2 Utor 16 - ICIGHAN BIBILO

¹ Sha inyom i sha pue kar utaankaruhar i Peka wan u Remalia la, Ahashi, wan u Yotam tor u Yuda, ya tor.

² Ahashi lu anyom ikundu zum u a ya tor la, a tema tor anyom pue kar ataratar ken Yerusalem; a eren kwagh u dedoo sha ishigh ki TER, Aôndo na, er ter na Davidi nahan ga;

³ kpa a zaan sha gbenda u utor mba Iserael, zan zan je yô, a er wan na kar ken atô u usu sha inja i kwaghhôngorough u atôatyev a TER lu zendan a sha ishigh ki Mbaiserael kera la.

⁴ Shi a naan nagh, a nanden kwaghhumandoon sha ajiir a taven sha man sha iwo kua shin hanma itinekon i lun a mure.

⁵ Tsô Reshin tor u Shiria man Peka, wan u Remalia, tor u Iserael ve va sha u nôngon ityav a Yerusalem; ve kase Ahashi, kpa ve fatyô u hemban un ga.

⁶ Hen shighe la, Reshin tor u Shiria shi ngohol Elati hingir ijiir i Shiria, a zenda Mbayuda ken Elati kera; nahan Mbashiria va hen Elati, ve va tema ker zan zan nyian.

⁷ Tsô Ahashi tindi mbatyomov za hen Tigelati-pileser tor u Ashiria, kaa er: Mo m ngu wanakiriki wou man wan wou kpaa, yô, va yimam sha ikev i tor u Shiria man sha ikev i tor u Iserael, mba ve mough ityav a mo ne.

⁸ Shi Ahashi tôô azurfa kua zenaria mba i zua a mi ken iyou i TER man ken ayou a koson akaa ker a ken ya u tor, a tindi tor u Ashiria a mi iwua.

⁹ Tsô tor u Ashiria ungwa imo na; nahan tor u Ashiria kôndo za nôngo ityav a Damaseku, a hemba un je, a kura ior a yem a ve uikangen ken Kir, a wua Reshin.

¹⁰ Tsô tor Ahashi za ken Damaseku, za kegh Tigelati-pileser tor u Ashiria gbenda; er a nenge a atse a nanden nagh sha mi a a lu ken Damaseku la yô, nahan tor Ahashi tindi pristi Uria a foto u atsegh la, kua eev mbu a, sha inja i i er a cii.

¹¹ Tsô pristi Uria ta atse la, lu vough er a tor Ahashi tindi un a mi ken Damaseku la nahan; kape Uria er, man tor Ahashi mase za hiden ken Damaseku la.

¹² Er tor za hide ken Damaseku yô, tor nenge a atse shon, nahan tor kporom hen atse la, na nagh sha a.

¹³ A nande nagh ku nanden kua nagh nagh ku sha samuyia kpaa, a too nagh nagh ku man, shi a haa awambe a iniav nav mbi bem sha atse.

¹⁴ Atse a togula a nanden nagh sha mi a a lu sha ishigh ki TER la, a tôô a sha ishigh ki iyou hen harga u atse a na a iyou i TER kera, a gema a ver a vegher u atse a na u ken imbusutarimese la.

¹⁵ Tsô tor Ahashi kaa a pristi Uria er: Nande nagh ku nanden ku pepegh sha zegeatse nagh ku sha samuyia ku aikighe kpaa, man nagh ku nanden ku tor man nagh nagh ku sha samuyia man shi nagh ku ior mba tor la cii, man nagh vegh ku sha samuyia kua nagh ku man; haa awambe a nagh ku nanden cii sha a, kua awambe a nagh ku sôngon cii kpaa; atse a togula la yô, me mase fan kwagh u me er sha mi yô.

¹⁶ Kape pristi Uria er la, er tor Ahashi kaa un nahan cii.

¹⁷ Shi tor Ahashi tôndo ikpande i ken ambusu i asange la kera, tasa la a tôô un sha abua a togula a a lu shin ityô na la kera, a gema un a penda sha awen.

¹⁸ Man shi gbenda u i saan u sha, sha ci u iyange i memen, u i maa u ken iyou la, kua hunda u tor nyôron min ken won la, a due a mi ken iyou i TER kera sha ci u tor u Ashiria.

¹⁹ Aerenakaa a Ahashi agen a a er yô, i nger a ken ruamabera u abaver a utor mba Yuda la gaa?

²⁰ Tsô Ahashi yav a uter nav imôngo, i ii un a uter nav imôngo ken gar u Davidi; wan na Hesekia gema tema tor sha ityough nagh.