Amoshi 3 - ICIGHAN BIBILO

¹ Ungwa nen kwaghôron u TER A er sha a ven ne, ne Mbaiserael, sha tsombor u M dugh a u ken tar u Igipiti la cii, er:

² Ka ne tseegh M fe ne ken akuraior a sha won cii ye, ka nahan man Me va tsaha ne sha aferakaa a en cii ye.

³ Ior uhar vea gba zenden imôngo aluer vea vande zuan ga kpa?

⁴ Begha te kume shin ikô zum u a ker inyam ga kpa? Gumbegha te kume ken bar na zum u ka una kôr kwagh ga kpa?

⁵ Inyon i gbe ken kwaghhônon shin inya, zum u ka a hôn i ga kpa? Kwaghhônon una yôhôl aluer kwagh una gba ker ga kpa?

⁶ Ka a tôngo ikpamkor ken gar nahan, mciem ma ta ior iyol ga kpa? Kwagh u bo una gba nyôron ken gar tsô, a lu TER A ve a mi ga kpa?

⁷ Mimi je TER Una gba eren ma kwagh môm ga saa Una vande pasen kwaghmyer Na la hen mbatomov Nav, uprofeti ve.

⁸ Begha ta kume, yô, ka an je nana de ciana? Ter AÔNDO ôr kwagh, yô ka an je nana de pasenaa?

⁹ Yôô nen sha ayouator a Ashedodi, man sha ayouator a ken tar u Igipiti, ner: Kohol nen sha iwo i Samaria, yô, nenge, uzegembaayôôsov mba ve lu ker, man mbamkighir mba ker atô na la.

¹⁰ Gadia ve kera fa u eren kwagh u mimi ga, kape TER A kaa ne, ve mba ve ombon ipila man iv ken ayou a ve a tor la.

¹¹ Nahan yô, Ter AÔNDO ngu kaan nahan er: Orihom una lu, una kase tar la, una wa u atô, una shir a agee a ou inya, man á vihi ayouator a ou kera kpaa.

¹² TER ngu kaan nahan er: Er orkuranilev ka a yima angahar ahar, shin vegherto sha zwa u begha nahan, kape á yima Mbaiserael mba ve tem ken Samaria sha zongough ku gambegh man sha ukushen mba sha shiliti mba gambev la.

¹³ Ungwa nen man er nen shiada pase nen ya u Yakob, kape Ter AÔNDO A kaa ne, Aôndo u akum a Sha ne.

¹⁴ Gadia sha iyange i Me va tsaha Iserael sha afer a ve yô, Me shi Me tsaha atse a Betel a nan nagh sha mi la kpaa, á tôndo akor a atsegh aa gba inya.

¹⁵ Me yôhôl iyou i teman ker shighe u wuhegh, man iyou i teman ker shighe u iceenyolough la; ayou a sha anyianor kpaa aa vihi kera, ayou kpishi aa saa ishe, kape TER A kaa ne.