2 Utor 24 - ICIGHAN BIBILO

¹ Sha ayange na la Nebukadinesar tor u Babilon va ityav, nahan Yehoyakim hingir wanakiriki na zan zan anyom atar; ken masetyô yô, a gema a hendan a na.

² Tsô TER tindi akumautya a Mbakaldi man akum a Mbashiria man akum a Mbamoabi man akum a Mbaamon hen a na. A tindi a er a̱ za nôngo ityav a Yuda a̱ tim un sha imo i TER i mbayev Nav uprofeti ôr i sha zwa Na yô.

³ Mimi je ka sha imo i TER kwagh la er Yuda ye, sha er á kar a ve sha ishigh Nagh kera, sha ci u akaabo a Manase, sha akaa a a er cii yô,

⁴ man shi sha ci u awambe a mbaishôôv a a haa yô; gadia a iv Yerusalem a awambe a mbaishôôv nahan TER rumun u den ibo la ga.

⁵ Aeren a Yehoyakim agen man akaa a a er cii yô, i nger a ken ruamabera u abaver a utor mba Yuda la gaa?

⁶ Tsô Yehoyakim yav a uter nav imôngo, wan na Yehoyakin tema tor sha ityough nagh.

⁷ Tor u Igipiti kera seer duen ken tar na ga, gadia tor u Babilon ngohol akaa a a lu a tor u Igipiti cii, hii hen uwagh u Igipiti zan zan ar shin ifi u Uferati.

⁸ Yehoyakin lu anyom pue kar anigheni zum u a ya tor la; a tema tor iwer itiar ken Yerusalem; iti i ngô na er Nehusheta wan u Elnatan u hen Yerusalem.

⁹ A eren ifer sha ishigh ki TER er ter na lu eren nahan cii.

¹⁰ Sha shighe la mbayev mba Nebukadinesar tor u Babilon va hen Yerusalem, i va kase gar sha utya.

¹¹ Nebukadinesar tor u Babilon kpaa va hen gar la zum u mbayev nav kase un la.

¹² Nahan Yehoyakin tor u Yuda due za hen tor u Babilon, un man ngô na man mbatomov nav man mbatamen nav kua mbatomov mba hen ya na; tsô tor u Babilon maa kôr un sha inyom i sha anigheni i a lu tor la.

¹³ Shi a kura ikav mbi injaav mbi ken iyou i TER cii, kua ikav mbi injaav mbi hen ya u tor kpaa, a yem a mi; shi a bugh zenaria u sha akaa a Solomon tor u Iserael lu er ken tempel u TER la, er TER lu kaa yô.

¹⁴ A kura Yerusalem cii, kua mbatamen cii, man ashagbaior cii; mbakwarev lu dubu pue, kua mbafan tomaveegh, man mbavareniwa kpaa, a yem a ve; mô shi ga, saa mbaatsanev mba hen tar la tsô.

¹⁵ A kua a Yehoyakin, a yem a na hen Babilon, kua ngô u tor man kasev mba tor man mbatomov mba hen ya na man mbavesen mba hen tar la, a due a ve uikangen ken Yerusalem, a yem a ve ken Babilon;

¹⁶ ashagbaior cii kpaa, ior dubu utaankaruhar man mbafan tomaveegh kua mbavareniwa dubu, ve cii ve lu mbaageev mbafantyav, ka ve je tor u Babilon yem a ve uikangen ken Babilon ye.

¹⁷ Nahan tor u Babel ver Matania anngô u ter u Yehoyakin tor sha ityough nagh, a gema un iti er Sedekia.

¹⁸ Sedekia lu anyom ikundu kar môm zum u a ya tor la; a tema tor ken Yerusalem anyom pue kar môm; iti i ngô na er Hamutal wan u Yeremia u ken Libena.

¹⁹ A er ifer sha ishigh ki TER er Yehoyakin lu er la cii.

²⁰ Ka sha ishima i vihin i TER, akaa la er ken Yerusalem man Yuda zan zan A ta ve sha ishigh Nagh kera ye.