2 Utor 1 - ICIGHAN BIBILO

¹ Zum u Ahaba kpe kera yô, Moabi due sha ikev i Iserael kera.

² Ahashia osogh sha ian i sha kpoyou na u sha ken Samaria gba shin inya, nahan iyol nyoon un; tsô a tindi mbatyomov, a kaa a ve er: Za, za pine nen Baal-sebu aôndo u Ekeron ner, me war angev mbun kpa.

³ Kpa ortyom u TER kaa a Eliya Ortishibi er: Mough kôndo, za kohol mbatyomov mba tor u Samaria mbala, pine ve, wer: Aôndo ngu ken Iserael ga, shin ne za pin Baal-sebu aôndo u Ekerono?

⁴ Yô, TER ngu kaan nahan er: Ú hungwa sha gambe u u undu ne ga, ú kpe kpee. Nahan Eliya mough yem.

⁵ Tsô mbatyomov mbala cin hide her a na, a pine ve er: Ka nyi ne hide?

⁶ Ve kaa a na er: Orgen kôndo va kohol se, nan kaa a vese er: Hide, za nen hen tor u a tindi ne la, za kaa nen un ner: TER ngu kaan nahan er: Aôndo ngu ken Iserael je ga, shin u tindi wer i̱ za pine Baal-sebu aôndo u Ekerono? Nahan, ú hungwa sha gambe u u undu ne ga, ú kpe kpee.

⁷ A pine ve er: Or shon nan ngu nana, u nan kende nan va kohol ne, nan er ne kwagh nee?

⁸ Ve gema ve kaa a na er: Nan ngu a ice iyol, a zer kwange u ikôv shin iwenge. Tsô a kaa er: Ka Eliya Ortishibi.

⁹ Nahan a tindi orhementyav u a lu a ior akunduahargber sha ikev yô, a ior nav mba akunduahargber mbala cii. Tsô a kôndo sha a na; yô, un tema sha ityough ki igungu. A kaa a na er: Or u Aôndo, tor kaa er: U̱ hungwa!

¹⁰ Eliya gema kaa a orhementyav u ior akunduahargber la er: Aluer mea lu or u Aôndo mimi yô, usu u̱ sen Sha u̱ va hia u kua ior ou mba akunduahargber mban cii. Tsô usu sen Sha hia un kua ior nav mba akunduahargber mbala.

¹¹ Nahan a shi a tindi orhementyav ugen u lun a ior akunduahargber sha ikev a ior nav mba akunduahargber mbala. Un kpaa a gema a kaa a na er: Or u Aôndo, tor kaa nahan er: U̱ hungwa fefa!

¹² Eliya gema kaa a ve er: Aluer mea lu or u Aôndo mimi yô, usu u̱ sen Sha u̱ va hia u a ior ou mba akunduahargber mban. Tsô usu u Aôndo sen Sha, hia un a ior nav mba akunduahargber mbala.

¹³ Shi a tindi orhementyav ugen u lun a ior akunduahargber sha ikev, u sha kwa tar, a ior nav akunduahargber la. Un orhementyav u ior akunduahargber, u sha utar la, kôndo va gure sha ishigh ki Eliya, a zamber a na, a kaa a na er: Or u Aôndo, uma wam kua uma u mbayev ou akunduahargber mban, a̱ shi lu kwagh u injaa sha ashe ou.

¹⁴ Nenge, usu sen Sha va hia mbahemen ityav mba uhar mba lun a ior akunduahargber akunduahargber sha ikev, mba tsuaa la, a ior vev mba akunduahargber mbala; yô uma wam a̱ shi lu kwagh u injaa sha ishigh you.

¹⁵ Tsô ortyom u TER kaa a Eliya er: Hungwa a na imôngo; de cie un ga. Nahan a mough, a hungwa a na imôngo, a za vea na hen tor.

¹⁶ A kaa a na er: TER ngu kaan nahan er: Er u tindi mbatyomov wer, ve̱ za pine Baal-sebu aôndo u Ekeron yô—shin Aôndo u á pine imo Na ngu ken Iserael ga ase?—nahan ú kera hungwa sha gambe wou u u undu ne ga, ú kpe kpee.

¹⁷ Nahan a kpe di sha imo i TER, er Eliya kaa un nahan je. Yehoram ya tor sha ityough nagh sha inyom i sha uhar i Yehoram wan u Yehoshafati tor u Yuda la; gadia a lu a wan ga.

¹⁸ Aerenakaa agen a Ahashia er yô, i nger a ken ruamabera u abaver a utor mba Iserael la gaa?