2 Utor 10 - ICIGHAN BIBILO

¹ Ahaba lu a ônov mba nomso akunduatargber ken Samaria. Tsô Yehu nger uwashika, tindi hen Samaria, hen mbatarev mba Yesereel, ka mbatamen je la, man shi hen mba ve koso ônov mba Ahaba la, a kaa er:

² Shighe u washika ne una va nyôron her a ven yô, er ônov mba ter wen ve lu a ven imôngo man ne kpaa ne lu a akekeautya man anyinya man gilgar kua ikav mbi utyav kpaa yô,

³ tsuwa nen or u hemban doon, man u hemban lun a inja ken ônov mba ter wen, penda nen nan sha ikônough ki torough ki ter wen.

⁴ Kpa cier ve iyol kpishi, ve kaa er: Nenge, utor mba uhar mbala kpaa, fatyô u tilen sha ishigh nagh ga, man hire se, sé tile yee?

⁵ Nahan orvesen u nengen sha ya u tor, man shi orvesen u nengen sha gar, man mbatamen kpaa, kua mba ve koson mbayev mbala, ve tindi loho hen Yehu, ve kaa er: Se mba mbayev ou, sé er kwagh u wea kaa se cii; sé ver ma or tor ga; gba eren kwagh u a doo u tsô.

⁶ Tsô a nger washika u sha uhar her a ve. A kaa er: Aluer nea ta ken a mo yô, man aluer nea veren ato sha kwaghôron wam kpaa yô, tôô nen ityough mbi ônov mba ter wen la, va nen a mi her a mo, kper hen shighe ne nahan, hen Yesereel. Yô, ônov mba tor, ior akunduatargber, ve lu a mbavesen mba ken gar imôngo, mba ve koson ve la.

⁷ Tsô er washika va her a ve yô, ve kôr ônov mba tor mbala ve wua ve, lu ior akunduatargber, ve wa ityouv vev shin akese, ve tindi un a mi ken Yesereel.

⁸ Ortyom ugen va, va kaa un er: I va a ityouv mbi ônov mba tor ve. A kaa er: Ver nen mbi atihi ahar henpe nyôron hen hundagar, zan zan sev mbu̱ av.

⁹ Tsô sev mbu av yô, a due, a tile, a kaa a ior cii er: Ne mba mbaishôôv je; nenge, ka mo m te num sha terem, m woo un ye; kpa mban cii yô, ka unô ve woo di ve?

¹⁰ Fa nen, ma kwaghôron u TER, u TER ôr sha ya u Ahaba la, una gba inya ga; gadia TER er kwagh u lu ôr wanakiriki Na Eliya, Eliya gema kaa la.

¹¹ Tsô Yehu wua mba ve mase shin ken ya u Ahaba ken Yesereel cii, kua mbavesen nav cii, man ahur a na a mimi, kua upristi nav, a shi un ma or je ga.

¹² Nahan a mough a due a za hen Samaria. Er a za ar hen Bete-ekedi u mbakuranilev yô,

¹³ Yehu kohol anngôôv mba Ahashia tor u Yuda, a pine ve er: Ka ne unô nee? Ve gema ve kaa a na er: Ka se anngôôv mba Ahashia; se sen ser, sé va sugh ônov mba tor kua ônov mba ngô u tor.

¹⁴ Tsô a kaa er: Kôr nen ve uma. Nahan i kôr ve uma, i wua ve hen ijôr i hen Bete-ekedi la, lu ior akunduahar kar uhar, a de mô ve ga.

¹⁵ Moughon heera kera yô, a kohol Yehonadabi wan u Rekabi, lu van u va keghen un gbenda; a sugh un, a pine un er: Ishima you ngi a mo vough er ishima yam i lu a i you nahan kpa? Yehonadabi gema kaa er: Ngi vough. A kaa er: Aluer a lu nahan yô, zua uwegh a mo. Tsô a zua uwegh a na, a urugh un, a unde a na sha ikyekye na.

¹⁶ A kaa er: Va a mo imôngo, va nenge gbashima wam sha ci u TER. Tsô a gba zenden vea na sha ikyekye.

¹⁷ Va nyer ken Samaria yô, a wua ior mba Ahaba mba ve shi ken Samaria cii zan zan a tim un, sha imo i TER, i A kaa Eliya la.

¹⁸ Nahan Yehu kohol ior cii, a kaa a ve er: Ahaba lu civir Baal yum ga, kpa Yehu yô, una civir un kpishi.

¹⁹ Yô, shi yilam nen uprofeti mba Baal cii, mbacivir un cii kua upristi nav cii; i̱ de undun mô môm ga; gadia m ngu a nagh zegenan u me na Baal yô; hanma or u i nenge a nan heen ga yô, nana̱ kera lu uma ga. Kpa lu ayom Yehu er ye, a wa ishima u timin mbacivir Baal.

²⁰ Shi Yehu kaa er: Ver nen shighe u icighanmkohol sha ci u Baal. Tsô i yôô un.

²¹ Nahan Yehu tindi loho ken Iserael cii; mbacivir Baal cii va, mô ve de van ga, ve nyôr ken iyou i Baal; iyou i Baal kpaa iv, hii ken kpekpe ne je, ar ken ngula.

²² Tsô a kaa a ornengen sha iyou i akondo la er: Due a akondo sha ci u mbacivir Baal cii. Tsô a due ve a akondo.

²³ Tsô Yehu vea Yehonadabi wan u Rekabi, ve nyôr ken iyou i Baal; a kaa a mbacivir Baal er: Ker nen, jinge nen, ma or u civir TER môm nana̱ de luun a ven ga, saa mba civir Baal tseegh.

²⁴ Tsô ve nyôr u nan iniav mbi sôngon kua mbi nanden; Yehu vande veren ior akunduanyiin ken won, a kaa a ve er: Aluer ior mba me wa ve sha ikev yen, mô ve môm nana war yô, u nan pase or la, uma u nan una paa uma u or la.

²⁵ Tsô er i bee nagh ku nanden kera yô, Yehu kaa a mbakuran kua mbahemenev er: Nyôr, wua nen ve; mô ve môm nana̱ de dugh ga. Tsô ve wua ve sha zwa u sanker, mbakuran kua mbahemenev haa ve ken won, maa ve nyôr ken gar u iyou i Baal.

²⁶ Ve due a mtôm ma ma lu ken iyou i Baal, ve nande ma.

²⁷ Ve yôhôl ityôgh ki Baal, shi ve yôhôl iyou i Baal kpaa, ve gema i i hingir ahungwa a wanger iyol her zan zan nyian.

²⁸ Kape Yehu tim Baal ken Iserael kera la.

²⁹ Kpa asorabo a Yerobiam wan u Nebati, a a ne Iserael a er a la yô, Yehu pav a a ga, ka anibuav mba zenaria mba ve lu ken Betel kua ken Dan la.

³⁰ Tsô TER kaa a Yehu er: Er u er dedoo, u er kwagh u a lu vough sha ashe Am, u er a ya u Ahaba sha kwagh u a lu ken ishima Yam cii yô, nahan ônov ou vea tema sha ikônough ki torough ki Iserael zan zan ikov inyiin je.

³¹ Kpa Yehu wa iko u zan sha atindiakaa a TER, Aôndo u Iserael, a ishima na cii ga, a undu asorabo a Yerobiam a a ne Iserael a er a la ga.

³² Sha ayange la, TER hii u panden Iserael tar; Hasael hemba ve ken tar u Iserael cii,

³³ hii hen Yordan vegher u sha ityoughkitaregh la, tar u Gileadi cii, Mbagadi man Mbaruben man Mbamanase, hii hen Aroer, u a lu hen kpe u pev u Arnon la, Gileadi kua Bashan kpaa.

³⁴ Aerenakaa a Yehu agen man akaa a a er cii kua agee na yô, i nger a ken ruamabera u abaver a utor mba Iserael la gaa?

³⁵ Tsô Yehu yav a uter nav imôngo, i ii un ken Samaria; Yehoahashi wan na tema tor sha ityough nagh.

³⁶ Anyom a Yehu tema tor sha Iserael ken Samaria yô, kuma ikundu kar anigheni.