2 Utor 20 - ICIGHAN BIBILO

¹ Tsô sha ayange la Hesekia gba angev je, gba nôngon ku. Nahan profeti Yesaia wan u Amoshi va her a na, va kaa a na er: TER ngu kaan nahan er: Sôr akaa hen ya wou, gadia kpen you, ú war ga.

² Tsô a gema ishigh ken kpekpe, a sôn TER, a kaa er:

³ TERE, shi umbur er m zende sha ishigh You sha mimi a ishima i jighilii, shi m er akaa a dedoo sha ashe a Ou kpaa yô. Nahan Hesekia gba vaan tsung.

⁴ Tsô er Yesaia za ar her atô u gar yô, imo i TER va her a na kaa er:

⁵ Hide, za kaa Hesekia, orhemenegh u ior Av wer: TER, Aôndo u teru Davidi, ngu kaan nahan er: M ungwa msen wou, M nenge mliam ou kpaa; yô, Me bee u angev; sha iyange i sha utar la ú kôndo ú za sha iyou i TER.

⁶ Me seer we anyom pue kar ataan sha ayange a ou; shi Me yima u kua gar ne cii sha ikev i tor u Ashiria; Me shi Me yisa gar ne sha ci Wam iyol Yam man sha ci u wanakiriki Wam Davidi kpaa.

⁷ Tsô Yesaia kaa er: Za tôô ijen i atam a tur va a mi. Nahan ve za tôô, ve penda sha ityundu la, tsô angev mbula bee un.

⁸ Hesekia gema kaa a Yesaia er: Ka nyi ia lum ikav i TER Una beem angev man me kôndo me za nyôr ken iyou i TER sha iyange i sha utar laa?

⁹ Yesaia kaa er: Kwagh u una lu u ikav i i dugh hen TER, er TER Una er kwagh u A kaa la yô: Ka u ka mure a̱ kporom ken hemen ihange pue, shin a̱ hire ijime ihange pue?

¹⁰ Hesekia gema kaa er: U mure a̱ za sen ihange pue la ka ican ga; yô, mure a̱ hire ijime ihange pue.

¹¹ Tsô profeti Yesaia sôn TER, nahan A hire a mure ijime ihange pue, u a vande senen sha anar u tesen mzende u iyange u Ahashi la.

¹² Hen shighe la je Berodaki-baladan wan u Baladan, tor u Babilon, tindi mbatyomov hen Hesekia a washika kua iwua; gadia a ungwa er Hesekia lu gba angev yô.

¹³ Hesekia ungwa kwaghôron ve; a tese ve iyou na i koson akaa ker cii, azurfa man zenaria man ilyôghonov man mkurem ma injaam man iyou na i ikav mbi utyav cii, man akaa a a lu ken ayou a na a koson ikav ker cii; ma kwagh u ken ya na, shin u ken tar na cii, u Hesekia de tesen ve yô, lu ga.

¹⁴ Tsô profeti Yesaia va hen tor Hesekia va pine un er: Ior mban kaa nana? Man ka han ve dugh ve ve her a wee? Hesekia kaa er: Ve due ken tar u icaa, ken Babilon je.

¹⁵ A pine er: Ka nyi ve nenge a mi ken ya wouwe? Hesekia gema kaa er: Akaa a a lu ken ya wam cii ve nenge a mi; ma kwagh môm u a lu ken ayou am a koson ikav ker cii u m tese ga yô, ngu ga.

¹⁶ Tsô Yesaia kaa a Hesekia er: Ungwa ase kwaghôron u TER.

¹⁷ Nenge, ayange nga van a akaa a a lu ken ya wou cii kua akaa a uter ou ve koso cii, zan zan nyian ne, á kura a, á yem a mi ken Babilon; kwagh môm una shi ga, kape TER A kaa la.

¹⁸ Ônov ou mba vea due ken a we, mba wea mar ve je, á kôr mbagenev á yem a ve, vea za hingir mbaerentom ken ya u tor u Babilon.

¹⁹ Tsô Hesekia gema kaa a Yesaia er: Imo i TER i u kaa la, i dio tsô. Shi a kaa er: Gayô, sha ayange am, bem man mkpeyol vea lu.

²⁰ Aerenakaa a Hesekia agen kua agee a na cii man er a er ityungumnger man akpamnger sha er mngerem ma nyôr ken gar la, i nger a ken ruamabera u abaver a utor mba Yuda la gaa?

²¹ Tsô Hesekia yav a uter nav imôngo; Manase wan na gema tema tor sha ityough nagh.