Amoshi 1 - ICIGHAN BIBILO

¹ Akaaôron a Amoshi, u a lu u môm ken mbakuraniyôngo mba ken Tekoa la, kwagh u a nenge sha ayange a Ushia tor u Yuda man sha ayange a Yerobiam wan u Yoashi, tor u Iserael, anyom kar ahar man tar mase tenger ye.

² A kaa er: TER ngu tan kume ken Shion, ngu taver imo Na ken Yerusalem je, ajiir a yan toho a uile zungwe, ityough ki Karmel kpaa ure.

³ TER ngu kaan nahan er: Sha ci u atindi a peren atar a Damaseku, een, sha ci u anyiin je yô, Me kera hide a mtsaha na ijime ga, gadia ve shoghol Gileadi sha ikyekye i iyôô i shoghol iyiav;

⁴ nahan Me haa usu ken ya u Hasael ua hia ayouator a Benhadadi.

⁵ Me sombo ishindanhunda i Damaseku, Me tim mba ve tem ken pev u Aven, kua wen u a lu a tôgh ku torough ken Bete-eden la kpaa; á yem a ior i Shiria uikangen ken Kir, kape TER A kaa ne.

⁶ TER ngu kaan nahan er: Sha ci u atindi a peren atar a Gasa, een, sha ci u anyiin je yô, Me kera hide a mtsaha na ijime ga, gadia ve yem a ikurior jimin cii uikangen, sha u za nan ve sha ikev i Edom;

⁷ nahan Me haa usu sha gilgar u Gasa, ua hia ayouator a na;

⁸ Me tim mba ve tem ken Ashedodi kua wen u a lu a tôgh ku torough ken Ashekelon kpaa; Me naregh uwegh Agh sha Ekeron, man asande a Mbafiliti a a shi her la aa tim kera, kape Ter AÔNDO A kaa la.

⁹ TER ngu kaan nahan er: Sha ci u atindi a peren atar a Tiru, een, sha ci u anyiin je yô, Me kera hide a mtsaha na ijime ga, gadia ve na ikurior jimin cii sha ikev i Edom man ve wa ikuryan i anmgbian a anmgbian la iko ga;

¹⁰ nahan Me haa usu sha gilgar u Tiru ua hia ayouator a na.

¹¹ TER ngu kaan nahan er: Sha ci u atindi a peren atar a Edom, een, sha ci u anyiin je yô, Me kera hide a mtsaha na ijime ga, gadia a cir anngô na ityô a sanker uwe, man shi a ta mhôônom ma zungwen kera cii, ishima na i nyoon pever ga, lu a iyugh gbem;

¹² nahan Me haa usu sha Teman, ua hia ayouator a Bosera.

¹³ TER ngu kaan nahan er: Sha ci u atindi a peren atar a Mbaamon, een, sha ci u anyiin je yô, Me kera hide a mtsaha ve ijime ga, gadia ve pav kasev mba Gileadi mba ve lu iyav la iyav sha u vea seer tar ve u̱ kehe;

¹⁴ nahan Me keer usu sha gilgar u Raba, ua hia ayouator a na, a amo a geren sha iyange i utya, sha ijeverahumbe kpaa sha iyange i zegehiar;

¹⁵ á yem a tor ve uikangen un a mbatarev nav imôngo, kape TER A kaa la.