2 Yohane 1 - ICIGHAN BIBILO

¹ Ortamen ne ngu sughun icuwan shagbakwase man shi ônov nav kpaa, mba ve doom ishima mimi je, man kera ka mo tseegh ga, kpa ka ve cii mba ve fe mimi yô;

² ka sha ci u mimi u a lu ken vese la man shi una lu a vese gbem kpaa.

³ Mrumun u sha mhôôn man mhôônom ma zungwen man bem mba ve dugh hen Aôndo Ter man shi hen Yesu Kristu, Wan u Ter, ve̱ lu sha a vese ken mimi man dooshima kpaa.

⁴ M ember kpishi gadia m kohol mbagenev ken ônov ou, mba zenden ken mimi er se zua a tindi hen Ter nahan.

⁵ Hegen yô, m ngu zamber a we, shagbakwase, m ngu ngeren we tindi u he ga, kpa ka u se lu a mi sha hiihii la; ka u se̱ doo ayol ase.

⁶ Dooshima yô, ka un ne: ka u se̱ zenden sha atindi a Na. Ka tindi shon ne: Er ne ungwa sha hiihii yô, ka u né zende sha mi.

⁷ Gadia mbaicughuv kpishi due sha tar, mba pasen er Yesu Kristu va ken iyol i or ga. Ka orcugh, ka Antikristu je la.

⁸ Ver nen ishima sha ayol a en sha er akaa a se er tom sha mi la, a̱ de saan ne ishe ga yô, man né ngohol injar vough.

⁹ Hanma or u nan ze hemen kpishi, kpa nan kera luun ken ityesen i Kristu ga yô, nan ngu a Aôndo ga. Kpa u nan luun ken ityesen ne yô, ka nan je nan lu a Ter man Wan kpaa ye.

¹⁰ Aluer hanma or nana va her a ven man nana va a ityesen ne ga yô, de nyer nen a nan ken ya wen ga, msugh tsô kpaa, de sughun nen nan ga.

¹¹ Gadia u nan sugh nan yô, nan ngu nyôron nongo a nan sha aeren a nan a bo la.

¹² M ngu a akaa kpishi a ma m nger ne, kpa sarem ka ngeren sha takerada man sha inki ga, kpa m ver ishima u van her a ven, me ôr kwagh a ven sha zwa je, sha er iember yase ia hôm yô.

¹³ Ônov mba icuwan anngôu u kwase mba sughun we.