Amoshi 8 - ICIGHAN BIBILO

¹ Ter AÔNDO tesem nahan: yô, nenge, ikese i atamaikon a inyom.

² Tsô A kaa er: Amoshi, ka nyi u nenge a mi? M kaa mer: Ka ikese i atamaikon a inyom. Tsô TER shi kaa a mo er: Mkur va sha ior Av Iserael; kera den Yam ve je ga.

³ Atsam a wan a ken tempel aa hingir mliam sha iyange la, kape Ter AÔNDO A kaa ne; akom aa ngee; hanma ijiir kpaa i de haan a ga! huan ving!

⁴ Ungwa nen kwagh ne, ne mba ne ndyaren mbaibanave shin angahar, man ne tim mbaatsanev ken tar kera,

⁵ ne kaan ner: Ka hanma shighe uwer u he ne ua bee sha er sé tee samuyiaa? Man iyange i memen kpaa sha er sé tee kasua u alakema? sha u sé hide a efa ijime man geman kehen shekel a kehe, man sha u nyighen ior sha ikaren i icughugh;

⁶ sha u sé yam atsanaior sha azurfa man oribanave sha kweakôvough môm man sha u teen akoo a alakema.

⁷ TER bum icivir i Yakob er: Mimi je, mayange ma ieren ve i môm ia hungul Mo ga.

⁸ Tar ua kera tenger sha kwagh ne ga, man hanma or u nan tem ken u kpaa nana kera zungwe gaa? Een, u cii ua mough sha, er ifi u Nil nahan; á tenger u shi ua songor er ifi u Igipiti nahan.

⁹ Tsô sha iyange la, kape Ter AÔNDO A kaa ne: Me er iyange ia mire iyange sha tembe, Me wa tar ime atetan.

¹⁰ Me gema uiniongo enev vea hingir ijungwen, atsam a en cii kpaa aa hingir kwelegh; Me na hanma or nana lu a ikondo uya man hanma ityough kia kpul; Me na ia hingir er ka mliam ma vaan wannomso u môm môm nahan, man mkur u i kpaa er ka sha iyange i vihin ishima tsung nahan.

¹¹ Nenge, ayange nga van, kape Ter AÔNDO A kaa ne, a Me tindi ijen shin tar, kpa á lu ijen i kwaghyan shin imura i mnger ga, kpa á lu sha u ungwan kwaghôron u TER.

¹² Vea zende hii hen zegemnger ne yem hen zegemnger ugen man hii hen imbusutarimese yem sha ityoughkitaregh; vea zende hurugh hurugh sha u keren kwaghôron u TER, kpa vea zua a mi ga.

¹³ Sha iyange la anuunaukase a doon ashe man mbayevikaior vea hume sha ci u imura.

¹⁴ Mba ve bumun kwaghbo u Samaria, mba ve kaan er: Er Aôndo wen a lu uma yô, we Dan; man shi: Er gbenda u yemen Bersheba u lu uma yô; vea gba, mayange vea kera mough sha ga.