2 Utor 22 - ICIGHAN BIBILO

¹ Yoshia lu anyom anigheni zum u a ya tor la; a tema tor ken Yerusalem anyom ikundugber kar môm; iti i ngô na er Yedida, wan u Adaia u Bosekati.

² A eren kwagh u dedoo sha ishigh ki TER, a zaan sha gbenda u ter na Davidi cii, a kaha ken uwegh ku yanegh shin ku imesegh kpaa ga.

³ Tsô sha inyom i sha pue kar anigheni i tor Yoshia la, tor tindi Shafan wan u Asalia, wan u Meshulam, orngeren, hen iyou i TER; a kaa er:

⁴ Za hen zegepristi Hilkia, a̱ ôr inyaregh ki i ve a mi ken iyou i TER, ki mbakuranhunda ve ngohol hen ior, ve kohol la;

⁵ ve̱ na ki sha ikev i mbatomov mba ve nenge sha tom u iyou i TER yô, sha u ve̱ gema ki ve̱ na mba ve eren tom ken iyou i TER, sha u ve̱ sôr ajiir a vihin a sha iyou la,

⁶ ka mbagbanakaa man mbamaankwagh kua mbamaan sha akam, man sha ci u yamen ikon man awen a kuan sha u sôron iyou la.

⁷ Nahan á kera pine ve kwagh sha inyaregh ki i na sha ikev ve la ga, gadia ve lu eren tom ve sha mimi.

⁸ Tsô zege pristi Hilkia kaa a Shafan orngeren la er: M zua a ruamabera u atindigh ken iyou i TER. Nahan Hilkia gema ruamabera la na Shafan, a ôr.

⁹ Tsô Shafan orngeren la va hen tor, a va ôr tor; a kaa a na er: Mbayev ou dugh inyaregh ki i zough a ki ken iyou la cii ve gema ki ve na sha ikev i mbatomov mba ve nengen sha tom u iyou i TER la.

¹⁰ Shi Shafan ôr tor ruamabera la.

¹¹ Er tor ungwa akaaôron a ken ruamabera u atindigh la yô, a ande akondo a na.

¹² Nahan tor ôr a pristi Hilkia kua Ahikam wan u Shafan man Akebor wan u Mikaia man Shafan orngeren kua Asaia wanakiriki u tor la, a kaa er:

¹³ Za, za pine nen TER sha ci wam man sha ci u ior kua sha ci u Yuda cii kpaa, sha kwagh u akaaôron a ruamabera u i zough a mi ne, gadia iyugh i TER haa sha a vese, vese je, ngi yeghen a yegh; gadia uter asev lu wan iko sha akaaôron a ruamabera u atindigh sha u eren sha kwagh u i wa se la cii ga.

¹⁴ Nahan pristi Hilkia man Ahikam man Akebor kua Shafan man Asaia ve za hen Hulda, profeti u kwase, kwase u Shalum, wan u Tikwa, wan u Harhashi, orkuran iyou i akondogh (ya na lu ken Yerusalem, ken gar u he), ve za ôr kwagh a na.

¹⁵ A gema a kaa a ve er: TER, Aôndo u Iserael, ngu kaan nahan er: Za za kaa nen or u a tindi ne her a mo la ner:

¹⁶ TER ngu kaan nahan er: Nenge, Me va a ican sha ijiir ne, kua sha mba ve tem ken i kpaa, ka akaaôron a ruamabera u tor u Yuda a er la cii;

¹⁷ gadia ve undum ve gema ve nande mbaaôndo mbagenev kwaghhumandoon sha u vea bamen sha tom u ave ve la cii; nahan iyugh Yam ia yegh hen ijiir ne, ia kera pir ga.

¹⁸ Kpa tor u Yuda u a tindi ne sha u ne va pine imo i TER yô, za kaa nen un nahan ner: TER, Aôndo u Iserael, ngu kaan nahan er: Sha kwagh u akaaôron a u ongo la yô,

¹⁹ er u lu a ishima i legh legh u hire a iyol you ijime sha ishigh ki TER, zum u u ongo kwaghôron u M er sha ijiir ne, kua sha mba ve tem ken i kpaa, Mer, vea hingir kwagh u cieryol man kwagh u i we un ifan yô, man u ande akondo a ou, shi u vaa sha ishigh Yagh kpaa, nahan, Mo kpaa M ungwa u, kape TER A kaa la.

²⁰ Nahan yô, nenge, Me kohol we a uter ou imôngo, á hungwa a we shin uwar bem bem, ashe ou aa nenge bokwagh u Me va a mi sha ijiir ne je ga. Tsô ve shi ve hire hen tor ve va ôr un nahan.