2 Utor 6 - ICIGHAN BIBILO

¹ Tsô uprofeti kaa a Elisha er: Nenge, ijiir i se tem sha ishigh you ne, i yina se.

² Yô, shi rumun se̱ za shin Yordan, hanmô wase nana̱ za gber hwange, sha er sé er ijiir i teman her yô. A gema a kaa er: Za nen.

³ Tsô ugen kaa er: Shi za a mbayev ou imôngo. A gema a kaa er: Me za.

⁴ Tsô a za a ve imôngo, mba za ar hen Yordan yô, ve gba gberen ikon.

⁵ Kpa orgen ngur gberen hwange yô, ijembe tsuwa gba shin mnger; tsô a genger imo, a kaa er: Kpe ahii, terem! man m sôn a sôn i kpaa.

⁶ Or u Aôndo pine er: I gba hana? A tese un ijiir la. Tsô a tôndo gbaakon, a gbihi her, a er iyôgh kila ki due ki gba zenden sha kwavmnger.

⁷ A kaa a na er: Ngohol. Tsô a za uwegh a ngohol.

⁸ Sha shighe u tor u Shiria lu nôngon ityav a Iserael la, a tume idyu a mbayev nav, a kaa er: Ka sha ijiir i nahan nahan me haa afo ye.

⁹ Tsô or u Aôndo tindi tor u Iserael loho, a kaa er: Ver ishima de karen hen ijiir i nahan la ga, gadia Mbashiria mba van her.

¹⁰ Nahan tor u Iserael tindi hen ijiir i or u Aôndo a kaa un, a we un kwagh sha i la, nahan a ver ishima her, lu kwa môm shin kwa har tseegh tsô ga.

¹¹ Nahan ishima vihi tor u Shiria kpishi sha kwagh la, a yila mbayev nav, a kaa a ve er: Né shi tesem or u ken a vese u nan te ikaa ken tor u Iserael gaa?

¹² Tsô wanye na ugen kaa er: Ei, terem tor; kpa ka Elisha, profeti u a lu ken Iserael la, a kaan tor u Iserael akaaôron a ou a u er ken iyou you i yaven ye.

¹³ A kaa er: Za, za nenge henpe a lu yô, er me tindi, á za kôr un yô. Tsô i kaa un er: Ngu ken Dotan.

¹⁴ Nahan a tindi anyinya kua akeke man ikumutya i vesen ker; ve va tugh, ve kase gar la.

¹⁵ Er wanakiriki u or u Aôndo mough pepe, due yô, nenge, ikumutya man akeke kua anyinya kase gar cii. Tsô wanakiriki na la kaa a na er: Kpei, terem! Sé er nana?

¹⁶ A gema a kaa a na er: De cie ga; gadia mba ve lu a vese, hemba mba ve lu a ve la iyenge.

¹⁷ Nahan Elisha sôn er: TERE, shi bugh un ashe, a̱ nenge. Tsô TER bugh wanye la ashe; yô, nenge, anyinya kua akeke a usu mgbough sha uwo la, kase Elisha.

¹⁸ Er ve sen her a na yô, Elisha sôn TER, kaa er: Shi pir ior mban ashe. Tsô A pir ve ashe sha imo i Elisha la.

¹⁹ Nahan Elisha kaa a ve er: Ka gbenda ne ga, ka gar shon ne kpaa ga; dondo nen sha a mo, m̱ za a ven hen or u ne keren la. Tsô a za a ve hen Samaria.

²⁰ Mba nyer ken Samaria yô, Elisha kaa er: TERE, bugh ior mban ashe, ve̱ nenge kera. Tsô TER bugh ve ashe ve nenge kera; yô, ve lu ken Samaria je.

²¹ Zum u tor u Iserael nenge a ve yô, a kaa a Elisha er: Terem m̱ wua vee, m̱ wua vee?

²² A gema a kaa er: De woo ve ga; mba u ker a kôr, ú wua ve sha sanker wou kua ada wouwe? Ver ve kwaghyan inya kua mngerem, ve̱ ya, ve̱ ma, ve̱ yem hen ter ve.

²³ Tsô a yôr ve iwer kpishi er ve̱ ya shi ve̱ ma yô; a na ve gbenda, ve yem hen ter ve. Nahan akumautya a Shiria shi kera kimbir u van ken tar u Iserael ga.

²⁴ Tsô ken masejime u kwagh ne yô, Benhada tor u Shiria kohol akumautya na cii, a kôndo a za haa afo a kase Samaria.

²⁵ Zegejen gba ken Samaria; ve kase un a ityav je, i gema teen ityough ki jaki sha agbenger a azurfa akunduanyiin man akôngo a mkungu a a kom môm sha unyiin u ikaren i kab, sha agbenger a azurfa ataan.

²⁶ Tsô er tor gba karen sha gir u gar yô, kwase ugen va genger imo yila un kaa er: Wasem, terem tor!

²⁷ Nahan a kaa er: Aluer TER Una wase u ga yô, ka sha hanma gbenda mo me wase we? Ka hen vande u gbiren alakema, shin shin ihungwa i shoghol atam a waina?

²⁸ Tor pine un er: Ka nyi i tser uwe? A kaa er: Kwase ne kaa a mo er: Na wan wou sé ya un nyian, kper sé ya di wan wam.

²⁹ Nahan se jiidi wan wam, se ya; kper nan, m kaa a na mer: Na ase wan wou sé ya di, kpa a gema a yer wan na.

³⁰ Tsô, zum u tor ungwa kwaghôron u kwase la yô, a ande akondo a na, lu karen sha gilgar; nahan ior nenge er a te ikondo uya yô.

³¹ Tsô a kaa er: Aôndo A̱ er a mo nahan shi i̱ seer nahan kpaa, aluer á de ityough ki Elisha wan u Shafati sha a na nyian yô.

³² Yô, Elisha tema ken iyou na, mbatamen lu a na imôngo; tor tindi or hemen, kpa er ortyom la lu a ar ga je tsô, a kaa a mbatamen mbala er: Ne nenge, er wan u orwuanor la, a tindi or er nana̱ va gberem ityough kpa? Nenge, zum u ortyom la una va ar yô, wuhe nen hunda, kighir nen hunda gbong gbong; acin a ter na nga van un ijime gaa?

³³ Er lu ôron kwagh ave la je tsô, nenge, ortyom la va sôôn her a na. Tsô tor kaa er: Nenge ican ne ka hen TER i dugh ye, ka nyi man shi me kegh TERE?