2 Utor 17 - ICIGHAN BIBILO

¹ Sha inyom i sha pue kar uhar i Ahashia tor u Yuda la, Hoshea wan u Ela ya tor ken Samaria sha Iserael, tsa tor anyom ataankaranyiin.

² A eren ifer sha ishigh ki TER, kpa i ar sha utor mba Iserael mba ve vande a na mbala ga.

³ Shalmaneser tor u Ashiria va nôngo ityav a na; tsô Hoshea gema hingir wanye na, gba tan un kpandegh.

⁴ Kpa tor u Ashiria kav er Hoshea a zough zwa a ior sha a na yô, gadia a tindi mbatyomov hen So, tor u Igipiti, a kera na tor u Ashiria kpandegh er a eren anyom anyom nahan la ga; nahan tor u Ashiria wuhe un ken gaadi.

⁵ Tsô tor u Ashiria kôndo kar hen atô u tar la cii, za sha Samaria, za kase un anyom atar.

⁶ Sha inyom i sha utaankarunyiin i Hoshea la, tor u Ashiria ngohol Samaria, a kura Iserael, a yem a ve uikangen ken Ashiria, a za ver ve ken Hala man hen kpe u Habor ifi u ken Gosan, man ken agar a Mbamede.

⁷ Gadia Mbaiserael er TER, Aôndo ve, kwaghbo, u A due a ve ken tar u Igipiti sha ikev i Farao tor u Igipiti la, ve civir mbaaôndo mbagenev,

⁸ ve zaan sha aeren a akuraior a TER zenda a sha ishigh ki Mbaiserael kera la, kua aeren a utor mba Iserael ve ver a la.

⁹ Mbaiserael er akaa ken myer a a lu sha mi ga yô, a a vihi TER, Aôndo ve, ishima yô; ve maa ajiir a taven sha ken agar a ve cii, hii hen daar u mbakuran je, zan zan za ar hen gar u lun a gir;

¹⁰ ve tim mtôm ma awenem sha ci u ve ayol a ve kua Asherim kpaa, sha hanma igungu u taven man shin hanma kon u lun a mure;

¹¹ ka sha her sha ajiir a taven sha la cii, ve nanden kwaghhumandoon, vough er akuraior a TER lu kura a sha ishiv vev yem a a kera la, lu eren nahan; ve er akaabo, ve bam TER,

¹² ve civir ieev mbi TER vande ôron kwagh u mbi, kaa er: De eren nen kwagh ne ga la.

¹³ Kpa TER pase Iserael kua Yuda sha hanma profeti man hanma ornengenakaa er: Gema nen, undu nen aferakaa a en, waan nen atindi a Am man akaawan a Am iko sha gbenda u atindiakaa cii a M wa uter enev man shi a M tindi ne a mi sha ikev i mbayev Av, uprofeti la.

¹⁴ Nahan kpaa, ve venda u ungwan, ve nômbo ikôr, er uter vev mba ve na TER, Aôndo ve, jighjigh ga la nahan.

¹⁵ Ve venda akaawan a Na man ikuryan Na i A ya a uter vev kua mbampase Nav mba A pase ve kpaa; ve gema, ve dondo akaagbilinigh zan zan ve hingir dang, ve dondo akuraior a a kase ve la, a TER wa ve tindi sha kwagh ve er, ve̱ de eren er ve nahan ga la.

¹⁶ Man shi ve undu atindi a TER, Aôndo ve, cii, ve er ieev mbi keren a ker, ka anibuav mba uhar je la, shi ve er Ashera, ve gure ve civir akum a Sha cii, ve civir Baal kpaa.

¹⁷ Ve er ônov vev mba nomso kua mba kasev, ve kar ken usu, ve kpehe asor, shi ve er ahir, ve tee ayol a ve sha u eren ifer sha ishigh ki TER, bamen Un.

¹⁸ Nahan ishima vihi TER a Iserael kpishi, A kar a ve sha ishigh Nagh kera, mô kera shi ga, saa kwe u Yuda tseegh.

¹⁹ Yuda je kpaa wa atindi a TER, Aôndo ve, iko ga, ve lu zenden sha aeren a Iserael ver a la.

²⁰ Nahan TER venda tsombor u Iserael cii, A er ve ican, A na ve sha ikev i mbayanshar zan zan A zenda ve sha ishigh Nagh kera.

²¹ Gadia A tsuwe Iserael, A pav ve a ya u Davidi kera; nahan ve kôr Yerobiam wan u Nebati tor; tsô Yerobiam urugh ve, ve de u dondon TER, a na ve er zegekwaghbo.

²² Mbaiserael lu zan sha asorabo a Yerobiam lu er la cii; ve undu a ga;

²³ zan zan TER kar a Iserael sha ishigh Nagh kera, er lu kaa mbayev Nav uprofeti ve gema ve ôr yô; ka nahan man i dugh Iserael ken tar na kera, i yem a ve ken Ashiria uikangen zan zan nyian ye.

²⁴ Tsô tor u Ashiria za va a ior ken Babilon man ken Kuta man ken Ava man ken Hamati kua Sefarvaim, a va ver ve ken agar a Samaria sha ityough ki Mbaiserael; tsô ve ngohol Samaria ve tema ken agar a na.

²⁵ Sha mtem ve ker, hiihii la, ve cian TER ga; nahan, TER tindi ubegha ken a ve va pande ior vev mbagenev, wua.

²⁶ Nahan ve ôr kwagh a tor u Ashiria ve kaa er: Akuraior a u kor, u va ver ken agar a Samaria la, ve fa atindi a Aôndo u tar ne ga, nahan A tindi ubegha ken a ve, nenge, mba va wuan ve je, gadia ve fa atindi a Aôndo u tar ne ga.

²⁷ Tsô tor u Ashiria kaa er: Yô, tsuwa nen pristi môm ken mba ne kor kera la, a̱ yem a̱ za tema ken ijiir la a̱ tesen ve atindi a Aôndo u tar la.

²⁸ Tsô pristi môm u ken mba ve kor ken Samaria kera la, mough va tema ken Betel, a va tese ve er vea er man vea civir TER yô.

²⁹ Nahan kpaa hanma ikurior er aôndo u i, ve ver ve ken utempel mba sha ajiir a taven sha a Mbasamaria lu er yô, hanma ikur ken agar a ve, henpe ve tema yô.

³⁰ Ior i Babilon er Sukoti-benoti, ior i Kuta er Nergal, ior i Hamati er Ashima,

³¹ man Mbaava er Nibahashi man Tartaki; man Mbasefarvaim yô, ve nande ônov vev ken usu sha ci u Adrameleki kua Anameleki, mbaaôndo mba Sefarvaim.

³² Shi ve cian TER kpaa, ve sange ior ken iniongo ve cii, ve ver ve upristi sha ajiir a taven sha, mbala eren ve tom ken utempel mba sha ajiir a taven sha la.

³³ Nahan ve cian TER, kpa ve gema ve civir mbaaôndo vev sha inja i aeren a akuraior a i za kura ve ken a la.

³⁴ Zan zan nyian je kpaa mba eren aeren a tsuaa la her. Ve cian TER ga, man ve kera eren sha akaawan, shin sha akaaôron a jirigh, shin sha atindiakaa, shin sha tindi u TER wa ônov mba Yakob u A ii un iti er Iserael la, ga,

³⁵ mba TER ya ikur a ve, man A wa ve kwagh er: De cie nen mbaaôndo mbagenev ga, man shi de gur civir nen ve ga, de eren nen ve tom ga, de ne nen ve nagh kpaa ga;

³⁶ kpa TER, u A due a ven ken tar u Igipiti sha agee a vesen kua sha uwegh ku naregh, ka Un cian nen Un ye, shi ka Un guren civir nen Un ye, man shi ka Un kpaa naan nen Un nagh ye;

³⁷ akaawan man akaaôron a jirigh man atindiakaa kua inezwa i A ne ne la, wa nen iko, eren nen sha mi gbem; man de cie nen mbaaôndo mbagenev ga;

³⁸ ikuryan i M ya a ven kpaa, i̱ de hungul ne ga; man shi de cie nen mbaaôndo mbagenev ga,

³⁹ kpa ka TER, Aôndo wen, né cian Un ye; wen Una yima ne sha ikev i mbaihomov enev cii.

⁴⁰ Nahan kpaa, ve ver ato ga, ve er sha inja ve i tsuaa la.

⁴¹ Kape akuraior ne, ve cian TER shi ve civir ieev vev mbi gban a gba la; ônov vev kua ônov mba ônov vev kpaa eren er uter vev lu er yô, zan zan nyian.