo doo, ishima ia yôhôl nan, nana kera lu a mciem ma cian ican la ga.