Amoshi 9 - ICIGHAN BIBILO

¹ M nenge TER tile hen kpe atse a nanden nagh sha mi; man A kaa er: Gbidye uindyuruku mba mtô zan zan amagh a̱ tenger; hembe ve avur avur sha ityouv mbi ior mbala cii; mba ve shi her yô, Me wua ve sha sanker, mô ve môm nana nyôngoso ga, mô ve môm kpaa nana war ga.

² Shin vea time vea ar shin Sheol je kpaa, uwegh Agh kua za due a ve shimi; shin vea unde sha aôndo je kpaa, Me tôô ve shaala Me hide a ve shin inya.

³ Shin vea za yer sha ityough ki Karmel kpaa, Me tôv, Me za hungwa a ve sha her; shin vea yer ishigh Yagh shin atô u zegemnger kpaa, Me kaa iyô her, ia nyuma ve.

⁴ Shin vea yem uikangen sha ishigh ki mbaihomov vev kpaa, shi Me kaa sanker her una wua ve; Me ver ashe sha a ve sha u eren ve kwagh u bo, á kera lu kwagh u dedoo ga.

⁵ Gadia Ter AÔNDO u akum a Sha, ka Un u ka A bende a tar ve, u sough ne, man mba ve tem sha mi cii ve zungwe; u cii, u mough er ifi u Nil nahan, shi u songor er ifi u Igipiti nahan;

⁶ u A maa ukpombaayoughouv Nav Sha, man A ver kwavaôndo Na suur shin tar; Un ka A yila mngerem ma zegemnger, A haa ma sha tar, TER, ka iti Na je la.

⁷ Ne kera mbam er ônov mba Etiopia nahan gaa, ne ônov mba Iserael? Kape TER A kaa ne, M due a Iserael ken tar u Igipiti man Mbafiliti ken Kafetor man Mbashiria ken Kir gaa?

⁸ Yô, nenge, ashe a Ter AÔNDO nga sha tartor u bo la, Me tim u sha tar kera; saa ya u Yakob tseegh Me tim un ci ca ga ye, ka ape TER A kaa ne.

⁹ Gadia, nenge, Me na zwa, Me yegher ya u Iserael ken akuraior cii, er ka i yegher uwua sha tser nahan, nahan kpaa ishange i môm ia gba inya ga.

¹⁰ Á wua mbaasorabo mba ken ior Av cii sha sanker, ve mba ve kaan er: Kwagh u bo una tser se ga, una kohol se kpaa ga.

¹¹ Sha iyange la Me mough a ityumbe i Davidi i lu i yôhôl la sha, Me maa ajiir a na a hemben; Me mough a atse a na sha, Me shi Me maa un er sha ayange a tsuaa la nahan;

¹² sha u ve̱ ngohol asande a Edom a a shi her man akuraior a i yer a sha iti Yam cii, kape TER u A er kwagh ne, A kaa la.

¹³ Nenge, ayange nga van, kape TER A kaa ne, a orkahan nana kohol orsundan man or u shoghol wain kpaa nana kohol ortanivor; iwo ia nôndo wain, je á kuwa inya sha agungu cii.

¹⁴ Shi Me dugh ior Av Iserael ken uikangen kera, shi vea maa agar a lu i yôhôl la, vea tema ker; vea kaha ishule i wain man vea ma zar na; shi vea kaha ishule i atamaikon vea ya atam a ker kpaa.

¹⁵ Me môôr ve ken tar ve, á kera wuhe ve ken tar ve u M ne ve la kera mayange ga, kape TER, Aôndo wou, A kaa ne.