2 Utor 7 - ICIGHAN BIBILO

¹ Tsô Elisha kaa er: Ungwa nen imo i TER! TER ngu kaan nahan er: Kper hen shighe ne nahan á tee ikaren i mwem ma kengese sha gbenger shekel, man ikaren i shair uhar sha gbenger shekel, hen hunda u Samaria.

² Kpa orhemen, u tor suur sha uwegh nagh la, gema kaa a or u Aôndo er: Nenge, shin TER Una bugh a-an Sha je yô, kwagh ne una er nahana? A kaa er: Ú nenge sha ashe ou je, kpa ú ya ga.

³ Yô, ior mba amandev unyiin lu hen ape nyôron sha hundagar, ve kaa ayol a ve er: Ka nyi se gbe teman heen zan zan sé va kpe nahana?

⁴ Aluer se kaa ser, sé za nyôr hen gar, kpa nenge ijen ngi ken gar, nahan sé kpe ker; man aluer se gba teman heen, kpa sé kpe. Yô, va nen, sé za nyôr nen ken akumautya a Mbashiria; aluer vea de se uma yô, sé lu di uma je ve, man aluer vea wua se kpaa, sé kpe kera tsô.

⁵ Nahan ve mough aôndoaimegh je ve yem hen afo a Mbashiria la; er ve va ar hen akôngoafogh a Mbashiria yô, nenge, ma or lu her ga.

⁶ Gadia TER er akumautya a Mbashiria ve ungwa ihuran i akeke man i anyinya, lu ihuran i zegeikumutya; nahan ve kaa ayol a ve er: Nenge, tor u Iserael za na utor mba Mbahiti kua utor mba Mbaigipiti tôndo er ve̱ va, ve̱ va nôngo ityav a vese.

⁷ Nahan ve mough aôndoaimegh, ve yevese ve undu utenti vev man anyinya ve man ujaki vev kua afo cii, ve yevese sha u vea war uma ve.

⁸ Er mbaamandev mbala za ar hen akôngoafogh yô, ve nyôr ken tenti môm, ve ya kwagh, ve ma kwagh, ve kura azurfa man zenaria kua akondo keregh ve za yer; tsô shi ve hide ve za nyôr ken tenti ugen, ve tôô akaa kimi ve za yer.

⁹ Nahan ve gema ve kaa ayol a ve er: Se er sha mi ga; nyian ka iyange i loho u doon je, man se gema se huan; aluer sé ngôôr zan zan sev á av yô, ibo ia kôr se; yô, va sé za nen, sé za kaa nen ior mba hen ya u tor.

¹⁰ Tsô ve va yila mbakuranhundagar, ve ôr ve, ve kaa er: Se va hen afo a Mbashiria, yô, or ngu her ga, imo i or tsô kpaa ga, saa anyinya a i zer a kua ujaki kpaa, man utenti lu her nahan.

¹¹ Nahan mbakuranhunda genger imo, gema kaa ior mba hen ya u tor.

¹² Tsô tor mough tugh, kaa a mbayev nav er: De, me ôr ne kwagh u Mbashiria ve er a vese yô. Ve fa ijen kôr se, nahan ve due ken afo kera, ve za yer ken toho; mba kaan er: Zum u vea due ken gar yô, sé kôr ve uma, sé nyôr ken gar.

¹³ Kpa wanakiriki na ugen gema kaa er: Shi de mbagenev ve̱ kôr anyinya ataan a a shi her ken gar ne; nenge, ve mba er ikpelaior i Iserael i i shi her ne nahan; nenge, ve mba er ikpelaior i Iserael i i saa la, sé tindi ve, sé nenge.

¹⁴ Tsô ve tôô akeke ahar a anyinya; tor tindi er i̱ zenda akumautya a Mbashiria ijime; a kaa er: Za, za nenge nen.

¹⁵ Ve zenda ve ijime zan zan hen Yordan; yô, akondo ngee sha gbenda cii, kua ikav mbi Mbashiria ve haa kera sha ci u ve lu yevese fefa yum la. Nahan mbatyomov mbala hide, ve kaa tor nahan.

¹⁶ Tsô ior due, ve za ya ishar hen afo a Mbashiria. Nahan i tee mwem ma kengese ikaren môm sha gbenger shekel, man shair uikaren mba uhar sha gbenger shekel, sha imo i TER kaa la.

¹⁷ Tor ver orhemen, u tor suur sha uwegh nagh la, er a̱ kuran hunda, nahan ikpelaior ndyar un sha hunda a kpe, sha imo i or u Aôndo kaa zum u tor sen hen a na la.

¹⁸ Gadia er or u Aôndo kaa tor er: Á tee shair uikaren mba uhar sha gbenger shekel, man mwem ma kengese ikaren môm sha gbenger shekel, kape kper shighe ne nahan á lu hen hunda u Samaria la,

¹⁹ orhemen la, gema kaa a or u Aôndo er: Yô, aluer TER Una bugh a-an Sha je yô, kwagh ne una er nahana? Un gema kaa er: Ú nenge sha ashe a ou je kpa ú ya ga;

²⁰ kape kwagh er un la; ior ndyar un hen hunda je, maa a kpe.