2 Utor 2 - ICIGHAN BIBILO

¹ Tsô zum u kuma TER pe Una tôô Eliya sha hiar, Una yem a na Sha yô, Eliya mough hen Gilgal a Elisha imôngo.

² Eliya kaa a Elisha er: Ma u lu heen yôô, gadia TER tindim hen Betel. Kpa Elisha kaa er: Er TER A lu u uma man we kpaa u lu uma ne, me undu u ga. Tsô ve sen shin Betel.

³ Yô, uprofeti mba ve lu ken Betel la, ve due ve za kegh Elisha gbenda, ve kaa a na er: U fa er TER Una tôô teru sha ishigh you kera nyian kpa? A kaa er: Een, m fa! Huan nen ving tsô.

⁴ Tsô Eliya kaa a na er: Elisha, shi lu heen, gadia TER tindim hen Yeriko. Kpa a kaa er: Er TER A lu u uma man we kpaa u lu uma ne, me undu u ga. Tsô ve va ken Yeriko.

⁵ Nahan uprofeti mba ve lu ken Yeriko la, ve kporom, hen Elisha, ve kaa a na er: U fa er TER Una tôô teru sha ishigh you kera nyian kpa? A gema a kaa er: Een, m fa! Huan nen ving tsô.

⁶ Tsô Eliya kaa a na er: Shi lu heen, gadia TER tindim hen Yordan. A kaa er: Er TER A lu u uma man we kpaa u lu uma ne, me undu u ga. Nahan ve gba yemen hemen.

⁷ Tsô uprofeti ior akunduahargber ve za, ve za tile ken ica, ve ver ishigh sha a ve; ve uhar ve tile hen kpe u Yordan.

⁸ Tsô Eliya kôr riga na, hure, gbidye sha mnger, nahan ma tôndo, ma shaam tile, ma shinim kuwa; ve uhar ve per sha tareghnyaagh.

⁹ Er ve per yô, Eliya kaa a Elisha er: Kaam kwagh u m̱ er u yô, er m lu a pav a we ga ne. Elisha kaa er: Shi rumun ikwar ihiar i jijingi wou i̱ gba sha a mo.

¹⁰ A kaa a na er: U sôn kwagh u ican tsô; nahan kpaa, aluer wea nengen a mo zum u á tsuwem her a we kera la yô, á lu nahan; kpa aluer ka nahan ga yô, á lu nahan je ga.

¹¹ Tsô er ve lu ôron kwagh yemen la, nenge, ikyekye i usu kua anyinya a usu va ande, pav ve; tsô Eliya kôndo sha hiar yem Sha.

¹² Elisha nenge, gba yilan er: Terem, terem, akeke a Iserael kua mbaanyinyav nav kpaa! A kera seer nengen a na ga; nahan a kôr ikondo na a ande abamber ahar.

¹³ Shi a tôô riga u Eliya u a osough un a gba la, a hide a va tile hen kpe u Yordan.

¹⁴ A kôr riga u Eliya u a osough un a gba la, a gbidye sha mnger, a kaa er: TER, Aôndo u Eliya, ngu hana? Er a gbidye sha mnger yô, mngerem tôndo; tsô Elisha per.

¹⁵ Zum u uprofeti mba ve lu ken Yeriko, vegher u sha ishigh nagh la, za nenge a na, ve kaa er: Jijingi u Eliya tema sha Elisha ve. Tsô ve va, ve va kohol un, ve gure inya sha ishigh nagh.

¹⁶ Ve kaa a na er: Nenge, ior mba taver ayol akunduahargber, mba heen, a mbayev ou imôngo, shi rumun, ve̱ za ker teru, gayô, alaghga Jijingi u TER kende a na sha, za gbihi un sha ma uwo, shin shin ma pev. A kaa er: De tindin nen ga.

¹⁷ Er ve za un iyol zan zan kuma un iyol yô, a kaa er: Tindi nen. Nahan ve tindi ior akunduahargber; ve gba za keren ayange atar, kpa ve zua a na ga.

¹⁸ Tsô ve hide her a na, er a lu ngôôr ken Yeriko la; nahan a kaa a ve er: M kaa ne gaa, mer, de kera ze nen ga ga?

¹⁹ Tsô ior mba ken gar ve kaa a Elisha er: Nenge, mlu u gar heen ne, doo, er terem kpaa a nengen nahan; kpa mngerem doo ga, inya kpaa doo iyiav ga.

²⁰ A kaa er: Va nam nen tasa u he, haa nen bar shimi. Tsô ve va na un.

²¹ Nahan a due a za hen imbormnger, a za haa bar shimi, a kaa er: TER ngu kaan nahan er: M sôr mngerem man; ku man iyiagh ki vihin vea kera due sha mi ga.

²² Nahan mngerem hingir dedoo zan zan nyian, sha mkaanem ma Elisha kaa la.

²³ A mough keela a gba kôndon zan sha Betel; er a lu kôndon sha gbenda la yô, anmbayev mba nomso due ken gar gba nahan un tar, ve kaa a na er: Kôndo yem Sha, we orkpuluntyough ne; kôndo, yem Sha, we orkpuluntyough ne!

²⁴ Tsô a gema ashe a kenger ve a wa ve ifan ken iti i TER. Nahan ungômbadwem uhar due shin ikô va kôr anmbayev nomso mbagenev akunduahar kar uhar ken ve, ande.

²⁵ Tsô a mough keela, a za sha uwo u Karmel; shi a za mough keela, a hide ken Samaria.