2 Utor 21 - ICIGHAN BIBILO

¹ Manase lu anyom pue kar ahar zum u a ya tor la; a tema tor ken Yerusalem anyom akunduahargber kar ataan; iti i ngô na er Hefeshiba.

² A er kwaghbo sha ishigh ki TER, a zaan sha akaahôngorough a akuraior a TER lu zenda sha ishigh ki Mbaiserael kera la.

³ Gadia a shi a maa ajiir a taven sha a ter na Hesekia lu vihi kera la; a ta atse a nanden nagh sha mi imôngo je sha ci u Baal, a er Ashera kpaa, er Ahaba tor u Iserael lu er nahan, a guren civir akum a Sha cii, a waan a iko.

⁴ Shi a ta atse a nanden nagh sha mi imôngo ken iyou i TER, i TER lu kaa er: Ka ken Yerusalem Me ver iti Yam la.

⁵ Shi a ta atse a nanden nagh sha mi imôngo sha ci u akum a Sha cii, hen ityembe i ihiar i iyou i TER la.

⁶ Shi a er wan na kar ken atô u usu, a eren ahir, man lu veren ishima sha ishor i kpehen, a ver mba ve lu a ujijingi mba mbakpenev kua mbatsenganpasen akaa; a er ifer kpishi sha ishigh ki TER, sha u bamen Un.

⁷ Shi a ver eev mbu Ashera mbu gban a gba mbu a er la, ken iyou i TER ôr kwagh u i a Davidi kua wan na Solomon er: Ka ken iyou ne, kua ken Yerusalem u ken ikwe i Iserael cii M tsough un ne, Me ver iti Yam i̱ lu her gbem ye;

⁸ man Me er angahar a Iserael á kera due ken tar u M ne uter vev ne, á zenden wue wue ga, aluer vea waan iko sha imo Yam cii yô, shi vea eren sha atindiakaa cii a wanakiriki wam Mose lu wa ve yô.

⁹ Kpa ve ver ato ga; Manase kpaa mee ve u eren ifer, hemba akuraior a TER lu tim a sha ishigh ki Mbaiserael kera la.

¹⁰ Tsô uprofeti, mbayev mba TER or kwagh sha zwa Na kaa er:

¹¹ Er Manase tor u Yuda a er akaa a ihôngorough ne, man a er ifer, hemba i Mbaamor lu er la cii, mba ve vande lun a na, shi a na Yuda u eren kwaghbo sha ieev nav,

¹² nahan TER, Aôndo u Iserael, ngu kaan er: Nenge, Me va a ican sha Yerusalem kua Yuda, inja i hanma or u nana ungwa gwa u i yô, a hingir nan ken ato gbong.

¹³ Man shi Me kar Yerusalem sha ikaren i Samaria man ikaren i ya u Ahaba; Me ese Yerusalem er or ka nan ese tasa nahan, nan ese, nan cir un zwa inya.

¹⁴ Shi Me haa dyako Wam u a shi her la kera, Me na ve sha ikev i mbaihomov vev; vea hingir ishar i yan; man mbaihomov vev vea sar ve cii;

¹⁵ gadia ve er ifer sha ishigh Yagh, ve bamen hii sha iyange i uter vev due ken Igipiti la je, zan zan nyian.

¹⁶ Shi Manase haa awambe a mbaishôôv kpishi kpaa, a iv Yerusalem a a, hii ken ikighir ne ar ken ngila, seer sha kwaghbo na u a ne Yuda a er la; nahan a hingir u eren ifer sha ishigh ki TER.

¹⁷ Aerenakaa a Manase agen man akaa a a er cii, kua kwaghbo u a er yô, i nger a ken ruamabera u abaver a utor mba Yuda la gaa?

¹⁸ Tsô Manase yav a uter nav imôngo, i ii un ken sule na u hen ya na, ka sule u Usa je la; wan na Amon gema tema tor sha ityough nagh.

¹⁹ Amon lu anyom ikundu kar ahar zum u a ya tor; a tema tor ken Yerusalem anyom ahar; iti i ngô na er Meshulemeti wan u Harushi u hen Yoteba.

²⁰ A er kwaghbo sha ishigh ki TER er ter na Manase lu er nahan.

²¹ A za sha igbenda i ter na cii; a civir ieev mbi ter na lu civir la, a gure a civir mbi.

²² A undu TER, Aôndo u uter Nav, a lu zan sha gbenda u TER ga.

²³ Tsô mbatomov mba tor Amon zua zwa sha a na, ve wua tor ken ya na.

²⁴ Kpa ior mba hen tar la, gema wua di ior mba ve zua zwa sha tor Amon la cii; tsô ior mba hen tar la gema kôr wan na Yoshia tor sha ityough nagh.

²⁵ Aerenakaa agen a Amon er yô, i nger a ken ruamabera u abaver a utor mba Yuda la gaa?

²⁶ I ii un ken uwar na, ken sule u Usa. Wan na Yoshia gema tema tor sha ityough nagh.