2 Utor 23 - ICIGHAN BIBILO

¹ Tsô tor tindi i za lôhô mbatamen mba Yuda kua mba Yerusalem cii, ve va kohol hen a na.

² Nahan tor kôndo za sha iyou i TER a ior mba Yuda cii man ior mba ken Yerusalem man upristi man uprofeti kua ior cii, mba kiriki kua mba vesen cii; tsô a ôr akaaôron a ken ruamabera u ikuryan u i zua a mi ken iyou i TER la cii, sha ato a ve.

³ Tor tile hen ityô, a tôndo zwa sha ishigh ki TER, er una dondo TER man una waan atindi a Na iko man mbampase Nav kua akaawan a Na, a ishima na cii kua a uma na cii, una er sha akaaôron a ikuryan a i nger ken ruamabera la vough; ior ci ca cii rumun ikuryan la.

⁴ Tsô Tor kaa zegepristi Hilkia man upristi mba gbiren sha a na, man mbakuranhunda er, ve̱ due a ikav ken tempel u TER cii, mbi i er sha ci u Baal man sha ci u Ashera man shi sha ci u akum a Sha la; a nande mbi ken akôngo a Yerusalem ken mkôngom ma Kideron, a kura mtwem ma mbi, a za a mi hen Betel.

⁵ Shi a dugh upristi mba akombov kera, mba utor mba Yuda lu ver ve er ve̱ nanden kwaghhumandoon sha ajiir a taven sha a ken agar a Yuda kua ken ajiir a a kase Yerusalem la, man mba ve nanden kwaghhumandoon sha ci u Baal man iyange kua uwer man atihi a asan kua akum a Sha cii.

⁶ Shi a dugh Ashera ken iyou i TER kera, a yem a mi ken akôngo a Yerusalem shin uwagh u Kideron, a za nande un shin uwagh u Kideron, a kume un hingir vuwe, a haa vuwe la sha iwar i ior mba ken inya.

⁷ Shi a hembe ayou a Mbasodom, a a lu ken iyou i TER, henpe kasev tumen utenti sha ci u Ashera la.

⁸ A due a upristi cii ken agar a Yuda kera, a hôngor a ajiir a taven sha henpe upristi lu nanden kwaghhumandoon la, hii hen Geba zan zan za ar hen Bersheba je, a hembe ajiir a taven sha a ihindagar, a a lu hen ijiir i nyôron hen hunda u Yosua, orvesen u nengen sha gar la, a a lu vegher u ken uwegh ku imesegh ku hundagar la.

⁹ Upristi mba sha ajiir a taven sha yô, i rumun ve u unden sha atse a TER a nanden nagh sha mi a ken Yerusalem la ga, kpa ve lu yan bredi u i we kwa sha mi ga yô, a anmgbianev vev imôngo.

¹⁰ Shi a hôngor a Tofeti u a lu shin pev u ônov mba Hinom la kpaa, sha er ma or nana̱ de kera eren wan u nan u nomso shin u kwase a̱ karen ken atô u usu sha ci u Moleki ga.

¹¹ Shi a kura anyinya a utor mba Yuda lu na er i̱ civir iyange a mi la kera, hen ijiir i nyôron ken iyou i TER la, hen iyou i Natan-meleki i i suwe ker la, un lu oreren tom ken ya u tor; a nande akeke a iyange sha usu.

¹² Atse a nanden nagh sha mi a a lu sha haav mbu kpoyou u sha u Ahashi, a utor mba Yuda ta la, kua atse a Manase ta a sha ityembe i ihiar i iyou i TER la, tor hembe a, a kura a her kera, a gema avur a a, a haa shin uwagh u Kideron.

¹³ Tor shi hôngor ajiir a taven sha a a lu sha ishigh ki Yerusalem, a a lu uwo u hôngorough vegher u ken uwegh ku yanegh la, a Solomon tor u Iserael maa a sha ci u Ashetaroti, kwaghhôngorough u Mbashidon la, man sha ci u Kemoshi, kwaghhôngorough u Moabi kua sha ci u Milkom, kwaghhôngorough u Mbaamon la kpaa.

¹⁴ Shi a hembe mtôm ma awenem man a gber Asherim, a iv ajiir a ve sha akuhe a ior.

¹⁵ Man shi atse a nanden nagh sha mi a a lu ken Betel kua ijiir i taven sha i Yerobiam wan u Nebati u a na Iserael a er isholibo la, lu er la, atse shon man ijiir i taven sha la, a hembe a, a nande ijiir i taven sha la, a hembe i zan zan hingir vuwe, a nande Ashera la kpaa.

¹⁶ Yoshia gem yô, a nenge a iwar i i lu sha uwo la; nahan a tindi i za dugh akuhe shin iwar la, a nande a sha atse, a hôngor a, sha kwaghôron u TER, u or u Aôndo lu yôô la, un u lu yôô akaa ne la.

¹⁷ Tsô a kaa er: Ka nyi ikav i waregh m nengen mi keelaa? Nahan ior mba hen gar la kaa a na er: Ka uwar u or u Aôndo u lu due ken Yuda la, va yôô akaa a u er sha atse a Betel ne ye.

¹⁸ Tsô a kaa er: De nen un, a̱ lu gir gir, ma or a̱ de kpoghol akuhe na ga. Tsô ve de akuhe a na kua a profeti u lu due ken Samaria la.

¹⁹ Man shi ayou a sha ajiir a taven sha cii a a lu ken agar a Samaria, a utor Mbaiserael lu er sha ci u bamen TER la, Yoshia kar a a kera cii, a er a a vough sha aeren a a er ken Betel la cii.

²⁰ A sôngo upristi mba sha ajiir a taven sha mba ve lu her la cii, sha atse a nanden nagh sha mi la, a nande akuhe a ior sha a; tsô a hire ken Yerusalem.

²¹ Tsô tor kaa a ior cii er: Er nen TER, Aôndo wen, iniongo i Paseka er i nger ken ruamabera u ikuryan ne nahan.

²² I vande eren injainiongo i Paseka er ngin nahan ga, hii sha iyange i mbaajiriv mba ve lu ôron Iserael ajir je, shin ken ayange a utor mba Iserael cii, shin ken a utor mba Yuda kpaa ga;

²³ kpa sha inyom i sha pue kar anigheni i tor Yoshia la yô, i er TER iniongo i Paseka ne ken Yerusalem.

²⁴ Man shi mba ve lu a ujijingi mba mbakpenev man mba tsengan pasen akaa man uterafim man ieev kua akaa a ihôngorough cii a i nenge a mi ken tar u Yuda, man ken Yerusalem yô, Yoshia due a mi kera, sha u una taver akaaôron a atindigh a i nger ken ruamabera u pristi Hilkia zua a mi ken iyou i TER la.

²⁵ Ma tor ugen vande lun er un nahan ga, u nan gema hen TER a ishima i nan cii man uma u nan cii man agee a nan cii, sha atindi a Mose cii, er un nahan ga, ken ijime na kpaa mô mough er un nahan ga.

²⁶ Nahan kpaa, TER de iyugh Na i tsung i A yuwe a Yuda la ga, sha ci u mbam u Manase bam Un a mi la cii.

²⁷ TER kaa er: Me kar a Yuda sha ishigh Yagh kera, er M kar a Iserael kera nahan, shi Me gbihi gar u Yerusalem u M tsough ne kera, kua iyou i M ôr kwagh u i, M kaa Mer: Iti Yam ia lu ker la kpaa.

²⁸ Aerenakaa a Yoshia agen man kwagh u a er cii yô, i nger a ken ruamabera u abaver a utor mba Yuda la gaa?

²⁹ Sha ayange na la, Farao-neko tor u Igipiti kôndo sha u za nôngon ityav a tor u Ashiria hen ifi u Uferati; tsô tor Yoshia za nôngo ityav a na, kpa a wua un hen Megido zum u a nenge a na yô.

³⁰ Tsô mbayev nav tôô un kpenegh sha ikyekye hen Megido, ve va a mi ken Yerusalem, ve va ii un shin uwar na. Tsô ior mba hen tar la ve tôô Yehoahashi wan u Yoshia, ve shighe un mkurem, ve ver un tor sha ityough ki ter na.

³¹ Yehoahashi lu anyom ikundu kar atar zum u a ya tor la; a tema tor ken Yerusalem iwer itiar, iti i ngô na er Hamutal wan u Yeremia u hen Libena.

³² A eren ifer sha ishigh ki TER, er uter nav lu eren nahan cii.

³³ Farao-neko kôr un za ver un hen Ribela uikangen ken tar u Hamati sha u a̱ de kera tem tor ken Yerusalem ga yô; shi a ya tar la zwajirigh sha azurfa utalenti deri kua zenaria talenti môm.

³⁴ Farao-neko ver Eliakim wan u Yoshia tor sha ityough ki ter na Yoshia, a gema un iti er Yehoyakim; kpa a gema a yem a Yehoahashi ken Igipiti, a za kpe ker.

³⁵ Nahan Yehoyakim na Farao-neko azurfa kua zenaria la, kpa a wa tar la kpandegh sha u una na inyaregh sha imo i Farao yô, a kura azurfa man zenaria hen ior mba hen tar la, hanma or sha kpandegh ku i we nan yô, sha ci u tan Farao-neko kpandegh a mi.

³⁶ Yehoyakim lu anyom ikundu kar ataan zum u a ya tor la; a tema tor ken Yerusalem anyom pue kar môm, iti i ngô na er Sebida wan u Pedaia u hen Ruma.

³⁷ A eren ifer sha ishigh ki TER, er uter nav lu eren nahan cii.