2 Utor 14 - ICIGHAN BIBILO

¹ Sha inyom i sha uhar i Yoashi, wan u Yehoahashi, tor u Iserael la, Amashia, wan u Yoashi, tor u Yuda ya tor.

² A lu anyom ikundu kar ataan zum u a ya tor la; a tsa tor anyom ikundu kar ataankaranyiin ken Yerusalem, iti i ngô na er, Yehoadan u Yerusalem.

³ A eren kwagh u dedoo sha ishigh ki TER, kpa a ar sha ter na Davidi ga; a er kwagh u ter na Yoashi lu er la cii.

⁴ Nahan kpaa i vihi ajiir a taven sha la ga; ior lu nan nagh shi lu nanden kwaghhumandoon sha ajiir a taven sha la her.

⁵ Tsô zum u tor taver sha uwegh nagh yô, a wua mbatomov nav mba ve wua tor u a lu ter na la,

⁶ kpa a wua ônov mba mbawuanior mbala ga; er i nger ken ruamabera u atindigh u Mose nahan, er TER kaa yô, er: De woo uter sha ci u ônov vev ga, man shi de woo ônov sha ci u uter vev ga; kpa hanma or nana̱ kpe sha ci u kwaghbo u nan iyol i nan.

⁷ A wua ior mba Edom dubu pue shin Pev u Bar, a hemba Sela ityav, a maa a ii un iti er Yoketeel, zan zan nyian.

⁸ Tsô Amashia tindi mbatyomov hen Yoashi, wan u Yehoahashi, wan u Yehu, tor u Iserael, akaa er: Va, sé zua ishigh ayol a ase.

⁹ Kpa Yoashi tor u Iserael tindi loho hen Amashia tor u Yuda a kaa er: Saa u sha Lebanon tindi loho hen Sedar u sha Lebanon a kaa er: Na wan wam, wan wou u kwase a̱ er: kpa ishôso i sha Lebanon va kar ndyar saa la.

¹⁰ Mimi je, u hemba Edom, nahan ishima you ngi hagher; yô gba manger sha kwagh la tsô, tema hen ya gir gir, inja na nan man ú kumbur ú ve a kwaghbo sha iyol you, ú va gba kua Yuda imôngo?

¹¹ Kpa Amashia wa iko ga. Tsô Yoashi tor u Iserael kôndo, nahan un vea Amashia tor u Yuda, ve za zua ishigh ayol a ve hen Bete-shemeshi u Yuda.

¹² Tsô kwagh hemba Yuda sha ishigh ki Iserael; hanma or yevese hide hen tenti u nan.

¹³ Yoashi tor u Iserael kôr Amashia tor u Yuda, wan u Yoashi, wan u Ahashia, hen Bete-shemeshi, kar va ken Yerusalem, va hembe gilgar u Yerusalem, hii hen Hundagar u Eferaim zan zan ar hen Hundagar u Zongo, ka aseva deri unyiin je la.

¹⁴ Shi a kura zenaria man azurfa cii kua ikav mbi i zua a mi ken iyou i TER cii, kua ken ayou a koson akaa ker a iyou i tor, kua mbakwarev kpaa, tsô a hide hen Samaria.

¹⁵ Aerenakaa a Yoashi agen a a er, man agee na kua ityav mbi a nôngo a Amashia tor u Yuda yô, i nger a ken ruamabera u abaver a utor mba Iserael la gaa?

¹⁶ Tsô Yoashi yav a uter nav imôngo, i ii un ken Samaria a utor mba Iserael imôngo; wan na Yerobiam gema tema tor sha ityough nagh.

¹⁷ Kpa Amashia, wan u Yoashi, tor u Yuda shi tsa anyom pue kar ataan shighe u Yoashi, wan u Yehoahashi, tor u Iserael kpe kera la.

¹⁸ Aerenakaa a Amashia agen yô, i nger a ken ruamabera u abaver a utor mba Yuda la gaa?

¹⁹ I zua zwa sha a na ken Yerusalem, nahan a yevese a za hen Lakishi; kpa ve tindi i tôv un angahar zan zan hen Lakishi, ve za wua un ker.

²⁰ Tsô i va a na sha anyinya, i va ii un a uter nav imôngo ken Yerusalem ken gar u Davidi.

²¹ Nahan ior mba Yuda cii tôô Asaria, u a lu anyom pue kar ataratar, ve ver un tor sha ityough ki ter na Amashia.

²² Ka un je a maa Elati a hide a mi hen Yuda ye, ken ijime i tor yav kera a uter nav imôngo la.

²³ Sha inyom i sha pue kar utaan i Amashia wan u Yoashi tor u Yuda la, Yerobiam wan u Yoashi tor u Iserael ya tor ken Samaria; a tema tor anyom akunduahar kar môm.

²⁴ A er ifer sha ishigh ki TER; a undu asorabo a Yerobiam wan u Nebati, a a ne Iserael a er a la ga.

²⁵ Ka un a hide a tar u Iserael, hii hen gbenda u karen zan Hamati zan zan za ar hen zegemnger u Araba la, sha imo i TER, Aôndo u Iserael, i A kaa, wanakiriki Na Yona wan u Amitai, profeti u ken Gati-hefer, a gema ôr i la.

²⁶ Gadia TER nenge ican i Iserael er i vihi yum yô; gadia ma or u nan lu ken uikangen shin u nan tem enger enger kpaa, u wasen Iserael nan lu je ga.

²⁷ Man TER kaa er Una ese iti i Iserael sha won kera ga; nahan A yima ve sha uwegh ku Yerobiam wan u Yoashi.

²⁸ Aerenakaa a Yerobiam agen man akaa a a er cii kua agee na man ityav mbi a nôngo man er a hide a Damaseku kua Hamati, mba ve lu mba Yuda tsuaa la, hen Iserael yô, i nger a ken ruamabera u abaver a utor mba Yuda la gaa?

²⁹ Tsô Yerobiam yav a uter nav imôngo, ka utor mba Iserael je la; wan na Sekaria ya tor sha ityough nagh.