Amoshi 6 - ICIGHAN BIBILO

¹ Kwagh á tser ve mba ve tem ken Shion ve hee iyol inya, man mba ve tem sha uwo u Samaria bem bem, ashagbaior a ken nongo u hemban ken akuraior cii, ka ve mba ya u Iserael a ve her a ve la!

² Kar za nen ken Kalne, za nenge nen; keela kpa kar za nen hen Hamati u vesen, shi sen nen hen Gati u Mbafiliti; ve hemba doon a ityartor nginii? Shin tar ve hemba gbanger a tar wene?

³ Ne mba ne kper a iyange i bo ken hemen ca, man ne kporom a ikônough ki torough ki iperagh ikua ne!

⁴ Mba ve yaven sha ugambe mba sha anyianor, man ve naregh ayol a ve sha ugambe; mba ve ye agumabua a ken ikumuile man agumabua a ken ityôr;

⁵ mba ve we atsam a gbilinigh sha imo a adiguve; mba ve dugh mbamhen sha u eren ityougholov er Davidi nahan;

⁶ mba ve me wain shin ikuca man ve shigh ayol a ve mkurem ma hemban doon, kpa ishima kera vihi ve sha ci u mvihi u i vihi Yosev kera la ga!

⁷ Nahan yô, á yem a ve uikangen, vea lu mbahiihii mba á yem a ve uikangen la; ishar i haan iyol i mba i lu ve iyol yagh yagh la ia kar kera.

⁸ Ter AÔNDO bum uma Na; TER, Aôndo u akum a Sha, ngu kaan nahan er: Iyolgengese i Yakob ndôhôr Mo ishima, M kôr ayou a na a tor ihom; nahan Me tôô gar ne man akaa a a lu kimi cii, Me na kera.

⁹ Tsô aluer ior pue vea shi ken iyou i môm yô, vea kpe.

¹⁰ Man zum u anter u orkpen la, u una nande nan la, una tôô nan sha u duen a akuhe ken iyou la kera, man una pine or u nan lu shin atô u iyou la er: Orgen shi ngu a we imôngo kere? Nana gema á kaa er: Ei; nahan uhiihii la una kaa er: Huan ving, gadia doo u sé ter iti i TER ga.

¹¹ Gadia, nenge TER na zwa, nahan á ta sha zegeyou, á yôhôl un, man iyou i kiriki kpaa á hembe i avur avur.

¹² Anyinya nga nyôngoso sha avandaa? Or tsôghol zegemnger sha ibua? Kpa ne gema ijirôron i mimi i hingir megh man atam a perapera hingir kon u yuwan;

¹³ ne mba ne ember Lodebar (gbilinkwagh), mba ne kaan ner: Kera ka sha agee ase se ngohol Karnaim (akor) ga?

¹⁴ Gadia, nenge, Me na ikurior ia hendan a we, we, ya u Iserael, kape TER, Aôndo u akum a Sha, A kaa ne; ia er ne ican, á hii hen gbenda u karen zan Hamati zan zan á za ar hen uwagh u Araba la je.