2 Utor 8 - ICIGHAN BIBILO

¹ Yô, Elisha ôr kwagh a kwase, u un hire wan na a uma her la, a kaa er: Mough, yem, we a ior mba hen ya wou, gba za teman shir henpe i doo u pe za teman tsô; gadia TER yila ijen er i̱ gba; ia gba hen tar ne anyom ataankarahar je.

² Tsô kwase la mough, er sha imo i or u Aôndo la, a yem a ior mba hen ya na, a za tema shir ken tar u Mbafiliti, anyom ataankarahar.

³ Tsô anyom ataankarahar la nga been yô, kwase la mough hen tar u Mbafiliti hide; nahan a due a za vaa a tor sha ci u ya na kua sule na.

⁴ Yô, tor lu ôron kwagh a Gehashi, wanakiriki u or u Aôndo, lu kaan er: Shi ôrom uzegembaakaav mba Elisha a er la cii.

⁵ Tsô ngur ôron tor er lu nder orkpen yô, nenge, kwase u a nder wan la va, lu va vaan a tor sha ci u ya na kua sule na. Tsô Gehashi kaa er: Terem tor, ka kwase shon je ne, man shi ka wan shon je ne, u Elisha nder un ne.

⁶ Nahan tor pine kwase la, a ôr un. Tsô tor na un or u nengen sha ya na, kaa er: Hide un a akaa a a lu a na cii, kua iyiagh ki hen sule na cii, hii sha iyange i a undu tar ne zan zan nyian.

⁷ Tsô Elisha va hen Damaseku; yô, Benhada tor u Shiria gba angev; nahan i kaa un er: Or u Aôndo va heen.

⁸ Tsô tor kaa a Hasael er: Tôô iwua, yem za kohol or u Aôndo la, pine un imo i TER, pine wer: Me war angev mbun je kpa?

⁹ Nahan Hasael za kohol un a iwua sha ikev, lu hanma kwagh u injaa u ken Damaseku cii, ikav mbila kuma urakumi akunduahar; a va a va tile sha ishigh nagh, a kaa er: Wan wou Benhada tor u Shiria tindim her a we, ngu pinen er: Me war angev mbun je kpa?

¹⁰ Elisha kaa a na er: Hide, za kaa un wer, ú war kpee je; nahan kpaa TER tesem er una kpe kpee.

¹¹ Tsô a bon ashe sha a na bong, zan zan kunya kôr un; nahan or u Aôndo vaa.

¹² Tsô Hasael kaa er: Ka nyi terem a vaa? A gema a kaa er: ka sha ci u m fa kwagh u bo u ú va er Mbaiserael yô; ú nande ayouautya a ve sha usu, ú wua mbayevikaior vev sha sanker, ú ta mbayev vev mba kiriki inya ú her ve; kasev vev mba lun iyav kpaa, ú pav ve iyav.

¹³ Hasael gema kaa er: Wanakiriki wou ngu nyi je; aniwa tsô, una er zegekwagh ne nahana? Elisha gema kaa er: TER tesem er ú hingir tor u Shiria.

¹⁴ Tsô a mough hen Elisha a hide hen ter na; a pine un er: Elisha kaa u nana? A gema a kaa er: A kaam er, mimi je, ú war angev mbun.

¹⁵ Tsô kper nan yô, a tôô ikondo i gambe a mir shin mnger, a cir un sha ishi, maa a kpe; Hasael maa tema tor sha ityough nagh.

¹⁶ Sha inyom i sha utaan i Yoram wan u Ahaba tor u Iserael, er Yehoshafati lu tor u Yuda la, Yehoram wan u Yehoshafati ya tor.

¹⁷ Anyom a na lu ikundugber kar ahar zum u a ya tor la; a tema tor anyom anigheni ken Yerusalem.

¹⁸ A lu zan sha gbenda u utor mba Iserael er ya u Ahaba er nahan; gadia kwase na lu wan u Ahaba; a er ifer sha ishigh ki TER.

¹⁹ Nahan kpaa TER rumun u timin Yuda ga, sha ci u wanakiriki Na Davidi, gadia A tôndo zwa a na er Una na un imenger sha ci u ônov nav gbem.

²⁰ Sha ayange na la, Edom due sha ikev i Yuda kera, ve gema ve ver tor ve ayol a ve.

²¹ Nahan Yoram per za hen Sair a akeke na a utya cii; tsô a mough tugh, a hemba Mbaedom mba ve kase un kua mbahemenev mba akekeautya la; nahan ior yevese hide hen utenti vev.

²² Kape Edom hendan due sha ikev i Yuda kera zan zan nyian ne. Hen shighe la Libena kpaa hendan.

²³ Aerenakaa a Yoram agen man akaa a a er cii yô, i nger a ken ruamabera u abaver a utor mba Yuda la gaa?

²⁴ Tsô Yoram yav a uter nav imôngo, i ii un a uter nav imôngo, ken gar u Davidi; wan na Ahashia gema tema tor sha ityough nagh.

²⁵ Sha inyom i sha pue kar uhar i Yoram, wan u Ahaba, tor u Iserael la, Ahashia wan u Yehoram tor u Yuda, ya tor.

²⁶ Ahashia lu anyom ikundu kar ahar zum u a ya tor la; a lu tor inyom i môm ken Yerusalem. Iti i ngô na er Atalia wan u Omri tor u Iserael.

²⁷ A za sha gbenda u ya u Ahaba, a er ifer sha ishigh ki TER, er ya u Ahaba lu er nahan; gadia un lu wankem hen ya u Ahaba je.

²⁸ A za vea Yoram wan u Ahaba imôngo sha u za nôngon ityav a Hasael tor u Shiria hen Ramoti-gileadi; kpa Mbashiria vihi Yoram iyol.

²⁹ Nahan tor Yoram hire hen Yesereel sha u za sôron avav a Mbashiria gber un hen Rama zum u a lu nôngon ityav a Hasael tor u Shiria la; Ahashia, wan u Yehoram, tor u Yuda va er una nenge Yoram wan u Ahaba hen Yesereel, gadia lu uange.