2 Utor 4 - ICIGHAN BIBILO

¹ Tsô kwase ugen ken kasev mba uprofeti va vaa a Elisha kaa er: Wanakiriki wou, nomom, kpe; man we kpaa u fa wanakiriki wou lu cian TER; yô, oryareninjô va er una va kuram ônov uhar, ve̱ za hingir ikpan na.

² Elisha gema kaa a na er: Tsô m̱ er u nyi? Kaam yôô; ka nyi u lu a mi ken ya wouwe? A kaa er: Wanakiriki wou u kwase ngu a ma kwagh hen ya ga, saa ityegh ki mkuregh tsô.

³ Tsô a kaa er: Yô, za sôn atum ken won hen mba ve dondo a we cii, atum a a lu a ma kwagh shimi ga yô; sôn a̱ de lu kpeghee ga.

⁴ Yô, nyôr, wuhe hunda, uwe a ônov ou, haa shin atum la cii, ver a a iv la kposo.

⁵ Tsô a mough a due a za nyôr, a wuhe hunda, un a ônov nav; ve na un atum a haa.

⁶ Er atum la iv yô, a kaa a wan na er: Shi nam tumugh kugenegh, kpa a kaa a na er: Tumugh kera ku ga. Tsô mkurem tôndo.

⁷ Nahan a va kaa or u Aôndo la. A kaa er: Za tee mkurem mara kimbi injô you, kwagh u una shi yô, mase koson iyol you kua ônov ou a mi.

⁸ Tsô iyange igen Elisha lu zan Shunem; shagbakwase ugen lu her, a za un iyol tsung er a̱ ya kwagh. Tsô hanma shighe u una karen yô, a kaha a za ya kwagh her.

⁹ Nahan a kaa a nom na er: Nenge, m kav or ne ka icighanor u Aôndo je, u a karen heen keke ne.

¹⁰ Yô, sé maa nen un anyou sha, sé ver un gambe ker man tebul man ikônough kua imenger, nahan shighe u una va her a vese yô, a̱ nyôr ker.

¹¹ Tsô iyange igen a va her, a nyôr ken iyou la, a yav.

¹² A gema a kaa a Gehashi wanakiriki na er: Yila kwase u Shunem ne: yer un yô, a va tile un sha ishi.

¹³ A kaa a na er: Kaa un wer, nenge, ishima nyian we a vese, u er se akaa ne cii; yô, ka nyi i̱ er di sha ci wouwe? Shin i̱ za ôr tor kwagh wou, shin i̱ ôr kurutya ase. A gema a kaa er: M tema hen ityô yam je.

¹⁴ Shi a gema a kaa er: Nahan ka nyi kwagh á er unu? Tsô Gehashi kaa er: Ngu a wan ga, man nom na kpaa bee iyol.

¹⁵ A kaa er: Yila un. Er a yila un yô, a va tile sha hunda.

¹⁶ A kaa er: Inyom á va hurugh á kuman hen shighe ne yô, ú wa wan ikum. A kaa er: Eihe, terem, we or u Aôndo je, de tsughun kpan wou u kwase ga!

¹⁷ Tsô kwase la wa iyav, mar wan u nomso er inyom hurugh va ar hen shighe la yô, er Elisha kaa un nahan vough.

¹⁸ Wan la vesen yô, iyange igen a due a za hen ter na hen mbasundav.

¹⁹ Tsô a hii a ter na er: Ityough, ityougho! Nahan a kaa a wanakiriki na er: Tôô un, za a na hen ngô na.

²⁰ Tsô a tôô un a za a na hen ngô na, a yav un sha ikum zan zan kuma iyange sha tembe nahan, maa a kpe.

²¹ Tsô a unde a za penda un sha gambe u or u Aôndo la, a due a kôr hunda a wuhe.

²² Nahan a yila nom na, a kaa a na er: Shi tindim a wanye môm a jaki môm, me gber ayem, me za hen or u Aôndo man me hide ye.

²³ A kaa er: Ka nyi man i sar u u zan her a na nyiana? Ka uwer u he ga, shi ka iyange i memen kpaa ga. A kaa er: Dem tsô hô!

²⁴ Tsô a kange jaki shidi, a kaa a wanakiriki na er: Hure i, yem hemen, de gbe wer u huren ga, saa me kaa u.

²⁵ Tsô a za, a za ar hen or u Aôndo sha uwo u Karmel je. Er or u Aôndo ta ashe za nenge a na ca yô, a kaa a wanakiriki na Gehashi er: Nenge, kwase u Shunem ngula;

²⁶ shi gber ayem, za kohol un, pine un wer: U ngu dedoo jee? Nomu ngu dedoo? Wanakiriki la kpaa ngu dedoo? A rumun er: Doo.

²⁷ Va ar hen or u Aôndo sha igungu yô, a kôr un angahar, tsô Gehashi kporom er una mgbegha un kera; kpa or u Aôndo kaa er: De un; gadia ishima vihi un, man TER yerem kwagh la, A kaam ga.

²⁸ Tsô kwase kaa er: Iyange m vaa wan a tereme? Iyange m kaa u mer: De tsughun mo ga ga?

²⁹ Nahan a kaa a Gehashi er: Fiir ikondo, tôô gbough agh sha uwe, za, wea kohol an or kpaa de sughun nan ga, man aluer orgen nana sugh u kpaa, de bughun nan zwa ga; za penda gbough agh sha ishigh ki wanye la.

³⁰ Kpa ngô u wanye la kaa er: Er TER A lu u uma, man we kpaa u lu uma ne yô, mayange me undu u ga. Nahan a mough a dondo sha a na.

³¹ Gehashi kar ve sha hemen, za ver gbough kura sha ishigh ki wanye la; kpa imo lu ga, m-ongo kpaa ga. Nahan, a hide a va kohol un, a kaa a na er: Wanye la nder ga.

³² Er Elisha nyôr hen ya la yô, nenge, wan la yav sha gambe kpenegh.

³³ Nahan a nyôr, a wuhe hunda, a lu ker vea na, ve uhar, a sôn TER.

³⁴ Tsô a unde a samber sha wanye la, a penda zwa sha zwa na, ashe kpaa sha ashe na, ave na kpaa sha ave na; a samber sha a na; nahan iyol i wan la gba tseen.

³⁵ Tsô a hide a zende ken iyou kwa môm; a shi a unde a samber iyol na sha a na; wanye la yesem kwa taankaruhar, maa a bugh ashe na.

³⁶ A yila Gehashi, a kaa a na er: Yila kwase u Shunem ne. Nahan a yila un. Er kwase la nyôr her a na yô, a kaa a na er: Tôô ase wan wou.

³⁷ Tsô a nyôr, a gure un hen angahar, a wa ityough inya je, a tôô wan na, a due.

³⁸ Tsô Elisha shi va ken Gilgal; yô, ijen gba ken tar la; uprofeti tema un sha ishi; nahan a kaa a wanakiriki na er: Ver zegeitye la, jiidi kwaghyan sha ci u uprofeti.

³⁹ Tsô ugen za ken toho za zôr iue, a zua a icegherme, a zôr atam a i, a kuve ikum poo, a va sev, a haa shin ityegh ki kwaghyan kila; gadia ve vande fan ga.

⁴⁰ Nahan ve haa er ior mbala ve̱ ya. Er ve lu yan kwaghyan ave yô, ve gbire iwer, ve kaa er: Kpash! or u Aôndo, ku ngu shin ityegh kin. Ve fatyô u yan ga.

⁴¹ Nahan a kaa er: Za tôô mwem va a mi. Tsô a haa ma shin ityegh kila; a kaa er: Haa nen ase, ior ve̱ ya. Nahan ma kwagh u bo kera lu shin ityegh kila ga.

⁴² Tsô orgen za va sha Baal-shalisha, a va na or u Aôndo bredi u iyiagh ki tsutswagh, ikpen i bredi i shair ikundu kua asagher a alakema a ndor ken iba na. Nahan a kaa er: Na ior ve̱ ya.

⁴³ Wanakiriki na kaa er: Kwagh ne nahan di tsô me na ior derii? Kpa a kaa er: Na ior ve̱ ya; gadia TER ngu kaan nahan er, vea ya je á neer ve.

⁴⁴ Tsô a na ve ve ya, neer ve, sha imo i TER kaa la.