3 Yohane 1 - ICIGHAN BIBILO

¹ Ortamen ne ngu sughun Gayu or u doon ishima u a doom ishima sha mimi yô.

² Orwam u doon mo ishima, m ngu eren msen mer, sha hanma kwagh cii, u lu doo doo man i̱ kpe u iyol vough er uma wou u ken ishima, i kpe un iyol nahan.

³ Gadia zum u anmgbianev za va yô, ve er shiada sha mimi wou er u zenden sha mimi, nahan doom kpishi je.

⁴ Aluer m ungwa, mer, mbayev av mba zenden sha mimi yô, kam iember je hemba akaa agen cii.

⁵ Orwam u doon mo ishima, u er sha mi vough, sha hanma kwagh u u eren a anmgbianev cii, man ka mba u fe ve ga je;

⁶ mba eren shiada sha dooshima wou sha ishigh ki nongo u Kristu; nahan aluer u shi u wase ve er i doo hen Aôndo yô, ú er doo.

⁷ Gadia ka sha ci u Iti la ve dugh ye, kwagh kpaa ve ngohol hen atôatyev ga.

⁸ Nahan ka u sé nyôr a ambaaior la ken ya kpee, sha u se kpaa sé nyôr nongo sha tom u sha mimi la.

⁹ M nger nongo u Kristu kwagh, kpa Diotrefe, u tamen a doo un ken a ven yum la, a rumun se ga.

¹⁰ Nahan yô, aluer me va yô, me nder kwagh ne, me ôr un akaa a a lu eren la. A lam sha a vese vihi kpishi. Nahan kpaa kuma un ga, a kera nyôr a anmgbianev mbala ken ya na ga, man mba i sar ve u eren nahan kpaa, a gema a yange ve, a dugh ve ken nongo u Kristu kera.

¹¹ Orwam u doon mo ishima, de ze a kwaghbo ityô ga, saa kwagh u doon; or u nan eren kwagh u dedoo yô, ka ken Aôndo nan dugh ye; u nan eren kwagh u bo yô, nan ngu a nenge a Aôndo ga.

¹² Ior cii mba eren shiada u dedoo sha Demeteriu, mimi iyol na kpaa ngu eren shiada, se kpaa se mba eren shiada, man u fa, shiada wase ka u mimi je.

¹³ M ngu a akaa kpishi a ma m nger u yô, kpa sarem pe ngeren we sha inki man kon u ngeren ga.

¹⁴ Kpa m ngu veren ishima mer, shi kpuaa me nenge a we ma se ôr sha zwa je.

¹⁵ Bem a̱ lu sha a we. Ahuraior nga sughun we. We kpaa, sugh ahuraior sha ati ati, nam.