Amoshi 5 - ICIGHAN BIBILO

¹ Ungwa nen kwaghôron ne u M ter ne kwelegh sha min ne, we ya u Iserael.

² Iniunkwase i Iserael la i gba, ia kera mough ga, i ta i inya hen tar u i, or u moughon a i nan ngu ga.

³ Gadia Ter AÔNDO ngu kaan nahan er: Gar u ior lu duen ker dubu, ka ior deri tsô ve mase shin ye, man u ior lu duen ker deri, ka ior pue ve mase shin ker ken ya u Iserael ye.

⁴ Gadia TER ngu kaan a ya u Iserael nahan er: Kerem nen, nahan né lu uma.

⁵ Kpa de kera keren nen Betel ga, de nyer nen ken Gilgal kpaa ga, shi de ze nen hen Bersheba kpaa ga; gadia á yem a Gilgal uikangen kpee je, man Betel kpaa una hingir gbilinkwagh.

⁶ Ker nen TER, nahan né lu uma; gayô, Una yegh er usu nahan ken ya u Yosev, u ua hia je or u pirin u sha ci u Betel nana lu ga;

⁷ ne mba ne gem ijirôron i hingir kon u yuwan, man ne te perapera inya!

⁸ Un u A gbe Ancôgholov man Anyamaiwa, u A gem angôghime hingir sev, u A gem tetan a we ime a hingir tugh; Un u ka A yila mngerem ma zegemnger, A haa ma sha tar la; TER, ka iti Na je la;

⁹ Un u ka A va a mtim sha orageegh fese, mtim kpaa a va sha iyouutya i taver.

¹⁰ Ve kôr un u a yange kwaghbo hen hundagar la ihom man or u nan er kwagh u mimi yô, ve laha nan.

¹¹ Er ne ndyaren icanor man ne sav alakema na, ne maa ayou a sha awen a kuan, kpa tsan yen ker ga; ne kaha ishule i ikon i wain i dedoo, kpa man yen zar u i ga.

¹² Gadia M fa mngee u atindi a peren a en, man ivesen i asorabo a en; ne mba ne eren mbamimi ican, ne mba ne ngohol inyaregh ki yamen ishô man ne mgbegha mbaibanave hen hundagar kera.

¹³ Nahan orfankwagh nan huan ving sha shighe la, gadia ka shighe u bo je.

¹⁴ Ker nen kwagh u dedoo, i̱ de lu u bo ga, sha u ne lu uma yô; ka nahan man TER, Aôndo u akum a Sha, Una lu a ven, er ne kaan la ye.

¹⁵ Kôr nen kwaghbo ihom man kwaghdedoo a̱ doo ne ishima; rumun nen ijirôron i mimi hen hundagar; shin alaghga TER, Aôndo u akum a Sha, Una zungwe asande a Yosev a a shi her la mhôônom.

¹⁶ Nahan yô, TER, Aôndo u akum a Sha, Ter, ngu kaan nahan er: Mliam maa lu sha ityembe cii; sha igbenda cii á kaa er: Kpe ahii! Kpe ahii! Vea yila orsule sha u nana̱ va zungwe, man mbafankwelegh er ve̱ gber kwelegh.

¹⁷ Ken ishule i ikon i wain cii kpaa, á vaa mliam; gadia Me kar ne her atô, ka ape TER A kaa ne.

¹⁸ Kwagh á tser ne, ne mba i sar ne pe iyange i TER ma i ve yô. Ka nyi i sar ne pe zuan a iyange i TERE? Ia lu ime, ia lu iwanger ga.

¹⁹ Ka er or yevese begha, dwem gema zua a nan; shin nan nyôr ken iyou nan tuur uwegh ken kpekpe, iyô i gema i nyuma nan.

²⁰ Iyange i TER ia lu ime je, ia kera lu iwanger ga, een, á lu angôghime, ma iwanger ia lu ker ga.

²¹ M kôr uiniongo enev ihom, M laha ve, uicighanmbamkohol vev kpaa ve doom ishima ga.

²² Een, shin er ne nem iniav mbi nanden man iniav mbi sha samuyia, nahan kpaa Me ngohol mbi ga; iniav mbi bem mbi ne ne sha uzendenya enev mba wan ahôm la kpaa Me kera ver ishima sha mi ga.

²³ Karem a ayôôso a atsam a ou kera; gadia mkoho u umolo ou la kpaa, M soo u ungwan ga.

²⁴ Kpa ijirôron i mimi i̱ kuwa er ka mngerem nahan, man perapera kpaa er ka uwagh u tôndon ga nahan.

²⁵ Ne vam a iniav mbi sôngon man mbi sha samuyia ken desereti anyom akunduahar la kpa, we ya u Iserael?

²⁶ Een, né tôô Sakuti tor wen man Kaiwan ieev yenev, ishan i aôndo wen, u ne er sha ci wen la.

²⁷ Nahan yô, Me yem a ven uikangen kar Damaseku yem ken hemen, kape TER A kaa ne, Wen u iti Na i lu Aôndo u akum a Sha la.