2 Utor 3 - ICIGHAN BIBILO

¹ Yehoram wan u Ahaba ya tor sha Iserael ken Samaria ken inyom i sha pue kar anigheni i Yehoshafati tor u Yuda; a tema tor anyom pue kar ahar.

² A er kwagh u ifer sha ishigh ki TER, kpa kuma sha ter na man ngô na ga; gadia a dugh ityôgh ki iwenegh ki Baal, ki ter na tim la, kera.

³ Nahan kpaa a var sha akaabo a Yerobiam wan u Nebati, a a ne Iserael a̱ er a la; a pav a a ga.

⁴ Mesha tor u Moabi lu or u lun a iyôngo, a taan tor u Iserael kpandegh sha ônovmbaiyôngov dubu deri man aive a anomaiyôngo dubu deri.

⁵ Kpa zum u Ahaba kpe yô, tor u Moabi mough hendan a tor u Iserael.

⁶ Nahan tor Yehoram due ken Samaria hen shighe la, a kohol Iserael cii,

⁷ shi a tindi loho hen Yehoshafati tor u Yuda, a kaa er: Tor u Moabi mough sha u hendan a mo, ú rumun ú za a mo imôngo sha u za nôngon ityav a Moabi kpa? A kaa er: Me kôndo; mo m ngu er we yô, ior av mba er ior ou, man anyinya am kpaa nga er anyinya ou yô.

⁸ A kaa er: Ka hanma gbenda sé kôndoo? A gema a kaa er: Ka sha gbenda u ken desereti u Edom.

⁹ Nahan tor u Iserael za, man tor u Yuda kua tor u Edom kpaa; ve due nev ve zende ayange ataankarahar; ve zua a mngerem sha ci u akumautya kua uzendenya mba ve lu zan a ve la ga.

¹⁰ Tsô tor u Iserael kaa er: Kpe ahii! TER yila utor mba utar mban er Una na ve sha ikev i Moabi.

¹¹ Kpa Yehoshafati kaa er: Profeti u TER u sé pine un imo i TER ngu heen gaa? Nahan wanye ugen u tor u Iserael la, gema kaa er: Elisha wan u Shafati ngu heen, u lu haan Eliya mngerem sha ave la.

¹² Tsô Yehoshafati kaa er: Kwaghôron u TER ngu a na. Nahan tor u Iserael man Yehoshafati kua tor u Edom sen her a na.

¹³ Elisha kaa a tor u Iserael er: Ka nyi i zoughom a we? Za hen uprofeti mba teru, kua uprofeti mba ngôu! Kpa tor u Iserael kaa a na er: Ka nahan ga; gadia TER yila utor mba utar mban er Una na ve sha ikev i Moabi.

¹⁴ Elisha kaa a na er: Er TER u akum a Sha, u m til sha ishigh Nagh A lu u uma ne, mimi je, aluer mea we iko sha mlu u Yehoshafati tor u Yuda a lu heen ne ga yô, ma m gem ashe her a we, ma m nenge a we je ga.

¹⁵ Yô, vam ase a or u kuhwan adiguve. Tsô zum u oradiguve ngur kuhwan yô, uwegh ku TER sen sha a na.

¹⁶ Tsô a kaa er: TER ngu kaan nahan er: Time nen ahungwa shin pev ne gbulugh gbulugh.

¹⁷ Gadia TER ngu kaan nahan er: Né nenge a ahumbe ga, man né nenge a ura kpaa ga, nahan kpaa mngerem maa iv shin pev, né ma, ne man ilev yenev kua uzendenya enev.

¹⁸ Kwagh ne ka ankwagh u kiriki tsô sha ishigh ki TER; shi Una na Mbamoabi sha ikev yen kpaa.

¹⁹ Né hembe hanma gar u lun a gir kua hanma gar u i tsough un kpaa, shi né gber hanma kon u dedoo, man né cir azôr cii, shi né vihi hanma ijiir i doon sule sha awen.

²⁰ Tsô kper nan pepe sha shighe u nan nagh nahan, nenge, mngerem, za va sha gbenda u Edom, mngerem va iv ken tar la.

²¹ Er Mbamoabi ungwa er utor va sha u nôngon ityav a ve yô, ve kohol imôngo cii, mba ve kuma u zeren ikav mbi utyav cii kua mbaganden kpaa, ve za tile sha ikighirtar.

²² Mba moughon pepe yô, iyange due ta sha mnger, nahan Mbamoabi nenge mngerem mara nyian ken ica er awambe nahan;

²³ nahan ve kaa er: Ka awambe je, utor mbala nôngo num wua ayol a ve je. Yô, Moabi, za ya nen ishar.

²⁴ Er ve va hen afo a Iserael yô, Mbaiserael mough ta num sha Mbamoabi je, ve yevese; Mbaiserael cir ve ijime gba wuan Mbamoabi yemen hemen.

²⁵ Ve hembe agar; hanma ijiir i doon sule ve haa awen sha mi, hanma or kende iwen i nan her, ve cir awen sha mi; ve kondo azôr cii, ve paa ikon i injaa kera cii, zan zan ve mase undun Kir-hareseti a garawen heregh tseegh; nahan kpaa mbakeren awen sha mzu kase un ta num sha mi.

²⁶ Zum u tor u Moabi nenge ityav hemba un agee yô, a tôô ior deri utaankaruhar mba lun a sanker a na imôngo er una ande hen ian i tor u Edom, kpaa ve kanshio.

²⁷ Nahan a tôô wan na u iunda u ma a va tem tor sha ityough nagh la, a na nagh ku nanden a mi sha gilgar. Tsô iyugh va sha Iserael tsung, nahan ve mough her a na kera, ve hide ken tar ve.